3
Opfu, shi Jiobu l'ọnu
1 Tọbudu iya bụ; e mechaẹpho; Jiobu saa ọnu wata epfu opfu; bya awata ephu eswe, a nwụru iya iphu. 2 O pfushiahaa sụ:
3 “G'eswe, a nwụru mu
bụkwaru ọla-l'iswi!
G'ẹnyashi, a tsụru ime mu
bụkwarupho ẹnyashi,
larụ l'iswi!
4 Gẹ mbọku ono gbahụkwa
ọchii!
Gẹ Chileke ọphu bu l'eli ta
agụbehekwa iya iphe;
ọphu ọ dụkwa iphe,
dụ g'ìphóró, adụkwadu
mbọku ono!
5 G'ọchii yẹe tsụkiribaa
tsụnyikwaa eswe ono
ẹnya!
G'urwukpu sọpyabekwa iya!
G'eswe mbọku ono
gbahụkotakwa tsụrikitiki!
6 Mbụ-a; g'ẹjo dadishi tụkwa
ẹnyashi mbọku ono
gburumu swịswia!
G'a ta gụhekwaru iya ye
l'eswe, nwụru l'apha!
Ọphu a gụkwaru iya ye
l'eswe lanụ l'ọnwa!
7 Mu sụru-a; g'ẹnyashi
mbọku ono bụkwaru
mbọku, gba ẹka nwa!
G'ọ tọ dụkwa olu ẹmereme,
aa-nụma iya l'ime!
8 Gẹ ndu atụje mbọku ọnu
tụkwaa mbọku ono ọnu;
mbụ ndu kwakọberu
akwakọbe emete
ẹjo-oke-agiyi.
9 Gẹ kpokpode nchi-abọhu
iya gbahụkwa ọchii.
G'o lekwaa ẹnya l'ìphóró
abya adụdu;
e -mechaa l'ọ bụru kẹ
mmanụ; ọphu ọ
hụmakwa gẹregere ụtsu
ẹnya ahụma ophu.
10 Noo kẹle o to mechiduru
ẹpho ne mu
g'a ta nwụ mu mbọku ono;
k'ọphu aphụ ọwa ata
atsọduru mu.
11 Mbụ-a; ?bụnaa gụnu meru
g'o gude ọphu ọ bụdu teke
aanwụ mu;
mbụ l'ọo teke ono,
mu shi l'ẹpho afụta ono
bẹ mu gege atụ-buhu
unme nwụhu?
12 ?Bụnaa gụnu meru g'o gude
ụtapfu hee mu hefuta?
Mbụ; ?dẹnuanu g'o gude ẹra dụ
k'ọphu mu ngụru iya
angụngu ophu?
13 Kẹle nta-a bẹ mu gege
azẹkpooro nwadoo.
Mu gege anọro gẹ mu zẹ lẹ
mgbẹnya.
Ọo ya bụ mẹ mu anọduro
pyakọo onwomu
nwa nggujingguji;
14 mu lẹ ndu eze mẹ ndu
mgbazi ụnwu-eliphe;
ndu kwashịru unuphu
doberu onwophẹ
l'eliphe-a;
ọle nta-a bẹ ọ bụkotawa
ochobu.
15 Mu lẹ ndu-ishi, bụ ndu shi
nweru mkpọla-ododo;
ndu shi doo
mkpọla-ọchaa dojia ụlo
phẹ godogodo.
16 Ọzokwanu lẹ-a; ?bụnaa gụnu
kparụ iphe,
mu adụdu gẹ nwa,
a byaru anwụ;
ọ nwụhuwaa ne iya l'ẹpho;
e woru iya je elia; mbụ
gẹ nwaswa, asakpọdarunu
ẹnya asasa ophu.
17 Ẹka ono bẹ ndu ẹjo-iphe
a-babuhu hanyịhanyi.
Ndu ike bvụru a-nọdu iya
tụtaahaa unme.
18 Alị-maa ono bẹ ndu mkpọro
yịchaa lẹ ndu nọ iya atụta
unme.
Ẹphe ta anụhedu olu ndu
anọduje achị phẹ g'ohu.
19 Ndu ha nwanshịi nọ l'ẹka
ono;
ndu ha shii nọdu iya.
Ọphu ndu shi bụru ohu anọedu
l'ẹka nnajịuphu phẹ.
20 ?Dẹnu g'o gude ìphóró nọdu
adụjeru ndu ejegbu onwophẹ
l'iphe-ẹhuka.
A nọdu ahajẹkwadu ndu aphụ
tsọru g'ẹphe dzụkwaduru
ndzụ;
21 mbụ ndu anwụhu agụ ẹgu;
ọphu o kwedu phẹ egbugbu;
ndu anọduje achọ iya gẹ
ndu achọ ẹku,
ere ire, e domiru edomi.
22 Ndu eteje ẹswa ntụmatu;
mbụ kwata mee ẹmereme
m'ẹphe bahụ l'ime ilu.
23 ?Dẹnuanu g'o gude ìphóró
nọdu adụjekwarupho onye
e domiru ụzo iya edomi;
tẹme Chileke gude
ọkpokuu kpọ-phee ya
mgburugburu; ọ kwaa
l'ime iya?
24 Noo kẹle ọ bụwaa atsụ ude
bụ nri,
epyoje mu ọnu.
Mgbede, mu ata dụepho
g'ẹka mini asọ gborogboro.
25 Iphe, mu atsụshi ebvu ike
bụepho iphe,
mechaarụ byaru mu nụ.
Ọ bụru iphe ono, mu anmarụ
pyaapyaapyaa mechaarụ
mee l'ẹhu mu.
26 Ẹhu ta adụjeduru mu guu;
ọphu mu atụtajeduru unme;
ọphu ẹhu ebvujeduru mu
ebvuru.
Ọo ẹpho iphe-ẹhuka bẹ mu
l'iya anọduje eme.”