15
Elifazu epfu lẹ Jiobu nmawaru onwiya ikpe
1 Tọbudu iya bụ; Elifazu onye
Temanu bya eyee ọnu sụ-a:
2 Onye maru iphe; ?oopfuje
opfu, enwedu ishi;
ọzoo tsụkoo okpomọku,
shi lẹ phẹrephere
ẹnyanwu-awawa
tsụ-jia onwiya ẹpho?
3 ?Bụ mkpọkoro-opfu bẹ onye
maru iphe egudeje
eye ọnu l'opfu;
mbụ epfupheẹpho opfu,
adụdu mẹ nanụ, barụ urwu?
4 Mbụ lẹ gụbedua wokpọerupho
k'atsụ Chileke ebvu hua
l'alị;
bya akpọshikwapho
g'e te pfujehẹ nụ Chileke
epfupfu ophu;
5 kẹle ọo iphe-ẹji ngu ezi ọnu
ngu iphe, oo-pfu;
mbụ l'ọo ire onye ẹregede
bẹ i gude epfu opfu.
6 I gudeakwa ọnu ngu anma
onwongu ikpe.
Ọ tọ bụekwa mbẹdua anma
ngu ikpe.
Ọ bụru ogbogboromọnu ngu
agba ngu ekebe.
7 ?Bụ ngu bụ nwa mbụ,
e beberu nwụa?
?Ọ dụ g'i vu úbvú úbvú ụzo
nọdu l'eliphe-a?
8 ?Ọ dụ g'ị nụmaru idzu,
Chileke chịru?
?Tọo ịiri l'ọo ngu maru iphe
nwẹkinyi ngu?
9 ?Bụ gụnu bẹ ị maru,
anyịbedua amadụ?
?Bụ gụnu bu iphe,
edoje ngu ẹnya,
te edodu anyịbedua?
10 Ndu ishi bụwaa ẹwó ẹwó;
mbụ ndu kahụwaru akahụ
bẹ anyi l'ẹphe nọkwa l'ẹka-a;
mbụ ndu a nwụadaru
tẹme a nwụa nna ngu.
11 ?Ọ dụ g'obu ono, Chileke adụ
ngu ono parụ ngu nwanshịi
l'ẹnya; mbụ opfu ono,
a tọru nwẹhu rwebe ẹhu
erwebe epfu anụ ngu ono?
12 ?Dẹnu g'o gude ị haa ọkpoma
ngu g'o duta ngu dufu?
Mbụ-a; ?dẹnu g'o gude ẹnya
nọdu atụ ngu vaavaavaa
g'ọotu ngu ono
13 kẹ g'i woru ẹhu-eghu ngu
atụ-koshi Chileke;
tẹme opfu, dụgbaa ẹgube ono
shigbaa ngu l'ọnu afụshi?
14 ?Bụ gụnu bẹ nemadzụ bụ kẹ
gẹ ọ bya adụebe ree?
Mbụ-a; ?bụ gụnu bẹ
nemadzụ ono,
bụ nwanyị nwụru iya ono
bụ kẹ g'ọ pfụbe-ẹka-ọto?
15 Ọ -bụru lẹ Chileke te
egudedu ire ndu nkiya ẹka;
ọphu imigwe adụebedu
ree l'ẹnya iya;
16 ?tọ kadụnu ta agụbe
nemadzụ iphe;
mbụ nemadzụ ono,
adụdu iphe, ọ bụ;
tẹme ụrwuali ji iya ẹhu;
tẹme ọ nọdu angụ ẹjo-iphe
g'onye angụ mini?
17 Ngabẹru mu nchị ree gẹ mu
mee g'iphe doghee
ngu ẹnya edoghe;
gẹ mu kọoru ngu iphe,
mu gudewaa ẹnya mu hụma;
18 mbụ iphe, ndu maru iphe
pfuru tọgbo iya ẹba;
ọphu ọ dụdu iphe,
ndiche phẹ pfuru phẹ dụru
ọphu ẹphe domiru edomi.
19 Ndiche phẹ ono bụ phẹ
gẹdegede bẹ a nụru alị-a;
ọphu ọ dụdu onye lwarụ
alwalwa, tụswaru
l'echilabọ phẹ.
20 Sụ-a; onye ẹjo-iphe
anọdujekwa atsụ pfụpfupfu
mkpụrumkpuru
jasụkpoo g'ọo-nọ-beru;
ndu ewebushi akụrepho
nọdu anọduje
aghakọtaepho gburugburu
lẹ nwime apha olemole,
e doberu phẹ l'eliphe-a.
21 Iphe, anọduje aphụ iya
gbudugbudu lẹ nchi
bụerupho iphe, eye ebvu.
Teke iphe dụkpoo
rengurengu kpọ;
noo teke ndu abalidebvu
abyajẹ ibe iya.
22 Ọ to byadu ekwe lẹ ya a-lwa
ndzụ l'ime ọchii ono,
ọ bahụru ono.
Ọ bụru l'ogu-echi bẹ
oo-mecha laa.
23 Ootsojeru aghaphe achọ ẹka
ya a-kpata nri.
Ọ -nọdu l'ọoji sụ:
“?Bụ awe bẹ ọ nọ?”
Ọ maanarụ-a l'eswe,
a-gba ọchii bẹ nọkwa
iya ntse.
24 Ẹjo iphe-ẹhuka yẹe iphe-aphụ
abyajẹ abyabẹ iya
ndzụ-agụgu l'ẹhu.
Ẹphe anọdu echeru iya
ẹka mgba g'onye eze,
doziru onwiya abya
eje ọgu.
25 Ọ bụru iphe, tụkoru iya
kpaa bụ l'ootsuru
Chileke ẹka l'ọkpoma.
Tẹme ọ nọdu ekoshi ọphoo
l'iphu
Ọkalibe-kangokọtaru-nụ.
26 Oogudeje olu,
aha kpaakpaa
agba biribiri etso iya ọgu;
parụ phosa phosa iphe,
shihuru ike,
ya e-gude gboberu onwiya
l'ọgu, yẹe ya alwụ.
27 “A makwarụ-a l'iphu aza
iya tootootoo;
ọ tsụa anụ kẹ nyịmunyimu
l'upfu;
28 obenu l'ẹka oo-mecha buru
bụ mkpụkpu,
bụwaa ochobu;
buru l'okorobo ụlo,
adụdu onye bu iya nụ;
ụlo, a hawaru; ọ bụru ikpọzu.
29 O too nwehẹduru iphe;
ọphu ẹku iya a-nọribeduru;
ọphu iphe, o setarụ eseta
ejedzuduru alị iya.
30 Ọ tọo nahụdu ọchii.
Tẹme ọ bụru ọku e-mechaa
kee irwu, o rwuru.
Chileke a-phụa ya ọnu
phụkashia.
31 G'o to jekwa eme onwiya
eswe l'akpọru obu ye l'iphe,
abụdu iphe;
kẹle ọ tọ dụdu iphe,
oo-rita iya.
32 Ọ tọo nọ-rwudu ndzụ l'ishi;
l'a pfụwaa ya ụgwo iphe,
oome pfụ-dzua ya ya
apfụ-dzu;
ọphu ẹkali iya ajadu àjàjà.
33 Ọo-dụ gẹ vayịnu,
e chikoshiru akpụru iya
l'ẹbe ọ cha achacha;
mbụ l'ọo-dụepho g'oshi
olivu, tụchaaru ige;
o rishihu;
34 kẹle iphe, bụkpoo ndu ta
atsụdu Chileke ebvu
a-gbakọtaru ẹka nwa.
Ọ bụru ọku e-tsufu ụlo ndu
yeru obu l'eri ụphalazu.
35 Ẹgube ndu ono atsụtaje
ime nchọ-kopfu.
E -mechaa; ẹphe anwụa
ẹjo-ememe.
Ẹregede dụ phẹ l'ẹpho
evu evuvu.”