12
Ndu eze, Mósisu lwụtaru
1 Ọwaa bụ ẹpha ndu eze ndu alị ono, ụnwu Ízurẹlu sụru pyaapyaa natachaa alị phẹ nworu l'azụ ẹnyimu Jiọ́danu azụ iya ọphuu l'ụzo ẹnyanwu-awawa; a -gbẹ lẹ ndu bu lẹ nsụda nggele Anọnu; jasụ lẹ ndu bu l'úbvú Hamọnu; mẹkpoo ndu bu l'ụzo ẹnyanwu-awawa nsụda Araba.
2 Eze kẹ mbụ bụ Sihọnu, bụ eze ndu Amọru. Yẹbedua shi buru lẹ mkpụkpu Hẹshibonu. Alị-eze iya kee alị Giladu ẹbo; ọ bụru eze l'ụzo lanụ. Alị-eze iya ono gbẹ lẹ mkpụkpu Arowa, nọ l'agụga agụga nsụda nggele Anọnu; bya agbẹ lẹ mkpụkpu ono, nọ l'echilabọ nsụda nggele Anọnu ono je akpaa lẹ nggele Jiabọku, bụ oke alị ndu Amọnu. 3 O shikwaphọ bụru eze ndu ọphu bu lẹ nsụda Araba; a -gbẹ l'ụzo ẹnyanwu-awawa eze-ẹnyimu Gálili je akpaa lẹ mkpụkpu Bẹtu-Jieshimọtu, dụ l'ụzo ẹnyanwu-awawa Eze-ẹnyimu Únú; bya agọ-jia shia ụzo ndọhali lụfuta lẹ mgbaze mgbaze úbvú Pisiga.
4 Onye eze ọzo bụ Ọgu, bụ eze ndu Beshanu. Alị ẹka o shi bụru eze phẹ bẹ a lwụtakwarupho. Yẹbedua shi buru lẹ mkpụkpu Ashịtoretu; yẹe mkpụkpu Edereyi. Ọgu ono bụ onye ikpazụ l'eri Rafa. 5 Alị-eze iya rwuchaaru úbvú Hamọnu; waa mkpụkpu Saleka; waa alị Beshanu l'ophu; je akpaa l'oke alị ndu Geshu; mẹ kẹ ndu Maka; mẹ nkeru-ẹbo alị Giladu; nọo jasụ ẹphe l'onye eze, bụ Sihọnu je amaa oke lẹ mkpụkpu Hẹshibonu.
6 Ndu eze labọ ono bụ onye-ozi Chipfu, bụ Mósisu; yẹe ndu Ízurẹlu lwụ-kperu phẹ. Mósisu bya eworu alị ono nụ ọkpa-ipfu Rúbẹnu; waa kẹ Gadu; waa kẹ nkeru-ẹbo ọkpa-ipfu Manásẹ g'ọ bụru okiphe phẹ.
Ndu eze ọphu Jioshuwa lwụ-kperu l'onwiya
7 Ọwa-a bụ ndu eze ọphu bu l'ụzo ẹnyanwu-arịba ẹnyimu Jiọ́danu, bụ ndu Jioshuwa yẹe ndu Ízurẹlu lwụ-kpekọtaru. Alị ndu eze ono gbẹ lẹ mkpụkpu Belu-Gadu, nọ lẹ nsụda Lébanọnu; je akpaa l'úbvú Halaku, nọ l'ụzo, e shi eje Siye. Jioshuwa bya eworu alị ono keeru ndu Ízurẹlu l'ọkpa-ipfu l'ọkpa-ipfu g'ọ bụru okiphe phẹ. 8 Alị, shi tụko yịkotaru iya nụ bụ: alị úbvú úbvú; waa alị ọkpa úbvú, nọ l'ụzo ẹnyanwu-arịba; waa nsụda Araba; waa alị, nọ lẹ mgbaka mgbaka úbvú; waa ọma echiẹgu; waa echiẹgu ndọhali. Alị ono shi tụkoru bụkotaru alị ndu Hetu; waa kẹ ndu Amọru; waa kẹ ndu Kénanu; waa kẹ ndu Pẹ́rezu; waa kẹ ndu Hevu; mẹ kẹ ndu Jiebusu.
9 Ndu Ízurẹlu lwụ-kperu onye eze ndu Jieriko;
waa onye eze ndu Eyayi, nọ-kube mkpụkpu Bẹtelu;
10 waa onye eze ndu Jierúsalẹmu;
mẹ onye eze ndu Hẹburonu;
11 waa onye eze ndu Jiarumutu;
mẹ onye eze ndu Lakishi;
12 waa onye eze ndu Ẹgulonu;
mẹ onye eze ndu Geza;
13 waa onye eze ndu Debi;
mẹ onye eze ndu Geda;
14 waa onye eze ndu Họma;
mẹ onye eze ndu Aradu;
15 waa onye eze ndu Libuna;
mẹ onye eze ndu Adulamu;
16 waa onye eze ndu Makeda;
mẹ onye eze ndu Bẹtelu;
17 waa onye eze ndu Tapuwa;
mẹ onye eze ndu Hefa;
18 waa onye eze ndu Afẹku;
mẹ onye eze ndu Lasharọnu;
19 waa onye eze ndu Madọnu;
mẹ onye eze ndu Hazọ;
20 waa onye eze ndu Shimurọnu-Merọnu;
mẹ onye eze ndu Akụshafu;
21 waa onye eze ndu Tanaku;
mẹ onye eze ndu Megido;
22 waa onye eze ndu Kadẹshi;
mẹ onye eze ndu Jiokuneyamu, nọ l'úbvú Kamẹlu;
23 waa onye eze ndu Dọru, nọ lẹ Nafatu-Dọru;
mẹ onye eze ndu Goyimu, nọ l'alị Gálili;
24 wafụa onye eze ndu Tịza.
Iphe, ndu eze ono tụkoru dụ bụ ndu eze ụkporo l'iri lẹ nanụ.