4
Ọnodu Jierúsalẹmu, teke ọ daru
1 Lewarọ gẹ mkpọla-ododo
ono,
shi egbu nwịinwii ono
byaru agbachihuwa
agbachihu.
Lewarọ g'ọkpobe mkpọla-ododo
ono, byaru agbanwee.
Mkpuma ụlo, dụ nsọ bẹ a
tụkashichaaru nanụ
nanụ lẹ mgbakata-ụzo,
nọnu.
2 Ụnwu Zayọnu, vugbaa oke
aswa ono; mbụ ndu ono,
shi aba urwu g'ọkpobe
mkpọla-ododo ono;
bẹ byawaru adụ rịvo rịvo
gẹ ite, e gude ụrwa kpụa;
mbụ g'iphe, ọ-kpụ-ite
gude ẹka kpụa.
3 Mbụ-a; nkụta-ọswa bẹ
echebejekwa ụnwu iya ẹra;
obenu lẹ ndibe mu bẹ
ẹjo obu, dụ phẹ nụ
bẹ dụ gẹ k'oke-ẹnu,
bu l'echiẹgu.
4 Ire bẹ nyakụchawaru
ụnwegirima,
angụ ẹra l'akpo l'ẹka
ẹgu ẹra agụ phẹ.
Ụnwegirima nshịi nọdu
arwọ arwọ nri;
ọphu ọ dụdu onye
anụje phẹ iya nụ.
5 Ndu ono, shi anọduje eri
gwọogwoo ono;
bẹ dakachaawaru l'etsuzọ.
Ndu ono, e gude nkụushi
hefuta ono bẹ azẹjewaa
l'ikpọzu.
6 Aphụ, a nụru ndibe mu
k'ẹjo-iphe,
ẹphe meru bẹ ka shii
eme lẹ kẹ ndu mkpụkpu
Sọdomu;
mbụ Sọdomu ono,
e gude ntabu ẹnya lanụ
mebyishia;
ọphu ọ tọ dụdu onye
gbaru phẹ mkpu ono.
7 Ndu-ishi phẹ bẹ shi ka
aka-mini-sunoo acha
pemu pemu.
Ẹphe shi ka ẹra-eswi
acha ụcha.
Ogwẹhu phẹ bẹ shi akajẹ
mkpuma-egbe acha
kẹ zịriri.
Ẹphe shi anọduje ama
gẹ mkpuma sáfàyà.
8 Ọle nta-a bẹ ẹphe ka unyi eji
uji.
Ọ tọ dụdu onye
ahụbejekwadu phẹ
ama l'ụzo.
Akpọ-ẹhu phẹ bẹ
nyakụchawaru nwa
anyakụru l'ọkpu phẹ.
Ẹphe kpọhuwaru nkụ dụ
gẹ mkpụshi nkụ.
9 Ndu e gburu lẹ mma;
kakwa mma eme lẹ
ndu ẹgu gburu.
Ẹgu gwarụ phẹ maa;
jasụ ẹphe nwụshihu;
kẹle ọ tọ dụdu nri,
shi l'ẹgu rwuru phẹ ọnu.
10 Ụnwanyi, nweru
obu-imemini bẹ
gudechawa ẹka phẹ shia
ụnwegirima phẹ l'ite taa;
ọ bụru nri phẹ lẹ teke ono,
ndibe mu larụ l'iswi ono.
11 Chipfu bẹ gbahawaru
oke ẹhu-eghu iya ẹka.
O kpukposhiwaru
ẹhu-eghu iya ono,
enwu phuruphuru
ono.
Ọo ya bẹ dụ-nwuru ọku,
tsuru Zayọnu
tsupyashịchaa ẹka a
tụru ọkpa iya.
12 Ndu eze ndu mgboko-a;
mẹ ndu bu lẹ mgboko
l'ophu bẹ te ekwetaduru
lẹ ndu iwashị;
mẹ ndu ọhogu bẹ a-dụ
ike ye ọkpa l'ọnu-abata
Jierúsalẹmu.
13 Obenu l'o meru nno.
Ọ bụru iphe, kpatarụ
iya nụ bẹ bụ iphe-ẹji,
ndu mpfuchiru iya
emegbaa;
Mẹkwapho ẹjo-iphe,
ndu-uke iya eme;
mbụ ndu ono,
nọ l'echilabọ mkpụkpu
gbushia ndu
pfụberekoto ono.
14 Ẹphe tsoru ụzo aghaphe
phururugbada gẹ ndu
atsụ ishii.
Ẹphe gudewaa mee ndu ẹphe
gbushiru merwushia
onwophẹ;
k'ọphu bụ l'ọ tọ dụdu
onye a-dụ ike edenyi
ẹka l'uwe phẹ.
15 Iphe ụnwu-eliphe anọduje
araru phẹ bụ: “Unu tụgbua!
Ntụrwu dụ unu l'ẹhu!
Unu tụgbua! Unu tụgbua!
G'ọ tọ dụkwa onye
unu e-denyi ẹka!”
Ọo ya bụ; ẹphe gbafụ je
aghapheaha
phururugbada.
Ndu shi l'ọhamoha, nọnu
nọdu asụje:
“Ẹphe ta abyakwa ebubaaru
l'ẹka-a ọzobaa.”
16 Ọo Chipfu l'onwiya bẹ bụ
onye chịkashiru phẹ nụ.
Ọphu ọo-gụbeedu phẹ
iphe ọzobaa.
Ẹphe ta akwabẹduru
ndu-uke ùbvù;
Ọphu ẹphe te emeduru
ndu bụ ọgerenya ree.
17 Ọphu kachakpọo nụ
bụ l'anyi lewaru
ẹnya ndu a-gbaru anyi
mkpu; ike bvụ anyi;
ọ bụru kẹ mmanụ.
Anyi nọ l'ụlo-nche anyi ele
ẹnya ọha ono,
taa dụkpodanu ike
adzọta anyi.
18 Ẹphe anọduje eedo ọkpa anyi;
k'ọphu bụ l'anyi te
eshijeẹdu ụzo anyi.
Mbọku ikpazụ anyi dụkwaa
ntse; a gụwaru mbọku,
anyi a-nọ-beru ọgu;
noo kẹle mbọku
ikpazụ anyi rwuwaru
erwurwu.
19 Ndu achị anyi ọso bẹ
kakwa ugo,
ephe l'akpaminigwe
eme barabara.
Ẹphe chịru anyi ọso l'eli
úbvú úbvú;
ẹphe je egepagbaaru
l'echiẹgu kwabẹru anyi.
20 Onye ono, Chipfu wụru manụ
l'ishi;
mbụ onye ono, bụ iya bụ
unme, anyi atụ ono
bẹ nwulahụru lẹ nsụ,
ẹphe tụru;
mbụ onye ono,
anyi rịru sụ l'anyi a-nọdu
lẹ mkpula iya dzụru
ndzụ l'echilabọ
ọhamoha ono.
21 G'ẹhu tsọo ngu ụtso;
tee ẹswa gụbe nwada
Edọmu;
mbụ gụbe onye ono,
bu l'alị Uzu.
Ọle okoro iphe-ẹhuka ono
bẹ a-nụkwa ngu-a.
L'ịi-ngụa ya; l'ọotsua ngu
atsụtsu;
l'ịigbabe onwongu ọto.
22 Gụbe nwada Zayọnu;
aphụ, anụ ngu
k'ẹjo-iphe ono,
i meru ono bẹ
bvụakwaru nụ.
Ọ tọo haẹdu ngu g'ị
bụwaruro onye a kpụru
lẹ ndzụ.
Ọle ọo-nụkwanu ngu
aphụ ẹjo-iphe,
i meru gụbe
nwada Edọmu.
Iphe-ẹji ngu ono, bẹ ọo-tụ
jalaa.