14
1 Nwanyị, maru iphe
anọduje edozi ọnu-ụlo iya
edozi.
Obenu l'onye ọphu bụ
onye-eswe anọduje
achịkashi iya achịkashi.
2 Onye iphe, oome pfụru
nhamụnha l'anọduje atsụ
Chipfu ebvu.
Obenu l'onye ụzo iya dụ
nggọdogo nggọdogo ta
adụdu iphe,
ọ gụberu Chileke.
3 Onye eswe -pfua opfu;
ẹchachi abụru iya
l'okpurukpu gbaa.
Obenu l'ọo ogbogboromọnu
ndu maru iphe
anọduje eche phẹ nche.
4 Ẹka eswi, e gude eje
ozi adụdu bẹ ọba
adabyijeru iphoro.
Ọo eswi -jeshia ozi ike; iphe,
a kpatarụ l'opfu akụru
akụru.
5 Onye agba ekebe, e gude
ire iya ẹka ta adzụjekwa
ụka.
Obenu l'onye agba ẹjo-ekebe
bụ ụka bẹ ọonoduje
adzụshi.
6 Onye mgbọnu achọje
mmamiphe;
ọ tọ dụdu ọphu ọohuma.
Obenu l'amarụ iphe atọjeele-a
nwẹhu ejepfu ndu iphe
edoje ẹnya.
7 Nọdukwa ọmata ụzenya;
kẹle ị tịi hụmakwa iya
mmamiphe
l'ogbogboromọnu.
8 Onye nweru egomunggo bẹ
bụ iphe, egoshije l'ọ maru
iphe bụ l'ụzo,
ooshi edoje iya ẹnya.
Obenu l'iphe, egoshije
l'onye-eswe bụ ọmata bụ
l'oogudeje ụghoshi eme
iphemiphe.
9 Ndu eme eswe egudeje iphe-ẹji
agba lẹ mgbọnu.
Obenu lẹ ndu obu phẹ gụru
ìphóró bẹ ọonoduje agụ
g'ẹphe mee iphe g'ọ
pfụru nhamụnha.
10 Ọkpoma nemadzụ l'ẹhu l'ẹhu
makọtaru iphe,
atsụ iya l'ẹhu.
Ọphu ọ dụdu onye yẹe ya
agbajẹ mgba l'ẹhu-ụtso,
dụ iya nụ.
11 Ọnu-ụlo onye ẹjo-iphe bẹ
ee-mechakwaa lwụa.
Obenu lẹ nwobu,
onye pfụberekoto
kpọberu a-nọduepho aja
ajaja eje.
12 Ọ dụru ụzo, abụjeru;
nemadzụ -nọdu eshi iya
l'ọoburu iya ọkpobe ụzo.
Obenu l'ẹka ụzo ono jeberu
bụ l'ọnwu.
13 Je akpachakpọnu l'achị
ọchi bẹ aahajẹkwaru
tsua ọkpoma pharamu;
tẹme ẹhu nọdu ahajẹru
tsọo ụtso tsọba l'iphe-ẹhuka.
14 Onye ekwetadụru nụ
bẹ aa-pfụ ụgwo ụzo,
ooshi pfụ-dzua ya ya
apfụ-dzu.
L'e bua onye ọma obunggo
ụzo nkiya l'o dzua
edzudzu.
15 Onye amazidu iphe atụkoje
iphemiphe kweta
l'onoo g'ọ dụ.
Obenu l'onye nweru
egomunggo arịjeada ọriri
tẹme l'ọ zọbe ọkpa.
16 Onye maru iphe atsụhuje
Chipfu ebvu jịka eme
ẹjo-ememe.
Obenu l'ọmata edeghajẹru
igiji ẹka dobesụ l'ọ tọ
dụdu iphe,
byaru eme iya nụ.
17 Onye obu-ọku emeje iphe,
onye-eswe onye-eswe.
Tẹme a nọdu akpọje onye
ẹregede ashị.
18 Onye amazidu iphe bẹ okiphe
iya abụjeru eme eswe.
Obenu l'onye nweru
egomunggo ekpujeru
mmamiphe g'okpu-eze.
19 Ndu eme ẹjo-ememe e-phoze
l'iphu ndu dụ ree;
ndu ẹjo-iphe ephoze
l'ọnu-ọguzo ndu
pfụberekoto.
20 Ndu akpa nri bẹ aakpọje ashị;
kpọchaa kpọo lẹ ndu ẹphe
l'ẹphe bu obutobu.
Obenu lẹ ndu nweru iphe
nweru ikpoto ọ̀nyà.
21 Onye agụbeduru obutobu iya
iphe emekwa iphe-ẹji.
Obenu l'a gọru ẹhu-ụtso nụ
onye emejeru onye ọ
tsụru iphe-ọma.
22 ?Tọbudu ndu achị ẹjo idzu
ephuje ụzo?
Obenu lẹ ndu achị idzu-ọma
bẹ eeyeje obu;
tẹme a nọdu emejeru phẹ
ire-lanụ.
23 Iphe, bụkpoo ozi, e jeshiru
ike bẹ urwu adụjekwa.
Obenu opfu, eepfuẹpho
l'ọnu l'ọnu emeje g'a
kpaahaa nri.
24 Ẹku onye maru iphe bụ
okpu-eze iya.
Obenu l'eme eswe k'ọmata bụ
iphe, ọomitaje bụ eme eswe.
25 A -gbaa ekebe, bụ ire-lanụ bẹ
aadzọje ndzụ.
Obenu l'ekebe, aagba ọphu
e pfudu ire-lanụ bẹ
bụkwa ụghoshi.
26 Onye atsụ Chipfu ebvu bẹ ẹka
ọ dakoberu kpọru akpaa.
Tẹme ọ bụwaruro ẹka ụnwu
iya a-gbabajẹ je anọdu
zee ndzụ.
27 Atsụ Chipfu ebvu bụ ẹka
mini,
emeje g'anọdu ndzụ futaru;
ọ nọdu emeje g'amadụ
ta anmalahụ l'ọ́nyà,
anwụhu gbabẹru.
28 Ọha, tsụru ẹrupfu abụjeru
akpabiri eze.
Obenu l'oke amadụ,
enwedu nemadzụ bẹ
iyi yifuru.
29 Onye nweru ọta-nshi bẹ
iphe, edoje iya ẹnya
pakwarụ ẹka.
Obenu l'onye obu-ọku egoshije
g'oomebe eswe.
30 Onye doberu ọkpoma
guu emeje gẹ ndzụ
dụ ogwẹhu.
Obenu l'ijiẹnya emeje g'ọkpu,
nọ l'ẹhu repyahụ.
31 Onye eme onye ụkpa ewere
bụkwa Chileke,
meru iya nụ bẹ ookwe une.
Obenu l'onye emejeru onye
adụdu g'ọ dụ iya
iphe-ọma bụ Chileke bẹ
ọokwabe ùbvù.
32 Iphe, l'enwutajẹ ndu ẹjo-iphe
tụa kpurumu l'alị;
bụ ẹjo-iphe ono,
ẹphe eme ono.
Obenu lẹ ndu pfụberekoto
nweru ẹka ẹphe
a-nọdu zeeru ndzụ
m'obeta ẹphe
nwụhuchakpoo anwụhu.
33 Mmamiphe adụje l'iphe,
bụkpoo obu ndu iphe
edoje ẹnya ree.
Mbụ je akpaa l'echilabọ
ndu bụ ọmata bẹ
oogoshijekwaphọ onwiya.
34 Apfụbekoto ekutse ọha l'ophu.
Obenu l'iphe-ẹji bụ iphe-iphere
l'ẹhu ọhamoha.
35 Onye-ozi, maru iphe bẹ
atụbaje onye eze l'ẹnya.
Obenu l'onye-ozi ọphu bụ
iphe-iphere bẹ eze
atukoshije
ẹhu-eghu iya.