17
1 Ọ kakwa mma l'a
takpọerupho nwẹcha,
kpọhuru nkụ;
nchị dụkwanu doo l'unuphu;
eme l'unuphu,
eegbushi anụ gẹ ndu
abọ iphe;
opfu nọdu adaphekwanu
iya.
2 Onye-ozi, maru iphe bẹ
l'e-mechaa bụru ishi nwa
nnajịuphu iya;
mbụ nwa ọphu anọduje eme
iphe-iphere ekpu ndu nwụru
iya nụ.
Ooje l'emecha keta iphe nnajịuphu
g'ụnwu iya ketarụ.
3 Ite bẹ e gude eghe
mkpọla-ọchaa egheghe.
E gude ọku ahụ̀
mkpọla-ododo ama.
Obenu l'ọo Chipfu bụ onye
ahụje obu amadụ ama.
4 Onye eme ẹjo-ememe angabẹje
nchị l'ogbogboromọnu,
epfu ẹjo epfupfu.
Onye adzụje ụka nọdu
angabẹje nchị l'ire,
epfu tuphutuphutuphu.
5 Onye achị onye ụkpa ọchi;
bụkwa Chileke,
meru iya nụ bẹ ọoko ọnu.
Onye ete ẹswa ekpu eze
iphe-ẹhuka, byaru nwibe
iya bẹ ta adụkwa g'e meru
g'a ta hụ̀ iya ahụ̀hù iya.
6 Enweru ụnwu nwanwa bẹ bụ
okpu-eze,
e kpuberu onye-ishi-ẹwó.
Tẹme nna bụkwanuru iphe,
ụnwegirima gude
eku onwophẹ.
7 Onye egomunggo swehuru te
epfujedu opfu,
nweru ishi.
Nokwaphọ g'onye bụ ishi
agbadụru g'ọ tụ-phuje ire.
8 Ụphalazu dụ gẹ mkpuma,
vu oke aswa l'ẹhu onye
anụje iya nụ; k'ọphu bụ:
ọ -ghaa ẹkiya-a bụ ụpete;
ọ -ghaa ẹkiya-a bụ ụpete.
9 Onye agụje nvụ l'atụpya,
a tụpyaru iya bụ n-yemobu
bẹ ookutse.
Obenu l'onye akpatsu opfu
akpatsu bụ ndu eeshishi
ọ̀nyà ike bẹ oobukahụje.
10 A -baarụ onye iphe edoje
ẹnya ree mba bẹ
oorwuje iya l'ẹhu;
eme l'ọnu ẹchachi ụkporo
ise, e chiru ọmata.
11 Onye ẹjo-ememe bụepho
iphe, oophubeje iphu
ememe bụ eme iphe,
a sụru g'o to meshi.
Ọle onye-ozi, ta aphụjedu
obu-imemini e-mechakwanaa
bya ahụ̀a ya ahụ̀hù.
12 Ọ kakwa mma lẹ ne oduma,
a kụtaru ụnwu iya fụru
ngu l'ụzo;
eme l'i jepfuru ọmata l'ẹka
oome eswe eswe.
13 Ọ -bụru lẹ nemadzụ gude
ẹjo-iphe pfụa ụgwo iphe-ọma,
e meru iya bẹ ẹjo-iphe ta
abyakpọdaa abvụ abvụbvu
l'ibe iya.
14 Awata aba mba dụ g'egbuha
nggele, e gbuchiru
egbuchi.
Ọo ya bụ lẹ-a; haa opfu tẹme
ụswo abata iya.
15 Aharụ onye ẹjo-iphe enge;
yẹe anma onye
pfụberekoto ikpe
tụkokwaru bụru eme ẹbyi
l'iphu Chipfu.
16 ?Bụ urwu gụnu bẹ okpoga
barụ l'ẹka onye bụ ọmata;
eshinu mmamiphe ta
agụdu iya agụgu?
17 Ndu eshi ọ̀nyà eyeje
nwibe phẹ obu
mkpụrumkpuru.
Tẹme nwune bụru iphe,
e swiberu ngu iya bụ g'ọ
gbajẹru ngu mkpu teke
iije iphe-ẹhuka.
18 Onye enwedu egomunggo
anajẹ nwibe iya
mkpalẹka;
bya eworu onwiya sụbe
l'itumo.
19 Onye yeru aswọ ụswo obu
bụkwa iphe-ẹji bẹ o
yeru obu.
Onye wolinụkaru egomunggo
iya imeli bụru
ọla-l'iswi bẹ oole ẹnya iya.
20 Onye ọkpoma dụ ẹji bẹ k'ọma
ta abyajẹkwaru.
Onye ire iya bụ ụgho jiru
iya nọdu adabajẹ
l'iphe-ẹhuka.
21 Onye nwụtaru nwa nwoke;
ọ bụru ọmata bẹ aphụ
tsọkwaru.
Ọphu ẹhu atsọjedu nna,
egomunggo swehuru
nwa iya ụtso.
22 Obu, atsọ ụtso bụ ọkpobe
ọbvu.
Obenu l'obu agbabuhu emeje
g'ọkpu kpọhu nkụ.
23 Onye ẹjo-iphe anatajẹ
ụphalazu lẹ mpya;
k'ọphu oo-me g'iphe,
pfụru ọto dụ nggọdogo
nggọdogo.
24 Onye iphe edoje ẹnya ree
bụ mmamiphe bẹ oodobeje
l'egomunggo.
Obenu l'ọmata bẹ ẹnya iya
ejerwuje ẹka igwe beru
alị beru.
25 Ọmata abụjeru aphụ tsọru
nna iya; bya abụru iphe,
atsọ ilu l'ẹhu nwanyị,
nwụru iya nụ.
26 Ọ tọ dụkwa ree ere onye
adụdu iphe,
o meru nre.
Ọphu ọ dụkwapho ree g'e
chia ndu-ishi iphe
l'ẹphe meru iphe,
pfụru ọto.
27 Onye nweru egomunggo
epfuje opfu zee ọnu.
Tẹme onye obu-àgù bụru
onye iphe edoje ẹnya.
28 Je akpaa l'onye eme eswe
bẹ eedobesụjekwa l'ọ
maru iphe mẹ ọ -bụru
l'ọ nọ nwa
nggujingguji.
Tẹme a nọdu edobesụje l'ọ bụ
onye iphe edoje ẹnya ree
mẹ ọ -bụru l'oosedeje
ire iya.