66
Ebvu-ọma, e deru nụ
onye-ishi ebvu
onye-ishi ebvu
1 Unu tụa ụzu ẹhu-ụtso gude jaa
Chileke;
unubẹ ụnwu-eliphe l'ophu!
2 Unu gụa ebvu gude kutsee
ẹpha iya!
Unu etua ya ẹpha; jaa ya
ajaja!
3 Unu sụ Chileke: “Ha!
Iphemiphe, ịinoduje
eme dụkwa ebvu!
Ike ngu parụ ẹka k'ọphu bụ lẹ
ndu ọhogu ngu adajẹ
kpurumu l'iphu ngu;
ẹka ndzụ agụ phẹ.
4 Ndiphe mgburugburu adajẹ
kpurumu l'iphu ngu baarụ
ngu ẹja; gụa ebvu nụ ngu;
mbụ l'ẹphe agụje ebvu
gude kutsee ẹpha ngu.”
5 Unu byanụ ahụma ozi,
Chileke jeru!
Chileke dụkwa ebvu l'iphe,
oomeru ụnwu-eliphe.
6 Onye meru ẹnyimu;
ọ bụru alị, kpọhuru nkụ.
Ẹphe gude ọkpa ghaa ẹnyimu
ono.
Ẹhu-ụtso ozi, o jeru tsọru
anyi teke anyi nọ l'ẹka ono.
7 O gude ike ọkpu nkiya bụru
eze ojejoje.
Ẹnya iya nọdu ahụmakotaje
ọhamoha!
Ọo ya bụ g'ọ tọ dụkwa ndu
ẹjo ọkpoma ono l'e-je
iya atụpya!
8 Unu tua Chileke anyi ẹpha;
unubẹ ụnwu-eliphe!
G'a nụmanu ajaja, unu a-ja iya!
9 L'ọo ya doberu anyi ndzụ;
bya emee g'ọkpa ngụru
anyi angụru g'o to chifu.
10 Noo kẹle gụbe Chileke
hụwaru anyi ama;
bya emee anyi; anyi dụ ree
gẹ mkpọla-ọchaa, a hụru l'ọku.
11 I dutaru anyi duru ye
l'ọ́nyà;
bya eworu oke ivu tukobe
anyi l'okpurukpu.
12 I meru g'ụnwu-eliphe wee
anyi ishi kperekpere.
Anyi jeru iphe, anwụ chiru anyi;
mini nmaa anyi.
Ọle i mechaarụ duta anyi bya
edobe l'ẹka anyi tụsaru ẹhu.
13 Mu e-gude
ngwẹja-akpọ-ọku je
l'ụlo ngu.
Mu emedzukọtaru ngu iphe,
mu rifuru angụ lẹ mu
e-meru ngu.
14 Mbụ iphe, mu gude
ogbogboromọnu mu
kweta;
bya egude ọnu mu pfua
lẹ mu e-meru ngu;
teke mu eje iphe-ẹhuka.
15 Mu a-kpụta ebili, tsụru ẹba
je egude gweeru ngu
ngwẹja-akpọ-ọku.
Mu egbuaru ngu oke-eswi;
gbushiaru ngu eghu.
16 Unu byakpọdapho bya
angabẹ nchị; iphe,
bụkpoo unubẹ ndu atsụ
Chileke ebvu;
gẹ mu kọoru unu iphe, o
meru lẹ ndzụ mu.
17 Mu gude ọnu mu ọwa-a
raku iya.
Mu gude ire mu tua ya ẹpha.
18 Ọme mu meru iphe-ẹji kwachia
l'obu mu;
mẹ Nnajịuphu tege
angabẹkwa nchị anụma
olu mu.
19 Obenu lẹ Chileke ngabẹru
nchị;
nụma olu mu ọkpobe anụma
teke mu epfu anụ iya.
20 G'e tukwaa Chileke ẹpha;
mbụ onye ajịkaduru
angabe nchị nụma epfupfu,
mu epfu anụ iya;
tẹme ọphu ọ hadụru egoshi
lẹ ya yeru mu obu.