140
Ebvu-ọma, Dévidi deru
nụ onye-ishi ebvu
nụ onye-ishi ebvu
1 Nafụtanu mu l'ẹka ndu
ẹjo-iphe jiko Chipfu.
Letanụ mu ẹnya gẹ mu
ta adaba l'ẹka ndu emeje
nemadzụ mkpawere.
2 Ndu bụepho ẹjo-iphe bẹ ẹphe
anọduje achị idzu iya
l'ime obu phẹ;
bya abụerupho ọgu bẹ ẹphe
anọduje akpali
mbọku-mbọku.
3 Ire phẹ bẹ ẹphe emeje
l'ọotsu nkọ g'ire ẹjo agwọ.
Opfu, eshije phẹ l'ọnu nọdu
egbu egbugbu g'ẹru ogiji.
4 Gudeshinaa mu jiko Chipfu;
gẹ mu ta adaba l'ẹka
ndu ẹjo-iphe.
Phufunu mu l'ẹka ndu emeje
nemadzụ mkpawere;
mbụ ndu achọ ụzo,
ẹphe e-shi chikota mu ọkpa!
5 Ndu eku onwophẹ
gbabẹwaru mu ọ́nyà.
Ẹphe gebecharu ụgbu
phẹ kwabẹru mu;
bya atụa igbudu dokaa l'iphe,
bụkpoo ụzo, mu eshi eshishi.
6 Gụbe Chipfu; iphe,
mu epfuje bụ l'ọo ngu
bụ Chileke mu.
Jiko Chipfu; nụmanu mkpu
ono, mu echi sụ g'i
menaarụ mu eze-iphe-ọma ono.
7 Gụbe Chipfu, bụ Nnajịuphu
anyi;
gụbe onye ike dụ;
bya abụru onye adzọje
mu nụ;
gụbe onye egbobutajẹ
ishi mu mẹ a -nọdu alwụ ọgu;
8 be mekwarụ ndu ẹjo-iphe
iphe ono, agụ phẹ nụ ono;
jiko Chipfu.
B'ekwekwa g'ìdzù, ẹphe achị
jee g'ẹphe achị iya.
Ọdumeka bẹ ẹphe a-watakwa
eku onwophẹ.
9 G'iphe, e-rikpute ndu ono,
kepheru mu
mgburugburu ono
ishi bụkwaru iphe-ẹhuka,
ẹphe gude ire phẹ
kpatarụ onwophẹ.
10 G'icheku-ọku, ata pfụpfupfu
bụkwaru iphe, aa-zụbe
phẹ l'ishi.
G'a pakwarụ phẹ chie echie
l'ọku, enwu
phoophoophoo;
mbụ l'ime nsụ,
ẹphe ta abyadụ afụtaba afụta.
11 Gẹ ndu njọ-opfu ta
angụkwaru angụru l'alị-a.
G'ẹjo-iphe chịkwa nta ndu
mkpawere ono.
12 Mu maru-a lẹ Chipfu ahajẹru
onye ụkpa enge;
tẹme ọ nọdu emeje g'ikpe
kalẹru onye adụdu g'ọ
dụ iya.
13 Gẹ mu gbukwaa ya tororo;
ndu pfụberekoto e-kelekwa
ngu ekele;
tẹme ọ bụru l'iphu ngu bẹ
ndu obu phẹ gụru ìphóró
e-buru eburu.