5
Ọnu nwoke yẹe
nwanyị ono eye
nwanyị ono eye
1 Gụbe nwanyị, mu lụru k'ọ̀phúú;
bya abụru nwune mu;
mu bataakwaru lẹ mgbabu
mu ono.
Mu hekọakwaru ụ̀nwù
mẹru mu;
mẹwaro ụ̀nwù ọzo,
eshigbaa kwẹekweekwee.
Mu riakwaru manụ-ẹnwu
mu; yẹe ẹbakala iya.
Mẹe mu; yẹe mini ẹra-eswi
mu bẹ mu ngụakwaru.
Unu ria ngụa;
unubẹ ndu ọ̀nyà!
Unu ngụa ngụta ike unu;
unubẹ ndu yeru
onwunu obu!
2 Mu eku mgbẹnya;
obenu l'obu mu
nwụ ẹnya.
Ngabẹkpodapho!
Ọ kwa onye mu yeru
obu akụ ẹka lẹ mgbo sụ:
“Gụharu mu ụzo;
gụbe onye dụ mu l'obu;
bya abụru nwune mu;
gụbe onye bụ
nwando-nwẹnu mu;
bya abụru onye nkemu,
ntụcha adụdu l'ẹhu!
Kẹle iji dawarụ kpua mu;
ishi dụwaa mu
minimini.
Ẹgbushi mu bẹ iji ẹnyashi
meakwaru;
ọ bụkotaru mini.”
Ọnu, nwanyị ono eye
3 Mu yefuakwaru uwe mu.
?Bụ gẹ mu gbẹ nta-a yephu
iya azụ ọzo tọo?
Ọkpa bẹ mu kwọwaru
akwọkwo.
?Bụ gẹ mu gbẹ nta-a zọbe iya
l'alị ọzo tọo?
4 Onye ono, mu yeru obu
ono bya epyoo ẹka lẹ
mgbaka mgbo.
Ẹhu meẹ mu phọ yẹreketeke.
5 Mu zilihu gẹ mu gụhaaru
onye mu yeru obu ụzo;
bya emeta manụ mẹru
nyịa;
ọ nọdu anwụkota mu
shọkoshoko lẹ
mkpụshi-ẹka;
gẹ mu zụru ẹka l'iphe,
eegudeje agụha mgbo
ono.
6 Mu bya agụhaaru onye mu
yeru obu ụzo;
ọphu ọ nọedu iya;
ọ tụgbuwa.
Atụgbu iya ono mee;
meji tọfu mu.
Mu chọo ya nta chọo imo;
ọphu mu achọ-vuduru iya.
Mu kua ya nta kua imo;
ọphu mu ekuvuduru iya.
7 Ndu nche ẹnyashi hụma
mu teke ẹphe tsoru
ọma-mkpụkpu
ejephe agbaphe ụzo.
Ẹphe chia mu iphe;
chibashicha mu ọ́nyá;
tọtachaa mu ukpo,
mu gbaphuru onwomu;
mbụ ndu nche igbulọ
mkpụkpu ono.
8 Unubẹ ụnwada Jierúsalẹmu;
unu kwee mu ukwe
l'unu -hụma onye ono,
mu yeru obu ono bẹ
unu e-zi iya l'oghoroko
iya egbukwa mu
egbugbu.
Ọnu ụnwada Jierúsalẹmu eye
9 ?Bụ gụnu bẹ onye ọbu,
i yeru obu ọbu gude
ka ndu ọzo,
e yeru obu mma?
Gụbe nwanyị ọphu
mma nkengu
kapyabẹkotaru kẹ
ndu ọzo;
kaẹshịduru anyi g'onye
i yeru obu ọbu gude
ka ndu ọzo ama mma;
meru g'o gude ị
nọdu arwọ anyi ẹgube
arwọrwo ono.
10 Onye ono, mu yeru obu ono
nwukwaru kẹ pfụu;
bya egbu nwịinwii.
L'echilabọ ụnubuku
nemadzụ bẹ yẹbedua
agbajẹepho iche.
11 Ishi iya dụ g'ọkpobe
mkpọla-ododo.
Ẹgbushi iya tụko dụchaa kẹ
nwa wụyawuya;
bya ejiẹpho hirihiri
g'okpoko-ọ́hà.
12 Ẹnya iya dụ g'ẹnya ndo-nwẹnu,
beru l'agụga nggele.
Mbụ l'o doru rịsaa g'a sarụ
iya l'ẹra-eswi.
Ọ nọdugbaa lẹ nhamụnha iya.
13 Agbagba nchị iya ẹphenebo
dụepho g'igbo,
a dzashịru iphe,
anọduje eshi
kwẹekweekwee.
Ogbogboromọnu iya dụ
g'ojimbvu,
asọshi manụ mẹru.
14 Oshi-ẹka iya dụ gẹ mgbọro
mkpọla-ododo,
e gude kìrísòlàyìtù mee;
ọ dụ ùbvù l'ẹnya.
Ẹhu iya nọdu akwọ kẹ
bụruburu g'eze-enyi,
e hucharụ ehucha;
bya egude mkpuma,
vu oke-aswa;
mbụ safayịru mee ya;
ọ dụ ùbvù l'ẹnya.
15 Oshi-ọkpa iya pfụru kẹ rọo
g'òbvúrú mkpuma-egbe;
mbụ ọphu a pfụberu lẹ
ntọlali mkpọla-ododo.
Ụgbugba ẹhu iya nọepho
kẹ gbọmugbomu
g'úbvú úbvú Lébanọnu;
mbụ l'ọomaepho g'oshi
sida, nọ iya nụ.
16 Olu-opfu iya anọduje
atsọ gẹ manụ-ẹnwu.
Ọ bụepho l'ọoma mma
amagharu iya ẹka.
Unubẹ ụnwada Jierúsalẹmu;
ọ kwa g'ọ gbaru bụ ono;
mbụ onye ono,
yeru mu obu ono;
bya abụru ọ̀nyà mu ono.