1 Oko toki famibaha te ni ya okomatasibana oke. Teoso ka yama hani ati e te amake ahi: "Te ka owa ohari ati yana ne owa yama hiyara hiri nemona ati ne ati te nofarabone teke. Me fami ya me fama me terei ni ya me terei, toha na yama me awahamone me ati na me ati ta te nofahabone teke", ati ke. 2-3 Okibaha owati kitaharo ama oke te ni ya, te narabo nima ona owa. Manakobote yama yabo ya ohaha te narabo nima otasine oke, owati e na owa ahi: Yama onamoabone te ati na te awineke, Kirisito ati okominahamone ona owa te ni ya. Makoni owati kitahabone oke te ka one me ni ya, yama hiyara me hiri na mati. Owati kita nabone oke te nafi ni ya. Kirisito kitareba watatere amaka. Kitaka te baikani ya. 4 Kirisito kitare ahabematamonaka, wanahari awa ya. Manakobote yati namaka Teoso kiti ehene. Kirisito ka ohaha okita okere. Kirisito yati namehi ya ofama tera onarifahabone oke, Teoso kiti ehene.

5 Tera te totomi nahi, tera te watohaba te. Kirisito ati te nofini? Ati te nofare awa? Yama te watorini, Kirisito Sesowi sawi ka yama te ni ya? Ati te nofasa ne ya sawi awaka te ni ya. 6 Owehene nofaka, hiri onaharo. Owehene te watohabone onahara oke. 7 Tera ha okana oke, yama hiyara te hiri rabone te. Teoso yama hinofara hiri onahamone me ati na hine me nake. Yama amosa te hiri nabone onahara oke. 8 Teoso ka yama ahi ni fawa orahabone oke, Teoso ati yokana okomina owa. 9 Okita okere ha owa. Te kitake ha te ta. Makoni yayai one oke. Tera ha okine oke, Teoso yama hinofa ta te hiri namatasabone te. 10 Te ni ya osawira owati kitake, owati boti e na owa ahi: "Me ihi hiyara me ihi me nofamari ya me ni ya okomi ya owati kitarabone oke osawia owa me ni ya", owati boti ati ke. E ka Hiti ati ehene tera onarifahabone oke. Ati ehene tera onarifa tera onahabiharabone ati nareka.

11 Yama hani ahabakibone. Te yayai nahi. Teoso yama hinofa te hiri namatasabone teke. Owati te mitahi. Fai hinama te ati boti tohahi. Te abe kakoriyahi. Teoso e kokoriri ni fawa nihi te ya tabehibonaka, era nofahari. 12 Te abe noko bako kokomi nakehi, Teoso ka me te tohaha te. 13 Sesowi nonofa tera me nofahamone me ati narake, me nafi.

14 E ka Hiti Sesowi Kirisito yahehibonaka te ni ya. Teoso tera nofehibona teke. Teoso Kanamori te ya tabehibonaka, te nafi.