1 Makoni Teoso ha one oke, ha owa Baoro owa, tera ha okana owa. Ofoya oke kateya tori ya, Kirisito Sesowi okomini karo te ni ya, bara me te tohaha te. 2 Otamine te mita te awineke, Teoso owa yosehimona owa, yahahari, tera okanawanabone owa. 3-6 Owa kanawane ka yama owatowahamaro oke, me hiwatorehemete hibati ya, e naro ahi: Hiyara amosa e nofi ya Kirisito Sesowi ya e tabawamaba eke, Ihayeo me toha, Ihayeo me amara me toha, na me e. Kirisito e tabaha e ohariwahake, Ihayeo me toha, Ihayeo me amara me toha, na e. Kirisito ya e tabaha Teoso era kakawebonaka, yama ta hinahabone hinehemete ya Ihayeo me ni ya. Afa yama ya Teoso owa kanawanehimarika, me hiwatorehemete. Haha kote nafira okominahara oke haha yama hani ya. Oko yama hani te ki na owa te watohaba te awineke, afa yama owatoa owa, Kirisito ka yama. Afa yama me watoremetemoneke, Teoso mera kanawanare karo mata. Manakobisa Teoso hinamowaha hike Kanamori ya hinaka yoyose me ni ya, he ati kakamina me ya me taba mati.

7 Teoso yahe ka owa ha nemari amaka, onarifehibonaha, ati yati okominehibona ati nari, kitahari owa ni ya. 8 Ha owa otamina okere. Me one ta amosa me awineke, Teoso ka me nafi. Otaminara Teoso yahe owa ha nemari amaka, hiyara amosa okominahabone owa bara me ni ya, Kirisito tamine. Kirisito tamine amosaka kasiro ya, amosi watohinarari. 9 Teoso yama nafi hiri nemata ati ehene me nafi okanawanine oke, yama wato yokana me tohahabone mati, yama hikaminaremete hibati ya. 10-11 Hibati ya yama watari ya mata ati e nematamonaka ahi: Haha yama ya Kirisito ka mera namohibona ati nematamonaka he nanarifa me ya inamati me tabaha me ni ya, neme enoki ka mati, yama wato mati tohehimona me ati nabone mati. Afa yama nafi hawa tohake waha, e ka Hiti Kirisito Sesowi yama hiri hina ihi, Teoso ati ehene. 12 Kirisito ka me e tohi ka Teoso ni ya e tokomakeke waha ayata ya, e nakomerari, era tohirebona e ati ne kari, Kirisito ati e nofi karo. 13 Makoni te yawarabone teke owehene, ofoya owa kateya ya. Ofoyine oke kateya ya, Teoso yama amosa hiri nabona karo te ni ya. Te yayai nabone onahara oke owehene.

14 Makoni owisi yobati ya owa e ka abi ha one oke, tera ha okana owa, 15 e ka abi me nafi hiri nemata, bofe ka me toha, neme ka me toha na mati. 16 Amosi mati tohahi tera nakitebona onahara oke Kanamori ya, te ati boti kitahabone te. 17 Kirisito winehibonaka te boti ya, ati te nofe kari. Teoso te nofa, te abe nofa, nabone teke, Teoso ati nofi te fawa rabone te, te kitaha te. Makoni tera ha okana oke, 18 Kirisito wato yokana te tohahabone te, tera nofahari kasiro ya. Teoso ka me nafi toha naboneke. Kirisito era nofi yowe ka yama tomi kanihinakere. 19 Kirisito era nofe ka yama te watohabone onahara oke, watohinararo. Owati e nofa ama oke tera ha okana owa, te ehene amosabone te, fare Teoso ehene nima.

20-21 Teoso amosemona me ati naboneke, Kirisito Sesowi ehene, Kirisito ka me toha, na me ihi. Me ati amosa fawa teraboneke, Teoso amosemona me ati na mati. Yama amosa ya era kakawaka, e aate nari. Yama e ati na he ni ya yama nanafi nama na ta ni watote amaka. E ati boti yama hikamina nanafi nama na ta ni watote amaka. Era kasomaka, kite kari. Ame.