4
Fara yama Teoso hinofa e nofi ya Teoso yahehibonaka e ni ya.
1 Himataba yama mowa ni kakete amari te ni ya? Te abe mowa nineke, fara te ka yamabone nofi te ohari karo. 2 Me ka yama aawawa tine tike. Me waka tite ama tike, me ka yama tihawahabone tiwa. Tiwa me kasawari ka yama mowa ni fawa tera amake, kakeharo te ni ya. Teoso te aate ri ka yama te kiharineke. 3 Teoso te aate ne tera kakaware awaka, fara te ka yamabone te aate na te, bofe ka yama. 4 Fanawi nima tine tike, maki amare ya famaharo. Teoso tinofa tikere, bofe ka yama ta tinofa tiwa. Teoso ka habai ama tikere. Teoso ka kakako ama tike. 5 Teoso ka yama hani ati tinahabihine tike, ati e naro ahi: Teoso Kanamori yosehareka e ni ya, winehibonaha e ati boti ya. Yama one e nofarabone Teoso Kanamori ati te amaka. 6 E ehene hiyara e nofamari ya Teoso yahehibonaka e ni ya mata ya. Teoso ka yama hani ati e te amake ahi:
"Fara era e kahiyara 'Otamina oke ha owa ta', e ati ni ya Teoso hamehibonaka e ni ya. Fara yama Teoso hinofa e nofi ya Teoso yahehibonaka e ni ya",
ati te amake. 7 Makoni Teoso ati te nofahabone teke. Satanaisi ati te nofarabone teke. Ati tinofare ya tokomebonaka. 8 Teoso ni ya tikamaki ya Teoso kamehiba amaka tiwa ni ya. Te yehe te soko nahi, te ka yama hiyara te nofamara te, yama hiyara hihiri me te. Tiwati boti tinamosahi, tiwati boti fama tiwa. Bofe ka yama tinofamarabone tike. Hine ya neme ka yama tinofabone tike, tiwati boti oharia tiwa. 9 Tihiyaramone tinahabone tike Teoso ni ya. Ohi tinahi kasiro ya. Haha tinamarabone tike. Yayai tinamarihi tinahabone tike. 10 Te ehene e ni ya Teoso tera kahiyarebonaka.
Tika owa Sesowi nofe tahi tirehibonaka.
11 Tika owa Sesowi nofe tahi tirehibonaka. Tiwehene e ni ya Teoso ka yama hani ati tahi tinahabone tike, hinaka yama hani ati nima tiwehene ra tiwa. E abe nofahabone Teoso ati nematamonaka, hinaka yama hani ya. Tika owa tinofara Teoso ka yama hani ati hiyaramone tina tiwa awineke. 12 Teoso sowisi tohate amaka, ohariari. Fare Teoso ohari yama hani hiri te amaka, ati ya era yosehari. Yama amosa wato, yama hiyara wato, te amaka, me hiri hinaharo. Mera kaminebonaka. Me one sawi ya me sawi naboneke, ati ehene. Me one ahabi ya me ahaba naboneke, ati ehene. Teoso sowisi tohate amaka. Sowisi tiha tikere, tika owa tikaminahaba tiwa.
Tera te kahiyararabone teke.
13-17 Tiwati hiyarabone tike, tiwati e ni ya ahi: "Hibayata ya ota tokahabone otake sitati one ya, yama ota ta nabone ota. Hibayata tohi ya toha, yama wamini tohi ya toha, naba awineke. Ota sawimatahaba ota awineke ano oharia ya, yama ota ta na ota. Yinero tamehi ota kihahaba ota amake", tina tiwa awine tike. Tiwati e ni ya tiwati hiyakere, tiwa tikahiyara tiwa. Yama wamini ka yamaba tiwato tikere. Tisawimatiba ka yama tiwato tikere. Hiba yama wa ni ka yama hote nima tine tike. Fawa te amake hibati ya. Tiwati e nabone tike ahi: "Yama ota hiri nabone otake, Teoso hinofi ya. Ota sawi nabone otake, ota sawi Teoso nofe ya", tinahabone tike. Yama tiwato tike. Tiwati e ri ya yama hiyara hiri tinahabone tike. Yama amosa e hiri naba e watoha afa yama amosa e hiri ri ya e ehene hiyarabone eke. Yama amosa tiwato tike.