10
1 Ota one mati, Ihayeo me kasomi owa oke kasiro ya. Me ha okine oke Teoso ni ya. 2 Me ka yama ahi ni nafike, Teoso yama hinofamone me hiri na mati, Teoso yama hinofa me watora mati. 3 Teoso ehene amose me watora me ati e te me amake ahi: "Fare Mowisei ati nima e ehene nabone eke, e ehene amosabone e, Teoso ka me e tohahabone e", me ati te me amake, Teoso ka hawi yokana me nofara mati. 4 Mowisei ka yama hani Teoso ta nematamonaka, Kirisito kaminebonaha. Kirisito ati e nafi nofahabone Teoso ati te amaka, Teoso ka me e tohawahabone e.
5 Mowisei ati e nematamonaka ahi:
"Efe ati nima tiwehene ni ya tisawiabone tike Teoso ni ya",
ati nematamonaka. Ati e ne ati nima e ehene ni ya e amosabone ati nematamonaka Teoso ni ya. 6 Teoso ati e nofahabone Teoso ati nematamonaka, e amosabone e Teoso ni ya. Mowisei ati owa amaka hari:
"Te ati boti e rabone teke ahi: 'Hike tokehiba amara neme ya (Kirisito kakisamehibana)?' te ati rabone teke",
ati nematamonaka. 7 Mowisei ati owa amaka hari tasa:
"Hibake tokiseba amara e abohi taboro ya (Kirisito kakimisamebana)?"
ati nematamonaka. 8 Mowisei ati owa te mitahi, ati e nari ahi:
"Teoso ati tohaba kara te ni karo. Teoso ati sawika te inohoti ya. Ati sawi naka te ati boti ya",
ati nematamonaka. Mowisei ati e ne Teoso ati yati ota kamine kaminematamonaka. Kirisito ati e nofahabone Teoso ati nemona ota ati te ota amake. 9 "Tika Hiti Sesowi tohehimona tini ya, Teoso hiri hiname yati namehimona tina tini ya tiwati boti ya, Teoso tiwa kasomebonaka", ota ati te ota amake me nafi ni ya. 10 E ati boti e na Teoso hinaka me era tonihebonaka. E ati e na Teoso era kasomebonaka. 11 Teoso ka yama hani ati e te amake ahi:
"Haha he ati me nofaha me kokoma niba wataraba me amake",
ati ke. 12 E nafi ka Hiti oharika, soteo me toha, bara me toha, na me e. Me aate hine mera kakawaka yama amosabote ya, me nafi. 13 Teoso ka yama hani ati e te amake ahi:
"E ka Hiti haha me aate hine mera kasomebonaka, me nafi",
ati ke.
14 Himata nima aate ni me hiraba, ati me hinofarahari? Himata nima ati nofi me hiraba, tamine me himitarahari? Himata nima tamine miti me hiraba, me hikaminare ya me ni ya? 15 Himata nima kamini me hiraba, me me yoseri ya? Teoso ka yama hani ati e te amake ahi:
"E yayai nabone e ke, me kobo nake hiyara amosa me kamini ya",
ati ke. 16 Ihayeo me nafi amararake, ota ati me nofaha mati, hiyara amosa ota kamina ota. Isaiya ati e nematamonaka ahi:
"Ota ka Hiti, me ota hiyara ota ati me nofakere",
ati nematamonaka. 17 E one Kirisito tamine me kamina me ati e mita Teoso ati e nofawate e amake. 18 Yama me mitara me awine? Yama me mitaharake. Teoso ka yama hani ati e te amake ahi:
"Tabora nafi ka me ati me mitaharake",
ati ke. 19 Ihayeo Teoso ati me watora me awineni? Mowisei ati e nematamonaka ahi baha:
"Hibati ya bara oko me toharamaroke. Oko me onihawaha me ihi te yawahabone onahara oke, fara me nima te nabone te ati na te. Yama me watoramone te ati na te yawahabone teke owehene te awi ya",
ati nematamonaka. 20 Isaiya ati yana nematamonaka, habo bayihari, ati e nari ahi:
"Owa me siba ra owa me wasiharake. Owini me hiri ra owa onamoara oke me ni ya",
ati nematamonaka. 21 Isaiya ati e nematamonaka ahi, Ihayeo me ta mera kaminari:
"Fara yama we nima omano ta tokanara oke me ni ya, me ha ona owa, owati me nofara mati, me ha okene me ati ra mati, me kasiroa mati",
ati nematamonaka.