1 Aposolo to lasitêwai, taŋ sêŋgôŋ Judaia naŋ, sêŋô lau samuc sêkôc Anôtônê mêtê sa ŋawae. 2 Petere kêpi Jerusalem gêja, tec lau Juda ŋanô ŋagêdô sêsôm eŋ gebe 3 “Aôm kôpi lau samuc nêŋ andu to goeŋ gêŋ gôŋgôŋ gôwiŋ êsêacgoc.” 4 Tec Petere gêôc awa sa ma gêwa biŋ tau sa tomalageŋ gêdêŋ êsêac gebe

5 “Aê kateŋ mec gaŋgôŋ malac Jope e katuc kaiŋ teŋ kêsa ma galic gêŋ teŋ amboac obo kapôêŋ sêmoatiŋ ŋalêsu aclê tôŋ kêsêp aŋga undambê gêdêŋ aê gêmêŋ. 6 Aê gaôc kêniŋ e galic bôc nomŋa kaiŋ teŋ-kaiŋ teŋ, bôclai ma gêŋ kêkêŋŋa to moc umboŋ ŋalabuŋa. 7 Ma gaŋô awa teŋ kêsa gêdêŋ aê gebe ‘Petere, ôndi sa, ômbuc ma ôniŋ.’ 8 Go kasôm gebe ‘Apômtau, masigoc, gêŋ sec to alôb-alôb amboac tonaŋ aocsuŋ gêjam kauc samuc.’ 9 Go awa tau aŋga undambê gêjô aê aoc kêtu dim luagêc gebe ‘Gêŋ taŋ Anôtô kêmasaŋ kêtu selec naŋ, ômbu gebe alôb-alôb atom.’ 10 Gaŋô biŋ tonaŋ e kêtu dim têlêac, go gêŋ samob tonaŋ ŋai kêpi undambê gêja kêtiam. 11 Ma gaôgeŋ galic lau têlêac, taŋ sêsakiŋ aŋga Kaisarea dêdêŋ aê mêŋsêô lasê andu, taŋ gaŋgôŋ naŋ. 12 Ma Ŋalau Dabuŋ kêsôm gêdêŋ aê gebe ‘Ôwiŋ êsêac taêm ênam biŋ naêsanaêsa atom.’ Tec gawiŋ lasitêwai 6 tecenec e api ŋac tau nê andu. 13 Go Ŋac tau gêjac miŋ gêdêŋ aêac gebe gêlic aŋela teŋ kêkô ênê andu ma kêsôm gêdêŋ eŋ gebe ‘Ôsakiŋ lau sêna Jope ma sêkôc Simon, taŋ sêsam eŋ sebe Petere naŋ sêmêŋ. 14 Ŋac tau êsôm biŋ, taŋ ênam aôm to nêm gôlôac samob kêsi naŋ, êndêŋ aôm.’ 15 Aê gocgo gajac m ŋoc biŋ gamoa ma Ŋalau Dabuŋ kêpi êsêac amboac gêmuŋgeŋ kêpi aêac. 16 Tec aê taêc gêjam Apômtaunê biŋ, naŋ kêsôm gebe ‘Joaŋ kêsagu amac ŋa bu, mago amac oc aliŋ Ŋalau Dabuŋ êtu nêm saŋgu naŋ.’ 17 Êsêac sêkêŋ gêwiŋ Apômtau Jesu Kilisi e Anôtô kêmoasi ŋ êsêac amboac kêmoasiŋ aêacgeŋ. Ma aê asa gebe jakô Anôtô auc.” 18 Lau tau sêŋô biŋ tonaŋ e sêjam tauŋ tôŋ. Ac sêlambiŋ Anôtô ma sêsôm gebe “Anôtô gêjam lau samuc ôkwi, gebe sêŋgôŋ mateŋ jali sêwiŋ amboac tonaŋgeŋ.”

19 Sêjac Stepan su acgom, go gêŋwapac, taŋ kêdaguc naŋ, gêjam gôlôac saliŋ-saliŋ. Êsêac sêc sêjac laoc gamêŋgeŋ e jasêô lasê Poinike to Kupro ma Antiokia ma sêsôm mêtê gêdêŋ lau teŋ atom, sêsôm gêdêŋ Judawagageŋ. 20 Go nêŋ lau ŋagêdô dêdi aŋga Kupro to Kurene jasêô lasê Antiokia. Aŋga tonaŋ sêsôm Apômtau Jesu nê ŋawae ŋajam lasê gêdêŋ lau Helen gêwiŋ. 21 Apômtau lêma gêwiŋ êsêac e lau taêsam sêkêŋ gêwiŋ ma sêjam tauŋ ôkwi dêdêŋ Apômtau sêja.

22 Gôlôac dabuŋ Jerusalemŋa sêŋô biŋ, taŋ êsêac sêgôm naŋ, ŋawae ma sêsakiŋ Bamaba gêja Antiokia. 23 Kêsêlêŋ jagêô lasê e gêlic Anôtô kêmoasiŋ lau tonaŋ ŋanô, tec têtac ŋajam ma gêlêŋ biŋ êsêac samob gebe nêŋ ŋalêlôm taêŋ ênam Apômtaugeŋ ma sêsap eŋ tôŋ ŋapaŋ. 24 Eŋ tau ŋac ŋajam ma Ŋalau Dabuŋ gêjam eŋ auc to kêkêŋ gêwiŋ ŋajaŋa, tec gêjam lau taêsam ôkwi e sêkêŋ gêwiŋ Apômtau 25 Go Barnaba tau gêja Tarsus gebe ensom Saulu. 26 Eŋ jakêtap eŋ sa, go kêkôc eŋ gêja Antiokia. Ma êsêagêc sêŋgôŋ sêwiŋ gôlôac dabuŋ jala samuc teŋ ma têdôŋ lau taêsam. Aŋga Antiokia tonaŋ tec sêsam Apômtaunê ŋacseŋomi gebe lau Kilisiŋa kêtu ŋamataanô.

27 Gêdêŋ ŋasawa tonaŋ propete aŋga Jerusalem sêsêp Antiokia sêja. 28 Êsêacnêŋ teŋ, nê ŋaê Agaba, Ŋalau Dabuŋ kêkac eŋ, tec gêdi ma geoc biŋ tonec lasê gebe Tôbôm kapôêŋ êsa ênam ŋamalac samob nêŋ gamêŋ auc. Ma biŋ tau nanô kêsa gêdêŋ kaisara Klaudi nê têm. 29 Tec ŋacseŋomi sêsôm kêtu tôŋ gebe sênam lasitêwai, taŋ sêŋgôŋ Judaia naŋ sa. Êsêac samob êtôm ŋacanôgeŋ sêkêŋ êtôm awa, taŋ gêc êsêacŋa naŋ. 30 Sêgôm gêŋ tau su, go sêsakiŋ Barnaba agêc Saulu gebe nasêkêŋ awa tau êndêŋ laumata. *Judawaganêŋ biŋ têtu selecŋa ŋagêdô gêc Mat 15:2. Judawaga sêkêŋ gêwiŋ gebe gêŋ dêmoêŋa êtôm gebe êŋgôm nêŋ ŋalêlôm êtu sec, tec seŋ gêŋ paliŋ-paliŋgeŋ atom, seŋ gêŋ, taŋ Mosenê biŋsu gêwa sa gebe gêŋ selec naŋgeŋ.