Amos
Propete Amos nê biŋ kêtu propete samob nêŋ biŋ ŋamataŋa, taŋ teto sa kêsêp buku teŋ tomalageŋ. Têna kêkôc eŋ aŋga malac Judaŋa teŋ, mago eŋ gêjam mêtê lau aŋga gamêŋ Israelŋa gêdêŋ jala 800 ma 700 gêmuŋ Kilisi gêmêŋ nomŋa ŋasawa. Gêdêŋ ŋasawa tonaŋ lau sêpô lêna gêŋ teŋ atom, sêmoa ŋajamgeŋ. Êsêac sêlic nêŋ om ma sêsaê gebe sêmoa towamageŋ. Mago Amos gêlic amboac teŋ. Eŋ kêsaê gebe lau tolêlômgeŋ sêmoa ŋajam ma êsêac sêmoa ŋajam ŋam kêsêp nêŋ sêmêtôc lau ŋalêlôm sawa kesogeŋ to nêŋ sêkôniŋ êsêacŋa. Lau sêlic om, tageŋ nêŋ ŋalêlôm gêwiŋ atom. Êsêac sêjam kauc gebe sêmoa towamageŋ, mago sêsau tauŋ. Tec Amos gêjam mêtê lau toôli palêgeŋ ma kêtêc tau atom. Eŋ kêsôm Anôtô êmêtôc lau ŋawae lasê. Eŋ kêjatu gebe Biŋgêdêŋ ŋalêŋ êsa êtôm bu keseleŋ ma kêsôm gebe Moae Apômtau taê walô nê launêŋ ŋagêdô, taŋ gacgeŋ sêmoa mateŋ jali naŋ (5:15).
1
Amosnê biŋ tau tonec. Eŋ gejobwaga dombaŋa nêŋ teŋ aŋga malac Tekoa. Ôjô gêjam atomgeŋ ma eŋ gêlic biŋ tau gêdêŋ Judanêŋ kiŋ Usia agêc Israelnêŋ kiŋ Joas latu Jerobeam nêŋ têm e ŋajala luagêc gêja, go ôjô gêjam. Ma eŋ kêsôm gebe
“Apômtau gêjam wambaŋ aŋga Sion
to kêkac awa sa aŋga Jerusalem
e gejobwaga dombaŋa nêŋ gamêŋ ŋagêgwaŋ kêsêlic
to lôc Karmel ŋatêpôê kêmêliŋ.”
Anôtô kêmêtôc lau Israel nêŋ lau jabaŋ êsêacŋa
Siria
Apômtau kêsôm biŋ tonec gebe
“Aê oc jawi Damaskusnêŋ keso têlêac me aclêŋa ŋagêjô siŋ atom,
gebe êsêac sêlêsa Gilead popoc to sêlêsu êsêac.
Amboac tonaŋ aê jakêŋ ja êniŋ Hasaelnê andu
ma êndaŋgac Benhadadnê andu kiŋŋa.
Aê gabe jatuc malac Damaskus ŋabalaŋ popoc
ma janseŋ lau Bikat Awenŋa
to ŋac, taŋ kêmêgôm tôc kiŋŋa gêŋgôŋ Bet-Eden naŋ su.
Ma lau Siriaŋa nasêŋgôŋ kapoacwalô aŋga Kir.”
Apômtaunê biŋ tau tonec.
Pilistia
Apômtau kêsôm biŋ tonec gebe
“Aê jawi Gasanêŋ keso têlêac me aclêŋa ŋagêjô siŋ atom,
gebe êsêac sêjaŋgo lau-m samuc teŋ su gebe sêkêŋ êsêac sêsêp lau Edom lemeŋ.
Amboac tonaŋ aê jakêŋ ja êniŋ Gasa ŋatuŋbôm
ma êndaŋgac ŋaandu kiŋŋa su.
Aê gabe janseŋ lau Asdodŋa
to ŋac, taŋ kêmêgôm tôc kiŋŋa gêŋgôŋ Askalon naŋ su.
Aê lemoc ejoŋ malac Ekron
e lau Pilisti nêŋ ŋapopoc sênaŋa.”
Apômtaunê biŋ tau tonec.
Tirus
Apômtau kêsôm biŋ tonec gebe
“Aê jawi Tirusnêŋ keso têlêac me aclêŋa ŋagêjô siŋ atom,
gebe êsêac sêkêŋ lau-m samuc teŋ sêsêp Edom lemeŋ
ma taêŋ gêjam poac lasitêwaiŋa atom.
10 Amboac tonaŋ aê jakêŋ ja êniŋ Tirus ŋatuŋbôm
ma êndaŋgac ŋaandu kiŋŋa su.”
Edom
11 Apômtau kêsôm biŋ tonec gebe
“Aê jawi Edomnê keso têlêac me aclêŋa ŋagêjô siŋ atom
gebe eŋ kêjanda lasi ŋa siŋ
ma kêtiŋ nê taê walô lauŋa su.
ma têtac ŋandaŋ ŋapaŋ
to têtac kêmoatiŋ tôŋ gedeŋ tôŋgeŋ.
12 Amboac tonaŋ aê jakêŋ ja êniŋ malac Teman
ma êndaŋgac malac Bosra ŋaandu kiŋŋa.”
Amon
13 Apômtau kêsôm biŋ tonec gebe
“Aê jawi lau Amon nêŋ keso têlêac me aclêŋa ŋagêjô siŋ atom,
gebe êsêac sêkac lauo, taŋ sêmoa teŋ naŋ, gêŋgic aŋga Gilead,
gebe sêŋgôm tauŋ nêŋ nom ŋamadiŋ êtu kapôêŋ.
14 Amboac tonaŋ jaŋgôm ja elom aŋga malac Rahab ŋatuŋbôm ŋalêlôm
ma êndaŋgac ŋaandu kiŋŋa
êndêŋ taŋ wali êtaŋ êndêŋ bêc siŋŋa
ma êndêŋ taŋ mu êmbuc êndêŋ bêc mulaiŋa.
15 Ma êsêacnêŋ kiŋ to nê kasêga samob sêwiŋ tauŋ
nasêŋgôŋ kapoacwalô aŋga gamêŋ jaêc.”
Apômtaunê biŋ tau tonec.