1 Sedekianê jala kêtu 21, go eŋ kêtu kiŋ. Eŋ gêjam gôliŋ jala 11 gêŋgôŋ Jerusalem. Eŋ têna Jeremia aŋga Libna latuo Hamutal. 2 Eŋ gêgôm geŋ, taŋ gêjac Apômtau mataanô ŋajam atom naŋ, kêtôm Jojakim gêgôm. 3 Gêŋ taŋ kêtap Jerusalem to Juda sa e Apômtau kêtiŋ êsêac su aŋga laŋônêmŋa naŋ, ŋam kêsêp Apômtaunê têtac ŋandaŋ.

Ma Sedekia gêli tau sa gêdêŋ kiŋ Babelŋa. 4 Sedekia gêjam gôliŋ jala 8 ma ajôŋ 10 ma ŋabêc 10 su, go kiŋ Babelŋa Nebukadnesar to nê siŋwaga samob sêô lasê Jerusalem gebe sênac siŋ. Êsêac sêgi Jerusalem auc ma sêmasaŋ gamêŋ to gêŋ siŋŋa ŋajaŋa ŋagêdô êtu sêku malac tau tuluŋa. 5 Amboac tonaŋ ŋacjo sêgi malac tau auc e kiŋ Sedekia nê jala gôliŋŋa kêtu 11. 6 Gêdêŋ jala tonaŋ ŋaajôŋ kêtu aclê ŋabêc 9 tôbôm gêjam sêga aŋga malac tau, tec lau tau nêŋ mo masi samucgeŋ. 7 Go ŋacjo têtuc malac ŋatuŋbôm ŋasawa teŋ popoc. Tec kiŋ Sedekia to nê siŋwaga samob sêlic ma sêc sêja. Êsêac sêwi malac tau siŋ gêdêŋ gêbêc sêsa sacgêdô, taŋ gêc tuŋbôm luagêc ŋasawa kêsi kiŋnê kôm sauŋŋa ma sepeŋ gamêŋ Arabageŋ sêja. Gêdêŋ tonaŋ lau Kaldeaŋa sêgi malac tau auc sêmoa. 8 Mago lau Kaldea nêŋ siŋwaga sêjanda kiŋ Sedekia e sê eŋ tôŋ aŋga gaboaŋ Jerikoŋa ma ênê siŋwaga samob sêwi eŋ siŋ ma sêc êliŋ-êliŋ. 9 Go sêkôc kiŋ tôŋ ma sejoŋ eŋ gêdêŋ kiŋ Babelŋa, taŋ gêŋgôŋ Ribla aŋga gamêŋ Hamat naŋ, sêja ma eŋ kêmêtôc Sedekia. 10-11 Kiŋ Babelŋa gêjac Sedekia latui êndu aŋga eŋ tau mataanô ma gêjac Judanêŋ lau towae samob êndu amboac tonaŋgeŋ aŋga Ribla. Ma kêsôm gêdêŋ nê lau gebe sêŋguŋ Sedekia mataanô lasê ma sênsô eŋ tôŋ ŋa kapoacwalô ki. Go kiŋ Babelŋa gêwê eŋ gêja Babel ma kêkêŋ eŋ gêŋgôŋ kapoacwalô e gêmac êndu.

12 Gêdêŋ ajôŋ kêtu lemeŋ teŋŋa ŋabêc 10 siŋwaga, taŋ sejop kiŋ Babelŋa naŋ, nêŋ kasêga Nebusaradan, taŋ gêjam sakiŋ kiŋ Babelŋa naŋ, kêsô Jerusalem gêja. Gêdêŋ tonaŋ kiŋ Babelŋa Nebukadnesar gêjam gôliŋ nê gamêŋ jala 19 su. 13 Ma Nebusaradan kêkêŋ ja geŋ Apômtaunê andu to kiŋnê andu ma Jerusalem ŋaandu samob. Eŋ kêkêŋ ja geŋ andu kapôêŋ samob su. 14 Ma lau Kaldea nêŋ siŋwaga, taŋ sêwiŋ Nebusaradan naŋ, têtuc tuŋbôm, taŋ kêgi Jerusalem auc naŋ, popoc samucgeŋ. 15 Ma kasêga Nebusaradan kêkôc lau ŋalêlôm sawa ŋagêdô to lau ŋapopoc, taŋ sêŋgôŋ malac naŋ, ma lau, taŋ sêc dêdêŋ kiŋ Babelŋa sêja naŋ, ma lau lemeŋ mêtêŋa ŋapopoc tôŋ. 16 Mago gêwi lau ŋalêlôm sawa ŋagêdô siŋ gacgeŋ sêmoa gebe sênam kôm aŋga kôm wainŋa to kôm moŋa.

17 Ma lau Kaldeaŋa têtuc Apômtaunê andu ŋaalê, taŋ sêmasaŋ ŋa ki joŋjoŋ naŋ, ma sac to bukom, taŋ sêmasaŋ ŋa ki jojoŋ kêkô Apômtaunê andu ŋalêlôm naŋ, popoc-popocgeŋ ma sêkôc ki joŋjoŋ tau sêja Babel. 18 Ma êsêac sêkôc ku to siac ma bôjaŋ to laclu ma gêŋmalu ŋabulakôp to ŋagêŋlêlôm samob, taŋ sêmasaŋ ŋa ki joŋjoŋ kêtu sakiŋ lôm dabuŋŋa naŋ, samobgeŋ su. 19 Êsêac sêkôc laclu sauŋ to laclu sêkêŋ wao kêsêpŋa ma suc to ku ma jakaiŋ to gêŋmalu ŋabulakôp ma laclu sênôm wain kêsêpŋa su amboac tonaŋgeŋ. Siŋwaganêŋ kasêga kêkôc gêŋ, taŋ sêmasaŋ ŋa gold to silber naŋ, samob su. 20 Alê kapôêŋ luagêc to bukom ma bulimakao kapoac 12 ŋakatu, taŋ kêtu bukom tau ŋasac ma sac ŋagêdô, taŋ kiŋ Salomo kêmasaŋ kêtu Apômtaunê anduŋa naŋ, gêŋ samob tonaŋ ŋai êsêac sêmasaŋ ŋa ki joŋjoŋ. Ma ki samob tonaŋ ŋawapac sec, tec sêjam dôŋ kêtôm atom. 21 Alê kapôêŋ ŋadôŋ amboac tonec. Alê tau baliŋ amboac saka lemeŋ teŋ, ma alê tau ŋadambê kêtôm lau têlêac sêmbôêŋ. Êsêac sêmasaŋ alê tau kêtôm gasuc toŋalêlôm ma ŋadani ŋadôŋ kêtôm lemeŋlatu aclê. 22 Ma sêmasaŋ ŋatêpôê toŋatalô ŋa ki joŋjoŋ ma ŋatêpôê ŋasawa, taŋ sepeŋ ŋatalô kêsêp naŋ, kêtôm saka samuc teŋ. Ma sêmasaŋ o to kaŋanô ŋakatu ŋa ki joŋjoŋ amboac tonaŋgeŋ ma sêkêŋ geŋkaleŋ kêgi ŋatalô tau auc. Alê kêtu luagêcŋa kêtôm tonaŋgeŋ. 23 Kaŋanô 96 geŋkaleŋ makeŋ-makeŋ ma kaŋanô ŋakatu samob kêpi tageŋ kêtôm 100 geŋkaleŋ o ŋakatu ŋalêlôm.

24 Ma siŋwaganêŋ kasêga kêkôc ŋac dabuŋsêga Seraia agêc dabuŋwaga, taŋ jakêsô eŋ ŋalabu naŋ, Sepania ma lau têlêac, taŋ sejop lôm dabuŋ ŋasacgêdô naŋ tôŋ. 25 Aŋga malac Nebusaradan kêkôc Judanêŋ siŋwaganêŋ kasêga to lau 7, taŋ ôliŋ andaŋ kiŋ ma gacgeŋ sêmoa malac naŋ, ma siŋwaganêŋ kasêganê ŋac-keto-papiawaga, taŋ kêjaliŋ siŋwaga sa aŋga gamêŋ Judaŋa ma keto nêŋ ŋaê kêsêp ŋaêmôkê naŋ, ma lau gamêŋ Judaŋa 60, taŋ gacgeŋ semoa malac tau naŋ tôŋ. 26 Ma Nebusaradan kêkôc êsêac tôŋ ma kêsakiŋ êsêac dêdêŋ kiŋ Babelŋa, taŋ gêŋgôŋ Ribla naŋ sêja. 27 Ma kiŋ Babelŋa kêsôm, tec sêjac êsêac êndu aŋga Ribla, taŋ gêc gamêŋ Hamat. Tec lau Juda sêwi nêŋ gamêŋ siŋ ma sêwê êsêac jasêŋgôŋ kapoacwalô.

28 Lau taŋ Nebukadnesar gêwê êsêac jasêŋgôŋ kapoacwalô naŋ, nêŋ namba tonec. Eŋ kêkôc lau Juda 3,023 gêdêŋ ênê jala gôliŋŋa kêtu 17. 29 Ma gêdêŋ ênê jala gôliŋŋa kêtu 18 naŋ, eŋ gêwê lau 832 aŋga Jerusalem jasêŋgôŋ kapoacwalô. 30 Ma gêdêŋ taŋ Nebukadnesarnê jala gôliŋŋa kêtu 23 naŋ, siŋwaganêŋ kasêga Nebusaradan gêwê lau Juda 745 jasêŋgôŋ kapoacwalô. Lau samob sêpi tageŋ têtôm 4,600.

31 Kiŋ Judaŋa Jojakim gêŋgôŋ kapoacwalô jala 37 su. Gêdêŋ jala tonaŋ kiŋ Babelŋa Ewilmerodak kêkôc nê kôm gôliŋŋa sa. Tec jala tau ŋaajôŋ kêtu 12 ma ŋabêc 25 eŋ taê walô kiŋ Judaŋa Jojakim, tec kêgaboac eŋ su aŋga kapoacwalô. 32 Eŋ kêsôm biŋ malôgeŋ gêdêŋ eŋ ma kêkêŋ eŋ gêŋgôŋ lêpôŋ teŋ ŋaô ma ketoc eŋ sa kêlêlêc kiŋ ŋagêdô, taŋ sêmoa Babel naŋ su. 33 Jojakim kêkwalec nê ŋakwê kapoacwalôŋa su ma geŋ gêŋ gêŋgôŋ kiŋnê tebo kêtôm bêc samob ŋapaŋ e gêmac êndu. 34 Ma kiŋ kêkêŋ gêŋ ŋagêdô, taŋ eŋ kêpô lêna naŋ, gêdêŋ eŋ kêtôm bêc samob, taŋ eŋ gêmoa mata jali naŋ, e gêmac êndu.