37
Lau-secwaga nêŋ ŋajam, naŋ gêŋ têlageŋŋa
1 Ôniŋ oliŋ êtu lau secwaga atom.
Ôlim taôm êtu lau-kesowagaŋa atom.
2 Êsêac oc têtu gegoŋ sebeŋ amboac gêgwaŋ
ma sêmêliŋ amboac gêgwaŋ ŋamêdôb.
3 Ôkêŋ êwiŋ Apômtau, ec ôŋgôm gêŋ ŋajamgeŋ.
Ôŋgôŋ nêm gamêŋ ma ôŋgôm gêŋ êndêŋgeŋ.
4 Ôtu samuc Apômtau.
Eŋ oc êkêŋ gêŋ, taŋ nêm ŋalêlôm taêm kêka naŋ.
5 Ôsakiŋ nêm lêŋ êndêŋ Apômtau
ma ôkêŋ êwiŋ eŋ, eŋ oc êŋgôm ŋajam êsa.
6 Eŋ oc êkêŋ aômnêm biŋ gêdêŋ êpô gamêŋ amboac ŋawê.
Ma aômnêm biŋ ŋaŋêŋ ŋawê amboac oc kêkô ŋaluŋ.
7 Ônam taôm tôŋ ômoa Apômtau laŋônêm ma ôkêŋ matam eŋgeŋ.
Ôniŋ oliŋ ŋac, taŋ kêtap nê kôm ŋanô sa ma ŋac, taŋ kêkic launêŋ biŋ ma gêgôm ŋanô kêsa naŋ atom.
8 Ojop taôm êndêŋ têmtac ŋandaŋ ma ôkac taôm su aŋga ŋalêlôm kêmoatiŋ tôŋ.
Ôniŋ oliŋ taôm atom, oc êkalem sec.
9 Apômtau oc enseŋ lau-sêgôm-secwaga su.
Ma êsêac, taŋ sêkêŋ mateŋ Apômtau naŋ, oc sêwê kaiŋ gamêŋ tau.
10 Sauŋgeŋ acgom, go secwaga tau oc malamê
ma embe onsom aŋga eŋ mala, oc ôtap eŋ sa atom
11 Mago lau wapac oc têtu gamêŋ ŋatau,
ma moasiŋ oc ênam êsêac auc sêmoa nêŋ ŋajam.
12 Secwaga kêkic ŋac gêdêŋ nê biŋ
ma gêmôê luluŋ kêtu eŋŋa.
13 Mago Apômtau kêômac eŋ
gebe kêjala gebe sauŋgeŋ, go ŋac tau ênaŋa.
14 Lau-secwaga sêkac nêŋ siŋ sa ma sêkêkam nêŋ talam,
sebe senseŋ ŋac ŋasec to ŋalêlôm sawa ma sênac êsêac, taŋ sêsa nêŋ lêŋ gêdêŋgeŋ naŋ êndu.
15 Mago acnêŋ siŋ oc êmbuc êsêac tauŋ nêŋ ŋalêlôm
ma nêŋ talam oc tulu-tulugeŋ ênaŋa.
16 Ŋac-gêdêŋ nê waba luagêcgeŋ embe ênêc,
oc êlêlêc secwaga taêsam nêŋ waba ŋanô lasê su.
17 Lau taŋ sêkac tauŋ su aŋga Anôtônê naŋ, nêŋ lemeŋ dambê oc tulu,
mago Apômtau oc êpuc lau gêdêŋ tôŋ.
18 Apômtau kêjala lau mansaŋ nêŋ bêc
ma nêŋ gêŋlênsêm oc ênêc teŋgeŋ.
19 Êndêŋ bêc gêŋwapacŋa oc sêpô lêna tauŋ atom.
Êndêŋ bêc tôbômŋa, naŋ mo oc êôc êsêac tôŋ.
20 Lau taŋ sêkac tauŋ su aŋga Anôtônê naŋ, oc sêmbac sênaŋa.
Ma Apômtaunê ŋacjo oc sênaŋa amboac ŋaola kêsêlô, ma sê su amboac jadauŋ.
21 Ŋac sec nê gêŋ masi, tec oc ênac launêŋ tôp êtôm atom.
Ma ŋac gêdêŋ oc êkêŋ gêŋ totêtac wapômgeŋ.
22 Lau taŋ Apômtau gêjam mec êsêac naŋ, oc sêwê kaiŋ gamêŋ êtu nêŋ gêŋ.
Ma lau, taŋ eŋ kêpuc boa êsêac naŋ, oc sênaŋa.
23 Apômtau gêjam gôliŋ launêŋ lêŋ
ma kêpuc ŋac, taŋ nê lêŋ gêjac eŋ mataanô ŋajam naŋ tôŋ.
24 Eŋ embe embeŋ, oc gacgeŋ êsêp naênêc atom
gebe Apômtau kêkam eŋ gêdêŋ lêma.
25 Aê ŋapalêgeŋ e katu ŋac laŋgwa,
mago galic Apômtau gêwi ŋac gêdêŋ teŋ siŋ atomanô. Ma galic nê gôlôac têtaŋ gêŋ teŋ atomanô.
26 Eŋ ŋac têtac wapôm ma êkêŋ gêŋ êndêŋ lau, taŋ teteŋ eŋ naŋ.
Ma nê gôlôac oc têtu moasiŋ laugeŋ.
27 Ôŋgamiŋ taôm êndêŋ sec ma ôŋgôm gêŋ ŋajamgeŋ,
go ômoa nêm gamêŋ teŋgeŋ
28 Gebe Apômtau têtac gêwiŋ biŋ gêdêŋ
ma oc êwi nê lau mansaŋ siŋ atom.
Eŋ oc ejop nê lau gêdêŋ sêmoa teŋgeŋ,
mago lau alôb-alôb nêŋ wakuc oc maleŋmê.
29 Lau gêdêŋ oc têtu gamêŋ ŋatau
ma oc sêŋgôŋ nêŋ gamêŋ tau endeŋ tôŋgeŋ.
30 Ŋac gêdêŋ nê awasuŋ kêsôm biŋ tokauc lasê
ma imbêla kêsôm biŋ jagêdêŋ.
31 Ŋac tau nê Anôtônê biŋsu gêc ênê ŋalêlôm,
tec kêsêlêŋ kêku kêpac atom.
32 Ŋac keso gêdib ŋac gêdêŋ
ma taê gêjam gebe enseŋ eŋ su ênaŋa.
33 Mago Apômtau kêkô ŋac gêdêŋ auc
ma embe êmêtôc ênê biŋ, oc êkêŋ eŋ lêwaŋ-lêwaŋ atom.
34 Ôkêŋ matam Apômtaugeŋ to ôsap ênê lêŋ tôŋ, go etoc aôm sa ôtu gamêŋ ŋatau
ma aôm ôlic eŋ enseŋ lau sec su.
35 Aê galic ŋac sec teŋ, taŋ ketoc tau sa ŋanôgeŋ
e keleŋ gamêŋ su amboac kaseda Lebanonŋa.
36 Mago gêdêŋ taŋ kasêlêŋ jagaô lasê eŋ mala kêtiam naŋ, galic eŋ malamê
ma gasom e katap eŋ sa atomanô.
37 Ômoa tobiŋmêgeŋ ma ôsa nêm lêŋ êndêŋgeŋ
gebe Anôtô oc êmoasiŋ lau amboac tonaŋ.
38 Lau-secwaga samob oc sênaŋa.
Ma lau, taŋ sêkac tauŋ su aŋga Anôtônê naŋ, nêŋ wakuc oc maleŋmê.
39 Apômtau kêtu lau gêdêŋ nêŋ ênam êsêac sa ŋamôkê
ma kêtu nêŋ lamu ŋanô gêdêŋ noc sêpô lêna tauŋŋa.
40 Apômtau kêpuc êsêac tôŋ to gêjam êsêac kêsi.
Eŋ gêjam êsêac kêsi gêdêŋ lau keso ma kêpuc êsêac tôŋ gebe sê lamu eŋgeŋ.