42
BUKU KÊTU LUAGÊCŊA
Tanam aweŋ su Apômtauŋa
1 O Anôtô, aê aocsulu kapa aômŋa
amboac bôcgabuŋ, taŋ awa ececgeŋ gebe ênôm bu naŋ.
2 Ŋoc katuc ŋaawasulu kêpa Anôtôŋa, kêpa kêtu Anôtô mata jaliŋa.
Êndêŋ ondoc oc jasa najalic Anôtônê laŋôanô.
3 Galiŋ matocsulu kêtu ŋoc mo kêtôm bêc to geleŋ,
gebe sênac aêŋoc Anôtô ôkwi kêtôm bêcgeŋ gebe Nêm Anôtô gêmoa ondoc.”
4 Jakô ŋoc ŋalêlôm ŋawapac auc atom, taêc ênam biŋ tonecgeŋ gebe gêmuŋgeŋ gawiŋ lau taêsam ma gawê êsêac gadêŋ Anôtônê andu gaja.
Aêac awê tolasê ma toôndugeŋ aja abe akêŋ Anôtônê om.
5 O katuc tau, amboac ondoc gômoa ŋoc ŋalêlôm tobiŋ wapac ma ôluŋ-ôluŋgeŋ.
Ôkêŋ matam Anôtô gebe aê oc janam daŋge êndêŋ eŋ, taŋ kêsa aê laŋôc sa to kêtu ŋoc Anôtô naŋ.
6 Ŋoc katuc kêpô gêducgeŋ gêmoa ŋoc ŋalêlôm. Amboac tonaŋ tec taêc gêjam aôm gamoa Jordan to lôc Hermon ŋatêpôê ŋagamêŋ tonec.
Gaŋgôŋ lôc Misar tonec.
7 Bu ŋasamac teŋ gêmôêc biŋ gêdêŋ ŋasamac teŋ gêdêŋ taŋ kêpô kêsêp pocdambê naŋ.
Ojae, aômnêm dembom to koteŋ samob gênôm aê aucgoc.
8 Gêdêŋ geleŋŋa gaeŋ oliŋ gebe Apômtau êkêŋ nê moasiŋ êsa ma gêdêŋ gêbêc nê wê gêc aocsuŋ
to kateŋ ŋoc mec gêdêŋ Anôtô, taŋ kêkêŋ aê gaŋgôŋ matoc jali.
9 Aê kasôm gêdêŋ ŋoc poclabu Anôtô gebe
“Amboac ondoc kôliŋ aê siŋ.
Amboac ondoc gamoa togêŋwapacgeŋ.
Ma ŋacjo kêkôniŋ aê tôŋ.”
10 Lau taŋ sêlêsu aêŋa naŋ, têtaŋ pêlê aê
e sêjamuŋ ŋoc ŋatêkwa popoc-popocgeŋ.
Êsêac têtaŋ pêlê aê gedeŋ tôŋgeŋ gebe
“Nêm Anôtô gêmoa ondoc.”
11 O katuc tau, amboac ondoc gômoa ŋoc ŋalêlôm tobiŋ wapac ma ôluŋ-ôluŋgeŋ.
Ôkêŋ matam Anôtô, gebe aê janam daŋge êndêŋ eŋ, taŋ kêsa aê laŋôc sa to kêtu ŋoc Anôtô naŋ.