86
Tapô lêna tauŋ daŋgôŋ ŋamec
1 O Apômtau, mêŋwê taŋam to ôkêŋ taŋam aê
gebe aê ŋac sawa gaŋgôŋ jageo.
2 Ojop aêŋoc katuc gebe aê ôlic andaŋ aôm tec gamoa.
O ŋoc Anôtô, ônam nêm sakiŋwaga, taŋ mata kêsap aôm naŋ sa.
3 O Apômtau, ŋoc Anôtô, taêm walô aê
gebe aoc gêjac aôm gedeŋ tôŋgeŋ.
4 Ôkêŋ nêm sakiŋwaganê ŋalêlôm êtu samuc.
O Apômtau, aê kasuŋ ŋoc ŋalêlôm sa gêdêŋ aôm.
5 Gebe aôm Apômtau, kôtu ŋac gabêjam ma kôsuc biŋ ôkwi kêlêlêc.
Aômnêm têmtac gêwiŋ teŋgeŋŋa gêdêŋ lau samob, taŋ aweŋ gêjac aôm naŋ.
6 O Apômtau, ôŋô ŋoc mec.
Wê taŋam ŋoc taŋiboa kapôêŋ.
7 Embe japô lêna, oc aoc ênac aôm
gebe aôm oc ôjô aêŋoc mec.
8 O Apômtau, anôtôi nêŋ teŋ kêtôm aôm gêmoa atom.
Ma gêŋ ŋanô teŋ oc êtôm gêŋ, taŋ aôm gôgôm naŋ, atom amboac tonaŋgeŋ.
9 O Apômtau, lau samuc samob, taŋ kôkêŋ êsêac naŋ, oc mêŋsêpôŋ eŋduc êndêŋ aôm.
Ma sêŋgôm nêm ŋaê ŋawae êsa.
10 Gebe aôm taômgeŋ ŋac kapôêŋ tec gôgôm gêŋsêga.
Biŋŋanô, aôm taômgeŋ tec kôtu Anôtô.
11 O Apômtau, ôndôŋ nêm lêŋ êndêŋ aê,
go taŋoc wamu aôm ŋaŋêŋgeŋ.
Ôndôŋ aê gebe janam sakiŋ aôm
toŋoc ŋalêlôm samucgeŋ.
12 O Apômtau ŋoc Anôtô, gabe aoc êôc aôm toŋoc ŋalêlôm samucgeŋ
ma jaŋgôm nêm ŋaê ŋawae êsa endeŋ tôŋgeŋ.
13 Gebe aôm têmtac gêwiŋ aê teŋgeŋ.
Aôm kôjaŋgo katuc su aŋga lamboam ŋakêlêndiŋ.
14 O Anôtô, lau teŋbeleŋ aŋgeŋ sêkêli tauŋ gêdêŋ aê ma ŋaclai totoŋgeŋ dêdib katuc sêmoa
ma êsêac sêsa aôm laŋôm sa elêmê atom.
15 O Apômtau, aôm Anôtô taêm labu to kômoasiŋ kêlêlêc.
Aôm ŋac gabêjam tec gôê biŋ tôŋ ma nêm têmtac gêwiŋ teŋgeŋŋa gêc gedeŋ tôŋgeŋ.
16 Ôkac taôm ôkwi ôndêŋ aê ma taêm labu aê.
Ŋajaŋa ŋatau, ôpuc nêm sakiŋwaga tôŋ gebe aê gajam sakiŋ aôm kêtôm tinoc gêgôm.
17 Ôŋgôm gêŋtalô teŋ êpi aê gebe jajala nêm moasiŋ. Ôkêŋ ŋoc ŋacjo sêjala e majeŋ êsa
êndêŋ êsêac sêlic gebe aôm Apômtau tec gôjam aê sa to gôjam malô aê. *Dawidnê mec teŋ.