108
Mec Anôtô ênam aêac sa aŋga ŋacjo nêŋ
(Pes 57:7-11; 60:5-12)
1 O Anôtô, ŋoc ŋalêlôm kêpa su gabe janam wê to jaŋgôm gêŋ wêŋa êtaŋ.
O katuc tau, ôndimaŋ.
2 Gêŋ wêŋa totau-totau, andi.
Aê gabe jaŋu gamêŋ kelendeŋ sa.
3 O Apomtau, aê gabe jalanem aôm aŋga lau ŋalêlôm.
Aê gabe aoc êôc aôm aŋga tenteŋlatu ŋalêlôm.
4 Gebe aômnêm têmtac gêwiŋ teŋgeŋŋa kêpi-kêpi e jagêdêŋ undambê
ma aômnêm biŋ ŋaŋêŋ kelendeŋ tau e jagêdêŋ tao.
5 O Anôtô, ôsuŋ taôm sa e êndêŋ undambê ŋaô
ma nêm ŋawasi ênam nom samuc auc.
6 Ôkêŋ taŋam aêac ma ônam nêm lau, taŋ têmtac gêwiŋ êsêac naŋ sa.
Nêm anôŋa eŋgeŋ aêac sa.
7 Ŋac dabuŋ Anôtô kêsôm aŋga nê gamêŋ dabuŋ gebe
“Aê jawa Sikem êkôc-êkôc totêtac ŋajamgeŋ ma janac sam gaboaŋ Sukot êndêŋ ŋoc lau.
8 Gilead to Manase kêtu ŋoc gamêŋ.
Epraim kêtu môkêcapac ŋakululuŋ ki to Juda kêtu ŋoc tôc gôliŋŋa.
9 Moab kêtu ŋoc laclu jakwasiŋ taucŋa.
Aê jambaliŋ ŋoc atapa êpi Edom ma ŋoc dimai êpi Pilistinêŋ gamêŋ.”
10 O Anôtô, asa oc êwê aê jandêŋ malac totuŋbôm ŋajaŋa jana.
Asa oc êwê aê najaô lasê Edom.
11 O Anôtô, aôm oc gôwi aêac siŋ
ma kôtu aêacma lausiŋ nêŋ laumata atom me.
12 Ônam aêac sa êndêŋ ŋacjomaŋ
gebe ŋamalac oc sênam aêac sa êtôm atom.
13 Anôtô êwiŋ aêac, go danseŋ ŋacjo aliŋ-êliŋ.
Eŋ taugeŋ tec oc êka aêacnêŋ ŋacjo popoc.