1 ኤሴ አስሱ ዙታምባሴ እኖትን ክርስቶስኒ ዎስትኛ ስንኒማቶናዋ ሀኦሲ ኣቾ ቾዋኖን አምማኖን ክስሬ ማኮኒ ሀእሱኒ ሁግና እምቴና አዳራ ኤጶ አስሱ ዛግሬ ፋዱናክ ሾልሱዋ። 2 አዳራ ኤጳ አሱኒ ሜያ አማናምቶ ስነሬ ቤስቶሶነክቱ ሾልስፋዋ። 3 ታ፤ ቾዋሲክ ስንፋናነ ንቶኑ ታይስታ ማጝሱ ካርኤፌትክ ወደይ ኦም አስሱ ታይስታ ማጝሱ ካርፌናክ እሳ ግድና ኣፋዋ። ፉቶሲክ ታ፤ ታ፤ ቴታሲክ ታይስታ ማጝሱ ካርአናክ ኣፋ ችማናዉዛ። 4 ታ፤ አሪፋናሲማቶ ስንፋናነ ካኑናስ ኣነ ታን ዋቃሴፋዋ፤ ስኑንታኖ ታይስታ ማጝሱ ካርኒስ ዳሚስ ኮእባዋ። 5 ኤስ ባሪ ቦርኣ ዎንባስ ካርኖይፌን ወደይ ዳሚስ ማጝሱኒ ካርአክ ዮኖይፌን ኦኒስታኑ ማጝሱ ካርአቲታዋ፤ ባር ዬና ዎኖ ታልማሲ ኣቸራ ፋ ኣቾ ቾዋሶን ቻሬፋስታ ክሱናዋ። አሱኒ ሜኒ ንብባሲ ኣቸራ ፋ ሳፋራሶን አምማኖን ክሱናዋ፤ ኤስ ካባሲክቱ አስሱ እሳ እሳርባሲክ ሀኦስኪን ሾልሱ ጋላታ ዳናናዋ። 6 አይን ሜያነ! ንቶክ ኬእኒ ዉዛሲክዋ እያት ሀን ቾዋሲክ ታናዋ አጲሎስኒንና ቤሶ ዛግራ ማኬጝዋ፤ ኤስ ባሮን ደይ ዛግናስ፦ «ትቼ ባሪስታን ኣታታታዋ» ይፋ ኪቶሶን እኖኪን አሩትክዋ እያትዋ። ኤስ ባሪ ቦርኣ እሳ አሱኒክ ቴቴፋት ኦሚስን ካሹትክ ኣነ ሾልስፋዋ። 7 ነ፤ ኦሚሳታን አዉክ አርኩታስሶ? ኦሚስኪን ኤጳቶኖታ ዉዛ ኣምባንሶ? ኤካን ዙታምባሴ አስን ኤጳ ታታስ ኦሚስኪን ስንናኔን ኦሚስኪን ኤጴቶኖይ አሱኒማቶ አዉኒሮን ቴቴፋስሶ? 8 ሀሽኑ ንቶክ ሾልሲ ዉዛሶን ዙትራ ዳንትዋ! ሀሽኑ ደይ ኦቱም ስንነትዋ! እኖስታን ኦር ኬስሳ ታቶ ስንትዋ! ፉቶክ ታቶ ስነት ስንፋናነ እንኖ ደይ ንቶኔን አነ ታቶኒር ስንና ቦርአ ማአሪ ስንናና ካባዋ። 9 ኤስ ባሪ ቦርኣ ሀኦሲ ዎሲ ስና እኖትን ክቱኒ ማጝሱኒ ካርአ ባሶስታ ካቴን ዎርቶሶነ ድማ ኦቴሬ ሀሜፌ አሱኒ ሜኒ ጋነያስን ኮእኒስ እንኖ ስንማቶቱ ታክ ቤስቴፋዋ። ኤስ ባርስታን ካብ ቾዋ ሀን ዳ ዙታምባሴ አሲስ ሀኦኒ ዎስያኑ ስንፋናክ አሱኒ ሜኒ ስንናክኑ ስንፋናክ ቢስቶኒ ዉዝንማቶ ስንና ቤስቴፌንዋ። 10 እንኖ ክርስቶስኒክዋ እያት ጎዋ ስንኒዋ፤ ስኑንታኖ ንቶ ክርስቶስኒኪ ካሞ ቴቹምኒ ሜያ ስንነትዋ፤ ኤሲስማቶ እንኖ ሆፕን ሜያ ስንኒዋ፤ ስኑንታኖ ንቶ ደይ ችምቤሲ ፋና ሜያ ስንነትዋ፤ ንቶ ደይ ኡልፍንቶ ስንነትዋ፤ ስኑንታኖ እንኖ ሳልጳቴር ስንኒዋ። 11 ኤስ ሳአትስ ካርአና ካባኔን ማክቴፌኒ፤ እክቴፌኒ፤ አታቱ ስንፌኒ፤ እቼፌኒ፤ ዱኒ ኬያ ቱርኩክ ራካቴፌኒ። 12 እንኖ ቴትኒ ኩሹሲክ ዎስቶክ ሆፕፌኒ፤ እኖትን ኤርውሴፌን ኤቢስፌኒ፤ ካብግሴፌን ፋክፌኒ፤ 13 እኖትን ሜእኤፌንናዋ ሱንኒሶን ማጝስሴፌንና ማአሮን ባሶክ ዎልግፌኒ፤ ኤሴን ሀውጙ ካርአ ሀን ዳስታክ ሀእቶ ዉዝነዋ ፉትቴራ ሀእቴ ዲምነ ስንኒዋ። 14 ታ፤ ሀን ባሮን ንቶክ ትችናስ ሹንቶ ናንጎትና ስንነትማቶ ዛግራ ኪቱናክታኖ ንቶትን ኢሽሹናክዋ እያታዋ። 15 አዉኑ ስኑን ክርስቶስኒኪ ካሞ ሾዎ ዞንስንቲ ፌፌናክኑ ሾዎ አባንት ኣፌዋ፤ ስኑንታኖ ታ፤ ንቶትን ክርስቶስ የሱስኒ ምስራቹኒ ካማሲክ ኮንጝዋ። 16 ኤስ ባሪ ቦርኣ ታ፤ ቤሶሲክ ዞኑስቶትክ ሺጴፋዉጙዋ። 17 ኤስ ቾዋሲክ ሹንቶናዋ አማናምቶና ስንና ደይ ዳሚሲክ ናታ ስና ትሞትዮስኒን ንቶኪ ዎስጝዋ። ዳ፤ ዳስንናዋ ሾዎ ቤቴክርስታኒስንና ታ፤ አሲፋናይሲማቶ ባር ታ፤ ክርስቶስኒኪ ካሞ ዳና ጋድዶ ካሲ አጃጅኖን ንቶክ ያዳሱናዋ። 18 ንቶስን እሳ እሳይስ ንቶትን ብያክ ዮ ቤያናርነ ፋር ስንና ባሶክ ቤስቴፋን ቤጋንቶክ ቱሜሴቴዋ። 19 ስኑንታኖ ዳሚሳ ፍቃድ ስንፋናነ ሀን ታአ ዎናስሲ ንቶኪ ዮናዋ። ኤስ ካባሲክ ኤስ ቤጋንቴሴፌ ባሶ ዎላሶን ኮእባ ስኖይናሮን ሁግናቤስሶንኑ አሩናክ ሾሌፋዉጙዋ። 20 ሀኦሲ ታቶ ዎሉምኒ ቾዋታዋ፤ ስኑንታኖ ሀኦኒ ሁግናዋ። 21 ሾሌፌትስ ኣምባንሶ? ኬኦኒ ሃሮ ኤጳ ንቶኪ ዮናክጝዋ ወደይ ኬሽታናክናዋ ጋራምኒ አያናክና ዮናኪ ሾሌፌትሪ?