Wosi Phawulosni wosiya
Qoronxoski asuni meyak
Gachgiru
Phawulos Qoronxoski asuni meyak tichina issonsa wosiyaas tichchenaas Qoronxosuk tokna betekiristaniissi kiristinnani kaasiknawa amantoosikna kabi chowaasi rakkok kotba imak safarefaatwa. Es kabaasik Qrontoos show tesa asuni meya feesefe Girikni katama sinbaastan denalo Akayiya yiste Roomni ha'suussi arki katama. Es katamaas akama nagadak; sinnoy ge'ni dubbiyok; akamanon tagit fa mangu amalaknawa haymanotiisikitoni showokna arto.
Wosiis arkiron betekiristaniissi fa oor oor kesaason; zinaason; gerkesni chowaasik; ephne girune asi chowaasik; betekiristanini sitirini chowaasik; Korto ayyanaasi imaasikitonewa kitun kabuni chowaasiknatu makefe. Esiisimato wosiis es mamsusikitok misirachchuni kaamaas wolguba imanamatotu make.
«Keeshtana» Ha'oos daraasik imna imaasikitosin akama sinbaason besifaas eddeba asire keezesta fa bar han matsafaassin arto dima yisteratu faadtefa.
Matsafaas Siruk Ephna Ephobaas
Gachgiru 1:1-9
Kiristanani meeni ganeyaassi kabi oor oor kesaas 1:10—4:21
Gerkesa 5:1—7:40
Koo'lok shukte ashaason muuni chowak Phawulos imna wolgu 8:1—11:1
Betekiristanini kaanewa Ha'oni shiiphoni sitirine 11:2—14:40
Kiristoosnawa amanynyini meeni kitun kabune 15:1-58
Yuudak feese rakkata kiristanani meyak zagte argasu 16:1-4
Teetni chownewa matsafaasi koor'une 16:5-24
1
1 Ha'oosi fiqadik Kiristoos Yesusni wosi sinanak teegte Phawulosnawa ayni sina Sostensikna; 2 Qoronxosni katamaassi fa Ha'oosi betekiristaniisik; barissi feese Kiristoos Yesusnik korto sine baassoknawa korto sinonek teegte baassokna; esiisimato dima dimaassi baassoknawa innokna Daam sina Daamni Yesus Kiristoosni sunaason teegsefe baasso zuuttambesiise asik; 3 Abani sina Ha'ooskinnawa Daam Yesus Kiristoosnikinna otumnewa nagane nittok sinfawungwa.
Galata Ha'oosik
4 Kiristoos Yesusniki kamo Ha'oos otumbaason nittok imna boor'a wonna wonna Ha'onaason galattefawungwa. 5 Zuuttambaase asik wollak sinun aruk Kiristoos Yesusnik otum sinetiwa. 6 Kiristoosni chowaasik makeni zaalaas nittokik zagiratu fawa. 7 Es bari boor'a Daamni Yesus Kiristoosni ammanon yooson oodet faasefeti kabaasik Ha'oosi Ayyanani imaassin isarnu nittok aafa yo'una wuza. 8 Daamni Yesus Kiristoos wolle yoona wono zinniti foonto sinna koi'baasta kar'ananneen chimma footik nittotin zagawowa. 9 Naaba sina Daamni Yesus Kiristoosneen ane isarniti foonak nittotin teege Ha'oos amanamtowa.
Kiristanani Meeni Ganeyasi Zagte Oor Oor Kesa
10 Aytaasakitono! «Nitto ganeyaassi oor oor kesa foonata; zuuttamnitiise isa nibaknawa isa safarakna chimma footi» yira Daamni Yesus Kiristoosni sunaasik shiiphefawungwa. 11 Aytaasakitono! Nitto ganeyaassi faasso faanamato Kelo'eni keer feese meyakin odengwa. 12 Esiis dey nitto isa isarnitiis: «Ta Phawulosnir, ta Aphphilosnir, ta Phexirosnir, ta Kiristoosnir» yisefeti. 13 Eekan Kiristoos bagtewoso? Phawulos nittokwa iyaat suuttewoso? wedey haphuktesetiis Phawulosni sunaasikoso? 14 Ta Qersiposnawa Gayosnatano nittoossin ooninnu aane haphqut sinna boor'a Ha'ooson galattefawungwa. 15 Es bari boor'a: «Ta Phawulosni sunaasik haphuktengwa» yire makok chimnir oonu aafe. [ 16 Futowa; Isxifanosni keerki meyanon haphqingwa; es baassoneen oom haphqina asu foobaason aane yaadatotwa.] 17 Kiristoos taan wosinaas misirachchuni kaamaason makonaktano haphqunaktawa; Kiristoosni mesqeliis shima sinna fui'tonoynamato misirachchuni kaamaason makefanaas asuni techmak beste wollaktawa.
Kiristoos Ha'oni Techumnewa Hugnane Sinnamato
18 Mesqeliisi kaama tishuni baassok gowwumma sinnatu faadtefa; sinuntano faruni innok Ha'oni hugnawa.
19 «Techumni meeni techmaason tishkuna;
aruni meeni aruuson shima zaguna»
yistera tichchewa.
20 Eekan techum ayfeso? Tumaasi aru dey ayfeso? Han neyaasi tu'ninyinya ayfeso? Ha'oos han daastaki techmaason gowwumma aane zaguwanoso?
21 Han daastaki asuni meya baasso teetni techmaasik Ha'ooson aru chimonoytemato Ha'oos techumbaasik kulfiwa. Sinuntano gowwanimato faadtefe inno makefeni Misirachchuni kaamaasik amanefe baassotin fatunak Ha'oosi fiqadi siniwa. 22 Aagenu sinfaanane Ayhudni meya biistera artonoy wuza biya sholseter; Girikni meya dey techmatu sholsefe. 23 Sinuntano inno Kiristoos innokwa iyaat suuttobaasontu makefeni; es bar dey Ayhudni meyak tuusa; Girikni meyak dey gowwumma. 24 Sinuntano teegte baassok Ayhud sinoto Girikni meya Kiristoos Ha'oosi hugnanewa techumnewa. 25 Esiis dey Ha'oosi gowwumma asuni meeni techmaastan denalowa; Ha'oosi hopiya asuni meeni hugnaastan denalowa.
26 Aytaasakitono! Ha'oos nittotin teegena kabaasik awune fe asu sinetimato yaadatotiwa. Asuni safarasimato nitto ganeyaassin showoni meya techum wedey chim wedey arto asu aafsetiwa. 27 Sinuntano Ha'oos techumni meyanon iishshunak han daastak gowwanimato faadtefe asuni meyanon koriwa; chim meyanon iishshunak han daasta feese hopinimato faadtefe baassotin koriwa. 28 Ha'oos han daastaki asuni meeni sinak ulfinto yiste wuzasikitonon ulfintonor sinbaason besuk; han daastak daakalo sina baronnawa kashistosonna dey shima sina wuzason koriwa. 29 Es baron dey zaginaas oonu Ha'oosi sinak basa teetni safaraasik teetonoynamatowa. 30 Sinuntano Ha'oos nittotin Kiristoos Yesusneen ane isarniti foonak zagi. Es bari boor'a Ha'oos Kiristoos Yesusnin innok techumni; ookoni, kortoninawa furinina sinanak zagiwa. 31 Ese matsafaas dey: «Teetefe bar Daamiisik teetowowa» yistera tichchenamatowa.