Wosi Yohannisni Issonsa Wosiya
Gachgiru
Wosi Yohannisni tesuni wosiyaas hep arki arki wosiba faar; esiis dey feretisefe baasso Ha'oosneennawa Naasnenna ane fa isarbesi foonak chinuknawa es isarbesiison dey tishkuk chimni esha assuussin wokke teetbesiison oodosonekwa. Es kabaasik ya esha asus manguus kesanaas han inya daasneen fa uphet foosik sinna boor'a Ha'oosi naa Yesus Kiristoos isa asu aafa sinanawuza wedey asu sinni amalaba aafa foona wuza yifarwa. Es asinynyani meya «Faru uus amanonoy baasso foosikwa yit rakkatoossin birmadumma kesawa» yiset feeseter. Es barneen ane «Dilba foonewa oom asusik keeshtana besu faruusnen ane isarba aafa» yiset feeseter.
Tichibar es assuuson tugga'ok Yesus Kiristoos yo'uba foonto asuwa; Yesusnik amanefe baassonawa Ha'ooson shunefe baasso zuuttere baassotna baassotna wal shunosonek sholsifa yit assi.
Matsafaas Siruk Ephna Ephobaas
Gachgiru 1:1-4
Chaarefnewa talumne 1:5—2:29
Ha'oosi naanggotnewa Dabulosni naanggotne 3:1-24
Futonewa eshne 4:1-6
Keeshtanni giddi 4:7-21
Kejera merefa amanto 5:1-21
1
Kaani Kaama
1 Zeemmaneen fa kaani chowaasi kaamanon nittok tichifeniwa; es kaani kaamaas dey odeni barewa aafniisik biini bare; gazgira biini barewa kushuniisik dey ta'ira biini barewa. 2 Es kaas dey ammanon kessa beste; inno dey biini; biini baron dey zaala makoni. Abaaskik fa baronnawa innok dey ammanon kessa beste baronna koi'ba foonto kaason nittok makefeniwa. 3 Innoneen ane isarniti foonak biini baronnawa odeni baronna nittok makefeniwa. Isar sinniis dey Abaasnennawa Naa Yesus Kiristoosneennawa. 4 Giraniis tuuma sinanak han baron nittok tichifeniwa.
Ha'oos Chaarefawa
5 Barkin odeniis dey nittok makefeni wosiyaas: «Ha'oos chaarefawa; talma dey barkik isanne aafawa» yifarwa. 6 Es bari boor'a: «Ha'oosneen ane isarni faarwa» yifat talmaassi faanir sinfaanane eshinynyawa; futoosik dey aane faafeniwa uwa. 7 Sinuntano bar chaarefaassi feenamato inno dey chaarefaassi faafaanine innotna innotna isarni foonawa. Dey Nawuba Yesus Kiristoosni hannaas boor'a zuuttambaase asiissin innotin kaynunawa. 8 Boor'ni aafa iyaanine teetnisontu eshdifeni. Futoos dey innoossi aafa. 9 Boor'niison Ha'oosik harmifaanine bar amanamto dey ooko sinna boor'a boor'niison zuuttambaase asin feeshun una. Mangsuni zuuttambaase asiissin innotin kaynunawa. 10 Boor'a aane wostoweni iyaanine Ha'ooson eshinynya zaginirwa; kaambaas dey innoossi aafawa.