Wosi Phexirosni Issonsa wosiya
Gachgiru
Wosi Phexirosni tesuni wosiyaas tichchenaas wosibaassi «Ha'oosi korto dara» yistere teegtesefe baassoknawa garo Iisiyani yeeshdaaki dimaassi siktere feese kiristanani meyakwa. Wosiyaas arkiron biifanaas amantobesiisi boor'a kabugtonewa rakkone baassosta kar'faan feretife baassotin chinuknawa zagguknawa. Tichibar es baron zaginaas kitubaason, kitun kabubaason, wolle yoobaasi abdinon makefa Yesus Kiristoosni misirachchuni kaamaason feretife baassok yaadassukwa. Yesus Kiristoosni kaason beso zagisere biyak rakkooson fakiyak ephphetoo sholsifanamato makefe. Es barneen tusire shana amantobesiisi kaymanon fattanonir sinbaason «Yesus Kiristoos wolle yoona wono» baassok sholsi waagbesiison danonemato makefe.
Tichibar shanaassi fakusonek chinubaastan ooma feretisefe baasso Kiristoosni zoonsi foosonek sholsifanaasne faaron foosonek makefe.
Matsafaas Siruk Ephna Ephobaas
Gachgiru 1:1-2
Ha'oosi fatuni yaadata 1:3-12
Korto kaak foosik imte kiito 1:13—2:10
Rakkoni wono kiristanani ha'su 2:11—4:19
Kiristanani meeni garamani wosto 5:1-11
Koor'uba 5:12-14
1
1 Yesus Kiristoosni wosi sina Phexirosnikin, Pantos, Galatiya, Kephadokiya, Iisiyanawa Bitaniyana asiissin siketere irba sinere feese Ha'o korina baassok; 2 Aba Ha'oos zeemma arira Yesus Kiristoosnik ajajamtok harinbaasik wir'tera Korto Ayyanaaski kamo korto sina nittok; Ha'oosi otumnewa nagane nittok arkifawungwa.
Hayewa Abdi
3 Yesus Kiristoos kitun kabubaasik hayewa sina abdiison innok imma; akama fakibaasik gaddo koontok innotin bari naanggota zagi Daamni Yesus Kiristoosni Aba Ha'oosik galata sinfawungwa. 4 Bar den samak tishunor; mangunoy dey kur'unoy hoorera fa risti nittok hoossi. 5 Nitto dey koi'ni wonaasta yooni faruuson amantooski kamo Ha'oosi hugnak oodtera faasetir. 6 Hash showo tesa fatanak garo wonniron fattantefetiknu es fatanaasik girotiwa. 7 Es fatanaas nittoosta kar'naas nitto amantoos zaga sinbaason besukwa; tishuni warqeesnu geesi giriratu kesfawa; warqeestan denalo sina ulfinto amantontiis esiisimato fattantonak sholsifawa. Es fattantera kesa amantontiis Yesus Kiristoos ammanon wolle yeefena kabaasik galata, ulfinnewa kaphustone nittok imana. 8 Yesusnin biinoyfaagedo shunfetiwa; hash biya beyfetiknu barik amanesetiwa; ekka yistera makok chimtonoy ulfinto gira girotiwa. 9 Amanera oodfeti kaantiisi farunon danatiwa. 10 Nittok imtoni Ha'oosi otmani raajiison make raajjuni meya han faruusi chowanon mai'sire tu'nit feeseter. 11 Baassossi fa Kiristoosni Ayyanaas Kiristoosnista kar'ni shanaasonnawa es shanaasneen orfo danana ulfinaason besira faar. Baasso dey es wuzaas zuuttambaase aagenawa aakkakna sinanamato tu'nire feeseter. 12 Es raajjuni meya wostet feesetees nittoktano baasso teetaasikta sinnamato baassok ammanon bestera faarwa. Nittok wostesetees saman wostera ya Korto Ayyanaaski kamo misirachchuni kaamaason hashti nittok makse asuni meya maksete baron ammanon kisire besukwa. Es baron dey Ha'oosi wosiyaasikitonu biyosonak eenantet faaserwa.
Korto Fook Fo
13 Es bari boor'a nibnitiison guzgira hooroti; teetnitiison ha'suti; Yesus Kiristoos ammanon wolle yeefena kabaasik danati akama faruusi otmanon danatik tuuma abdinti foon. 14 Ajajame naanggota sintitano arunoy zeemoti faafeti mangu eenantoosik zoonustotiita. 15 Sinuntano nittotin teege Ha'oos korto sinnamato nitto dey foonti zuuttambaase asik korto sintiwa. 16 Korto matsafaassi: «Ta korto sinna boor'a nitto dey korto sinti» yistera tichchewa. 17 Ooninnu korunoy isarba isarbaasik wostobaasimato mangsu kar'ni Ha'ooson: «Aba» yira teegsetir sinfaanane han daastak irba sinna faafeti kabaasik Ha'ooson digak footi. 18 Nitto abantiisatan waraseti ke'noy foossin furtetiis tishuni birrik wedey warqek sina beybaason arsefetiwa. 19 Sinuntano nitto furtesetiis zina wedey mudaba foonto kayma fantu sina Kiristoosni ulfinto hannaasikwa. 20 Bar kortenaas han daas testonoyfeen zeemma sinfanaknu hash koi'ni neyaastak nittokwa iyaat ammanon kesse beste. 21 Yesusnin kitun kabgira ulfina ima Ha'oosik amanosotiwa; esiisik amantontiisewa abdintiise Ha'oosta sinanawa.
22 Amanynyi meyak keeshtannitiis kayma keenak sinanak futoosik ajajamok kaantiison kaynitiwa. Es bari boor'a nittotna nittotna zaggira nibnitiissin keeshtosotiwa. 23 Hepsa koontesetiis hayewa sina koi'ba foontonon zagira faafa Ha'oosi kaamak tishunoy zalaassintano tishuni zalaassintawa. 24 Matsafaassi maktenaasimato:
«Asu zuuttambaase kuunimatowa;
ulfinbaas dey buur'uni fur'aasimatowa;
kuwaas ichimana; fur'aas dey woottona.
25 Sinuntano Daamiisa kaama;
koi'ba foontonon zagira foona»
Nittok makte misirachchuni kaamaas esiiswa.