Wosi Yohannisni Hepsa Wosiya
Gachgiru
Wosi Yohannisni hepsani wosiyaas tichchenaas kur'u sina wosi Yohannisnikin sinfaat tichchenaas dey kortera fa keerinynyaasiknawa naanggotbaasiknawa. Awuzakne dey isa atibiya betekiristaniisiknawa barissi feese baassokna sina aafa beyana wuza. Han kawuna wosiyaas tichchenaas wol shunosonek makoknawa esh assinynyani meeni assustan teetbesiison oodosonekwa.
Matsafaas Siruk Ephna Ephobaas
Zeemma 1-3
Keeshtana zuuttambaase asiistan denalo 4-6
Esha assuussin teetni ooda 7-11
Koor'u 12-13
1
1 Kortera fa keerinynyaasiknawa naanggotbaasikna betekiristanini kur'u sina taakin woste wosiya: ta futoosik nittotin shunfawungwe; ta ta sinnoynaron futooson arsefe baasso zuuttere nittotin shuneter. 2 Es futoos inno ganeyaassi faar; hanneen dey koi'ba foontonon innoneen ane foonirwa. 3 Aba Ha'oosewa Naa Yesus Kiristoosni otmaas, fakiyaasewa nagaase futoknawa keeshtanakna innoneen ane sinfawung.
Futonewa Keeshtanne
4 Naanggotneesikitosin isa isaas Abaas innotin ajajenaasimato futoosik chimma yersefeen danna boor'a akamanon giren. 5 Keerinynyaase! Hashnu adarawe; han neek tichifana tichaas gaddo ajaji sinna neek bestonaatawe; han neek tichifanaas: «Innotna innotna wol shunoni» yifa tesubaastan kabira innok imte ajajiiswe. 6 Futoni keeshtana uus Ha'oosi ajajinon zaguwe. Es ajajiis dey tesustan kabgira odetsetiisimato «keeshtanak footi» yifa barwe. 7 Yesus Kiristoos asu sinne yoobaason amanonor daagsisefe showo meya han daastak kabsete. Es effetena asus eshinynya dey Kiristoosnin tugga'efe barwe. 8 Sinuntano nitto tuuma waagnitiison ephphatootik chimtiwe; wosteti wostoos tishunoynamato aruti. 9 Kiristoosni assusik chimme foonoy barnawa basa assustan wokke hamfe barna Ha'oba aafawa. Sinuntano Kiristoosni assusik chimme yerefe barneen ane Abaasnawa Naasna feeseterwa. 10 Han assuuson ephnoy oonu nittoki yeefaanane keentiissi ephphatootita; naganu dey ooshshotiita. 11 Es asusin naga ooshshefe bar basa mangu wostooson haa'ertu sinana.
Koi'ni Nagani Ooshsho
12 Nittok tichunak sholena showo wuza faar; sinuntano zuuttambaase asin dabdabbek tichunak aane sholot; ese baristan giraniis tuuma sinanak nittoki yaara nittoneen ane uphera wollonak abdi zagifawungwa. 13 Kortera fa eetneesi naanggotaasikito naga neek ooshshesedifawe.