Wosi Phawulosni Hepsa Wosiya
Teselonqeki Asuni Meyak
Gachgiru
Kiristoosni hepsa yooni chowaasta kabi mamsuus shorko kabgit hamna boor'a Teselonqeki betekiristaniissi fa rakkoos arkit hami. Phawulos Teselonqeki asuni meyak tichina hepsa wosiyaas «Daamiis yoona wonaas kar'i» yifa amantoos zaggira maket faar. Phawulos dey Kiristoos yoobaasneen zeemma «Manguni asu» yistefe Kiristoosni tugga'efe basa zoonsiyaasik han daasta mangunewa jallinne arkit hamana yit baasso amantooson kaynuk kabe.
Wosiis feretife baasso shananewa rakkone baassosta arkifanaknu amantobesiisik zagusonek barnawa oom wostoni zomobaasakitona zagsefeesimato foobesiisik sholsiison danak chimme wostosonek; esiisimato dey ma'a wostooson wostet fooson beyonoytemato zaggire kiiti.
Matsafaas Sir Ephna Ephobaas
Gachgiru 1:1-2
Galatanewa adarane 1:3-12
Kiristoosni hepsa yoosik imte assu 2:1-17
Kiristinnani fooni kiito 3:1-15
Koor'uba 3:16-18
1
1 Aba Ha'oosir sina baassotnawa Daamni Yesus Kiristoosnir sina Teselonqeni betekiristaniisi feese amanynyini meyak Phawulosnik; Silasnikinnawa Ximotiyosnikinna woste wosiya; 2 Aba Ha'oniiskinnawa Daam Yesus Kiristoosnikinna otumnewa nagane nittok sinfawungwa.
Kiristoos Wolle Yeefena Kabaasik Imtoni Mangsuni Kar'a
3 Ayni meyane! Amantontiis wonna wonna dichet hambaasiknawa nittotna nittotna asi keeshtanaas dey daysit hamdifar sinna boor'ana Ha'ooson mai'sira galattonik sholsuwa. 4 Es bari boor'a awune faaronnu akama rakkonewa shanane nittoosta kar'fanaknu nitto aakkak faksetimatonawa amantonitisik dey aakkak chimesetimatona Ha'oni betekiristaniisikitoni ganeyaassi faani kabaasik nittoktu teetefeniwa. 5 Es bar zuuttambaase besifanaas Ha'oosi mangsuni kar'a futo sinbaasonnawa shana ephpha taaseti Ha'oosi taatosi giruk chimme hoorere feer zagukwa. 6 Ha'oos futok mangsu kar'ar sinna boor'a nittoosta shana katisefe baassosta shana teshok waagbesiison kaasunawa. 7 Hash shana ephpheteese nittok dey innoneen ane beysa imanawa. Es bar dey sinanaas Daam Yesus akama hugnabesi faana wosibaasikitoneen ane saman yeefena kabaasikwa. 8 Es kabaasik saamet di geyak Ha'ooson arunoy baassotinnawa Daamni Yesus Kiristoosni Misirachchuni kaamaasik ajajamonoy baassotinna ke'una. 9 Baasso Daamiisa sintannawa akama hugnabaasi ulfintanna oor kesere koi'ba foonto tishuni ke'o ephphetoosone. 10 Es wono Daamiis kortoni meyak ulfintonaknawa barik amanefe baasso zuuttambesiise asik diinqostonakna yeefena kabaasikwa. Nitto dey inno makeni zaalaason ephpha taara amaneseti boor'a kortoni meyaneen anetu faadtosotiwa. 11 Es baron safarok nitto chowaasik wonna wonna yeetunoy shiiphet faaniis Ha'oniis nittotin teegena teegoosik hoorer sinatiknawa ma'aron zaguk fa fiqadintiisewa amantoni wostontiison zuutire hugnabaasik koi'sunakwa. 12 Esiisimato dey Daamni Yesus Kiristoosni sunaas nittok ulfintonaknawa nitto dey Ha'oni sina Daamni Yesusni otmaasik kaputtera barik ulfintotiknatu shiiphefeniwa.