Wosi Phawulosni Hepsa Wosiya
Ximotiyosnik
Gachgiru
Phawulos Ximotiyosnik tichina han hepsa wosiyaas Pawulosnin tai'sonon argasi wostoni zoomobay sina na'o Ximotiyosnik imna kiitooson ephowa. Daysire dey kiitinaas fakiyak chinukwa. Ximotiyos kiitonewa chinuni kaama dannaas Yesus Kiristoosni chowaason amanamtok zaala makonak zaggire ephanaknawa awune faaronnu shanaasewa tugga'oose arkifanaknu assuusiknawa misirachuni kaamaasi makoni wostoosikna duudonakwa.
Ximotiyos arkiron teetbaason oodanak maktenaas gowwumak zagtefa sinnooy kirikiriissin wokanakwa. Es effatena wuzaas odefe baassotin tishkutano ooma ke'fana wuzaba aafawa.
Es wuza zuuttambaase asik Ximotiyos yadatonak sholsinaas Phawulosni kaasewa foose arkiron dey amantobaason; fakibaason; keeshtanbaason; chimbaasonnawa kabugtok basaasta kar'a shanaasi besok zoonustonakwa.
Matsafaas Siruk Ephna Ephobaas
Gachgiru 1:1-2
Ximotiyosnik imte kiito 1:3—2:13
Mormoni kabaasik amanamto sinne besto 2:14—4:5
Es kabaasik faase wuzaaasikkitonewa sholsu zoonsune 4:6-18
Koor'uba 4:19-22
1
1 Yesus Kiristoosnikin beste kaani abdiisik Ha'oosi fiqadik Yesus Kiristoosni wosi sina Phawulosnikin woste wosiya; 2 Shunto naata Ximotiyosnik; aba Ha'oniiskinnawa Daamni Yesus Kiristoosnikinna otumnewa fakine dey nagane neek sinfawungwa.
Ximotiyosnik Imte Kiito
3 Wonna wonna wonne waalne shiiphonaasik neen safarefana kabaasik ta abani meya zagsetesimato ta dey kayma kanuk barik wostefana Ha'ooson galattefawungwa. 4 Arafneeson yaadatedifawungwa; es bari boor'a akamanon gironak neen biyanak kaltefawungwa. 5 Neekik fa futoni amantooson yaadatedifan. Effatena amantoos zeemma afane Loyidniki dey intone Ewunqekiktu fawa. Neekik dey faanamato aringwa. 6 Es bari boor'a kushunaason neyista ta'ifana kabaasik neek imte geenimato sinna neyissi fa Ha'oosi imanon hepsa wolgira geenimato saamma daysit hamanak yaadatsifawungwa. 7 Ha'o innok imna imaas hugnanir, keeshtannir, dey teetni ha'suni Korto Ayyanatano digani ayyanatawa. 8 Ese Daamniisa chowanon makooson iichchotaata. Basa boor'a taatere fe taak dey iichchotaata. Sinuntano Ha'o neek imana hugnaasik misirachchuni kaamaasi boor'a yooni shanaason ephphatowa. 9 Bar inno zagini ma'a wostok sinnoynamato teetbaasi shunaknawa otumbaasikna innotin fati. Korto sinna foonik innotin teege. Es otmaason neyaneen sinak Yesus Kiristoosniki kamo innok imi. 10 Es otmaas innotin fati Yesus Kiristoos yoobaasik ammanon beste. Bar kituusi hugnanon tishkire misirachchuni kaamaaski kamo kitunoy koi'ba foonto kaa ammanon innok besi.
11 Ta dey es misirachchuni kaamaason makoni wosi; assinynya sinna teegten. 12 Han rakkooson ephphataat faanaas es bari boor'awa. Sinuntano oonin amanenamato arifana boor'a aafa iichchonawuza. Ta imna adaraason Kiristoos wolle yoona kabaneen bar ooda chimanamato arifawungwa. 13 Taakin arita amanamto kaamaason beso zagira Yesus Kiristoosnik fa amantoosiknawa keeshtanaasikna oodwa. 14 Innoossi faafa korto Ayyanaaski kamo neek imte ma'a adaraason oodwa.
15 Iisiyani awurajjaassi fe baasso zuuttere taan beyye hametemato arifatwa. Baasso ganeyaassin Figelusnawa Hermogenesna feeseter. 16 Daamiis Onesiforni keerki meyak fakibaason imawowa. Bar showo wona taan chini. Taatonaasiknu aane iichchowe. 17 Roomki katama yeena kabaasik dey sholefe sholefetu taan dani. 18 Mangsuni kar'ni wono Daamiis fakibaason imawowa. Efesonuk faana kabaasik awune faaron taan argasinamato ne teetneesik mai'sira arifatwa.