Wosi Phawulosni Wosiya
Efesonki Asuni Meyak
Gachgiru
Phawulos Efesonuk feese asuni meyak tichina wosiyaasi tesuni alamabaas: «Ha'oosi koppo wostota feeshanak samaknawa han daastakna faase testoosikito zuuttera isa daa wolla isa Kiristoosni ha'suusi sikalosi foona wonaas yoonakwa» (1:10). Es baristan daytonon dey Kiristoosneen ane isar sinak asuni zala zuuttera isar sinanak han akama koppooson wostota feeshusonek Ha'oni asuni meyanon yaadatsukwa.
Efesonni wosiya tesuni bagtoostak tichi bar isar sinni chowaason tichunak kabina safarbaason taggire Aba Ha'oos darabaasin aakkak korinamato; Nawuba Yesus Kiristoosniki kamo boor'besiisi fakiyanon aakkak danetematonawa birmadu kesar sinonekna Ha'oosi akama abdini kaamnimato Korto Ayyanaaski kamo aakkak futo sinna artenamato yaadatsonektu zagi. (Edde 1-3).
Hepsani tichaasi bagtosi dey tichi bar han tichaason feretisefe baasso isarik feesete kabaasik Kiristoosnik fa isar sinobesiis futo sinanak aakkak fo chimosonematotu yaadatsife. (Edde 4-6).
Asuni meya Kiristoosniki kamo fa isarbesiisik baassotna baassotna aakkak foosonemato showo tesa besoni kaamak besi. Betekiristaniis atu sinfana kabaasik Kiristoos atuusik teetwa. Betekiristaniis shu'ni keenimato sinfana kabaasik Kiristoos es shu'ni keyaasi kajjani shu'wa. Betekiristaniis keerinynyanimato sinfana kabaasik Kiristoos teegonimatowa. Tichi bar Kiristoosniki kamo ammanon kessa beste Ha'oosi otmanon akamanon diinqok dajefena kabaasik akamanon doo'o safaraba faana yaada imet feer; zuuttambaase asin biifenaas Kiristoosni keeshtanaasik; basa maa'a sinaasik; fakiya zagubaasik; barki kamo beste otmaasewa nagaase asikwa.
Han Matsafaas Siruk Ephna Ephobaas
Gachgiru 1:1-2
Kiristoosnawa Betekiristaniise 1:3—3:21
Kiristoosniki kamo bestoni gaddo kaa 4:1—6:20
Koor'uba 6:21-24.
1
1 Ha'oni fiqadik Yesus Kiristoosni wosi sina Phawulosnikin; Yesus Kiristoosnik amanamto sina Efesonuk feese kortoni meyak; 2 Aba Ha'oniiskinnawa Daam Yesus Kiristoosnikinna ottumaasewa nagaase nittok sinfawungwa.
Kiristoosniki Kamo Bestefa Ayyanani Eebba
3 Den samak fa Ayyanani eebba zuuttambaase asik Kiristoosniki kamo innotin eebbisi Daamni Yesus Kiristoosni aba sina Ha'oosik galata sinfawungwa. 4 Kortonawa zinaba foontona sinanik han daas testonoyfeen zeemma Kiristoosniki kamo innotin kori. 5 Ha'oni ma'a fiqadi sinin Yesus Kiristoosniki kamo bari naanggota sinanik zeemma keeshtanbaasik innotin kori. 6 Es baron dey zaginaas shunto nawubaaski kamo baak innok imna ulfinto otumbaas galatamtonakwa. 7 Es baron dey zaginaas Ha'oosi otumni arkutan kabi chowa innotin shunna Nawubaasa hannak furtera miir'aniisi fakiyanon danni. 8 Techma zuuttambaase asiknawa yaadatakna; 9 Ha'oos alamabaasik Kiristoosniki kamo zeemma koppa'enamato fiqadibaasi aacho chowanon arunik zagi. 10 Wonbaas kar'fana kabaasik wostota feeshuna koppobaas samakanawa han daastakna faase testo zuuttambaase isarik isa Kiristoosni ha'suni sikalosi sinanakwa. 11 Zuuttambaase asin fiqadibaasi kiitonimato wostefa Ha'oos zeemma innok koppa'ena kopposimato Kiristoosniki kamo basa keen sinanik innotin kori. 12 Es bar dey sinnaas Kiristoosnin abdini zaguk tesunir sina innoki kamo Ha'oosi ulfina galatamtonakwa. 13 Nitto dey futoni kaamaason; es bar dey faruni misirachchuni kaamaason odera amaneti kabaasik nittok abdi girte Korto Ayyanaasik maatama ichchetiwa. 14 Es Ayyanaas ulfinbaasik galata sinanak Ha'oos barir sina baassotin zuutira furona kabaneen dananik fa ristiniisik kabdiniwa.
Phawulos Efesonki Asuni Meyak Shiiphe
15 Es bari boor'a Daamni Yesusnik fa amantontiisewa kortoni meya zuuttambesiise asik fa keeshtannitiise asin odera; 16 Shiiphonaasik nittotin yaadatet nitto boor'a Ha'ooson galattoson aane beyut. 17 Ulfinni Aba Daamni Yesus Kiristoosni Ha'ooson mai'sira arusotik techumnewa amma kisire biini ayyanaase nittok imtonak shiiphefawungwa. 18 Esiisimato awune fa abdik teegtesetimatonawa kortoni meya warasonek fa ulfinto ristiis awune fa akama sinnamatona arusotik nibnitiisi aafa gachchonak shiiphefawungwa. 19-20 Hoosustonooy akama hugnabaas amanefe innok awune fa inya sinbaason arutik shiiphefawungwa; es akama hugnaason wostok besinaas kitun kabgira samaki dimaastaki oi'ta teshbaasta duusina Kiristoosniki kamowa. 21 Aba Ha'oos Kiristoosnin samaki oi'ta teshbaasta duusinaas aaffa ha'sutanawa ha'suni hugnaastana dey hugnanewa Daam sinaastan denalone dey esiisimato han daastak koi'ba sinnoynaron yooni daastak sunaneen denalo sina suna immawa. 22 Ha'oos zuuttambaase basa ha'suusi sikalosi ha'unak zagi. Betekiristaniisik dey zuuttambaase asiistan denalo sinanak teet zagi. 23 Betekiristaniis dey bar zuuttambaase asin aaffa ugnaknu zuutire tuunifena basa tuuma atubaaswa.