Wosi Phawulosni Wosiya
Galatiyaki Asuni Meyak
Gachgiru
Yesusni fatuni chowaasik makefa Misirachchuni kaamaas dima dimaassi maktet Aazab sina asuni meya dey kaamaason ephpheteeset hamobesiise: «Kiristana sinak Museni tumaason wostota feeshu sholsungwa wedey aanenso?» yifa mamsuus dey es barneen ane kabi; hate Iisiya sina Roomawini meeni ha'suussi fa Galatiyak faase Betekiritaniisikitoni ganeyasi: «Asu Ha'oosi sina Ooko sinanak Yesusnik amanoos bar bar koi'ba sinnoynaron Museniki kamo imte tumaason zagunak sholsifa» uuk Phawulosnin tugga'set feese asuni meya feeseter.
Phawulos han Galatiyani wosiyaason tichinaas han esha assusik ek hang yit fe asuni meyanon futoni amantooskinawa futoni kiristanani meeni fooskina zoonsukwa; Phawulos Yesus Kiristoosni wosi sinbaason mai'sire makoktu jammare. Wosi sinanak barin teegees Ha'oostano asu sina beynamatonawa bar wostere yeenaas Aazabni meyak sinnamato kotte makefe; han matsafaasi koi'ni eddeesikitosi kiristinnani kaas bestefanaas Yesusnin amanok bestefa keeshtanaaskin kesar sinnamatotu kotte make.
Matsafaas Siruk Ephna Ephobaas
Gachgiru 1:1-10
Phawulos wosi sinnamato besifa ha'suni hugna 1:11—2:21
Ha'oosi otmani misirachchuni kaama 3:1—4:31
Kiristinnani birmadummanewa amantone 5:1—6:10
Koor'uba 6:11-18.
1
1 Asunikin wedey asuniki kamo woste wosiyak sinnoynaron Yesus Kiristoosniknawa barin kitun kabgi Aba Ha'oosikna wosi sinne woste ta Phawulosnikin; 2 Dey taneen ane feese ayni meya zuuttambesiise asiiskin Galatiyak faase betekiristaniisikitok woste naga, 3 Abani sina Ha'oniiskin Daam Yesus Kiristoosnikin Ha'oosi otumnewa nagane nittok sinfawungwa. 4 Han mangu neyaassin innotin fu'onak Ha'oniisi fiqadinimatonawa Abaniisa fiqadinimatona Yesus Kiristoos showo boor'niisik teetbaason aatire imi. 5 Koi'baneen koi'ba foontonon Aba Ha'oosik ulfina sinfawung! Aamin.
Futoni Misirachchuni Kaamaas Isarwa
6 Kiristoosni otmaasik nittotin teege Ha'ooskin ekka taptera oor kesnitiisewa ooma misirachchuni kaamaaski woluntiise taan diinqisiwa. 7 Es baron yinaas nittotin daagsiserenawa Kiristoosni misirachchuni kaamaason elingsuk sholsefe isa isa meya feeseter sinna boor'atano ooma misirachchuni kaama aafawa. 8 Sinuntano innonu sinfenik wedey samaki Ha'oosi wosiyanu sinfanak inno makeni misirachchuni kaamaastan ooma misirachchuni kaama nittok makefaanane erwutto sinowa. 9 Zeemo sinak makenaasimato hash dey hepsa makefawungwa; nitto ephpha taaseti misirachchuni kaamaastan ooma misirachchuni kaama oonu nittok makefaanane erwutto sino. 10 Eekan ta sholefanaas asu taan galattonakoso? Wedey Ha'oos taan galattonakoso? Wedey asunin girsunak sholenar sinna nittok bestewoso? Asuni meyanon girsunak sholet faanar sinafaanane Kiristoosni wostinynya sina beyana kabawa.
Phawulosni Wosi Sinne Teegto
11 Aytaasakitono! Ta nittok makena misirachchuni kaamaas asunikin bester sina beynamato arsotik sholefawungwa. 12 Han misirachchuni kaamaason Yesus Kiristoostu taak ammanon kisire besitteno aaffe asunikinu aane ephut wedey aaffe asunu taan aane assuwe. 13 Zeemo Ayhudni amantoosik zoonustefana kabaasik aakkak faanamato nitto odesetiwa, Ha'oosi betekiritaniison akamanon kabgira tishkunak kabet faanar. 14 Ayhudni amantooson oodak es neyaasik feese Ayhudni meya zuuttambesiise asiistan ta denalowa; abani meeni dubbiyoosik dey akamanon koonet faanar.
15 Sinuntano koontonasneen zeemma Ha'oos taan kori; otumbaasik dey taan teege. 16 Aazabni meyak Naasa chowani misirachchuni kaamaason makonak Ha'oos Naabaasin taak ammanon besunak buggina kabaasik geregere ooneennu aane merkot. 17 Wedey tayistan zeemme wosi sina baassotin uphonak Yerusalem aane hamut. Sinuntano zeemma Arabani meeni daatu hamin. Hepsa dey Demasko wolin. 18 Tusira dey keez wogganeen orfo Keefa yistefe Phexirosnin biyanak Yerusalem hamin. Estak dey barneen ane asire uuchche wona diin. 19 Daamiisa ay Yaqobnintu biintano oom wosini meyaassin ooninnu aane biyut. 20 Han ta nittok tichifana bar esha sina beybaason Ha'oosi sina nittok chinira makefawungwa. 21 Esseen orfo Soriyani daastanawa Qiliqiyani daastana hamin. 22 Yuudani daasta faase Kiristoosni betekiristaniisikito taneen ane aafe aafe biire aane arsoto. 23 Baasso odesetees: «Es zeemoti innotin kabgit fe asus es tishkunak kabina amantooson hash wolle makedifewa» yifa kaamaason koi'bawa. 24 Ta boor'a Ha'ooson galatteset feeseter.