Ibrawini Meyaki Woste Wosiya
Gachgiru
Han wosiyaas tichchenaas amanynyini meyaasta akama tugga'o kar'na boor'a amantobesiison beyonoytemato teetnitiison aruti uknawa chinuknawa; han tichaason tichi bar Ibrawini meeni amanynyini meyak Yesus Kiristoos futo dey Ha'ooson ammanon kesire besir sinbaason besunak. Es amanynyini meya amantobesiisik zagusonek baassotin chinidifer. Es baron dey zagifena kabaasik keez futo ammanon kisire besi:
1. Ephpheteena shanaaski kamo Abaasik futok ajajamter sina Yesus koi'ba foonto Ha'oni Naawa. Ha'oni Naa sinbaasik kur'u teyyani kaamaasi raajjuni meya; Museniistannawa Ha'oosi wosiyaasikitotanna bar akamanon denalowa.
2. Yesus kur'u teyyani kaamaasi maagni meyaastan akamanon denalo sina koi'ba foonto maag sinbaason Ha'oos teetbaasik makewa.
3. Yesusniki kamo amanynyini meya boor'aassin, digaassinnawa kituussinna fui'tosone. Yesus maagni meeni maag sinbaasik Ibrawini meeni amantoosiknawa sitiriisikna kaabare yere waagni maa'aas yiraranimato sinna biistet fa faruus futo sinanak zagi.
Han tichaason tichi bar Israelni meeni tochoossik arto sina asuni meeni amantooson beso zagire ke'ak (eddeba 11) feretisefe asuni meya amantobesiisik zagusonek yaadassidifer. Esiisimato edde 12 feretisefe asuni meya aafbesiison Yesusniista zaguk amantobesiisik zagusoneknawa aaffa shanewa rakkone baassosta kar'fana kabaasik fakusonektu kiitife. Koi'baastak dey kiitonewa teetnitiison oodti yifa kaamne makok wosibaason koor'i.
Matsafaas Siruk Ephna Ephobaas
Gachgiru: Ha'oos Kiristoosniki kamo ammanon bestobaas Edde 1:1-3
Kiristoos Ha'oosi wosiyanikitotan denalo sinnamato Edde 1:4—2:18
Kiristoos Museniistannawa Iyyasuniistanna denalo sinnamato Edde 3:1—4:13
Kiristoos maagiisatan denalo sinbaas Edde 4:14—7:28
Kiristoosni teyyani kaamaas denalo sinnamato Edde 8:1—9:22
Kiristoosni maa'a sinnaas arkira beste; Edde 9:23—10:39
Amantoosi akama sina Edde 11:1—12:29
Ha'ooson girsu Edde 13:1-19
Koi'ni shiipho Edde 13:20-21
Koor'uba 13:22-25
1
Ha'oos Nawubaaski Kamo Make
1 Ha'oos zeemoti neyaassi showo ugnak; raajjuni meyaki kamo inno abani meyak showo kaba maket faar. 2 Sinuntano hash orfoti neyaassi zuuttambaase asin warasonir zagina nawubaaski kamo innok make. Han daason dey zuuttambaase asin tesinaas barikwa. 3 Bar Ha'oosi ulfinanon palpalgire besir. Bar haalabaasik Ha'oosneen ane mai'sire isarwa. Kaambaasi hugnak han daason zuutire teebbe ephiwa. Asuni meyanon dey boor'besiissin kayimsinanneen orfo samak hugnaba faana Ha'oosi ho'itta di.
4 Barik imte sunaas Ha'oosi wosiyani suntan denalo sinnamato Ha'oosi Naa Ha'oosi wosiyatan akamanon denalowa.
Ha'oosi Naa Ha'oosi Wosiyatan Akamanon Denalo
5 Ha'oos bari wosiyaasi ganeyasin:
«Ne Naatawa;
hawung neen koonin»
hepsa dey: «Ta barik aba sinana;
bar dey taak Naata sinana»
yinaas oonininso?
6 Ha'oos uuzza Nawubaasin
han daasta wosifana kabaasik;
«Ha'oosi wosiya zuuttera;
barik sagadona» yifawa.
7 Sinuntano Ha'oosi wosiyani chowaasik;
dey: «Ha'oosi wosiyanikitonon Ayyananikito;
Ha'oosik wostesefe baassotin;
dey geeni winonikito zagunir» yifawa.
8 Sinuntano Naasa chowak;
«Ha'oose; zigimunees koi'ba foontonon foonir;
taatonees dey ookoni haaro.
9 Ookooson shunit; manguuson dey oomtet;
es bari boor'a Daama Ha'onees;
omoneesatan denalonon gira;
imfa muudak neen muudi» yifa.
10 Esiisimato dey:
«Daamiiso! Ne zeemma daason tesitwa;
samaasikito dey kushuneesi wostowa.
11 Es barikito zuuttera tishunir;
sinuntano ne footar;
zuuttambaase maamnimato kur'una.
12 Maamnimato zagira biruta;
barikito dey maamnimato sinna sooltona;
sinuntano ne aagene aagene sinfanak;
ne; neneesik koi'ba aafa» yifa.
13 Ha'oos bari wosiyaasikitoni ganeyasin:
«Gumaneesakitonin wochoneesi;
sikalosi zaguna kabaneen;
ta hoi'ta teshaasta duwa»
yinaas oonininso?
14 Eekan Ha'oosi wosiya zuuttera faruni asuni meyak wostonak wostera ya Ha'oni wostinynya sina Ayyananikitotanoso?