3
Yesus Museniistan Denalo Sinnamato
1 Es bari boor'a samaki teegtooson haa'onir sina korto aytaasakitono! Amantoniisi wosi sina barinnawa maagni gaanynye meeni gaanynya sina Yesusninna safarotiwa. 2 Muse Ha'oosi keya zuuttambaase asiista amanamto sinnamato Yesus dey barin taatsi Ha'oosik amanamtowa. 3 Keyaason keer'fe bar keyaastan denalonon ulfinba faanamato Yesusnik dey Museniistan denalonon ulfina sholsirwa. 4 Futoosik keya isarba isarbaasik baron keer'a asuba feerwa. Sinuntano zuuttambaase asin keer'aas Ha'ooswa. 5 Hanneenti maktoni wuzaasik zaala sinanak Muse Ha'oosi keya zuuttambaase asiista wostinynyanimato amanamto sinne feer. 6 Sinuntano Kiristoos Ha'oosi keeruk amanamto sinnaas Naanimato sinnewa. Es keyaas dey innowa. Bari keya sinaniis amanefeni wuzaasewa teetefeni abdiise asin mai'sira ephfaninewa.
Ha'oni Asunik Imte Ke'oni Kiito
7 Es bari boor'a korto Ayyanaas makefanaasimato:
«Hash hawung kaambaason odefeti kabaasik;
8 Zaboossik fattantefeti kabaasik;
manguk tayista kabseteesimato;
nibnitiison ephphetoo beyar zagutiita.
9 Es kabaasik zeemoti abantiisakito taan fattanesete;
Dey taan tu'nisete;
Acheechasir wogga zagina baron dey biyete»
yifawa Ha'oos.
10 «Es bari boor'a es koontoosta haaren:
‹Nibbesiis wonna wonna daagettu faafa;
ugunnaason dey aane arsoto› yingwa.
11 Dey:
« ‹Ta baassok imanak fa beysani dimaasta;
isanne aafa girsone wuza!› yira;
gi'naasik teyingwa» yi.
12 Aytaasakitono! Nitto ganeyaassin oonu hayewa Ha'oostan woksuni mangunewa amanonoy nibne foonoynamato teetnitiison oodtiwa. 13 Es baristan denalo nittoossin boor'aasik eshtere nibbaason ephpha too beyar zagunoynamato: «Hash hawung» yistera teegte wonaas faana kabaasik wonna wonna merkotiwa. 14 Tesustak fa amantoniison hamma koi'baasta kar'ana kabaneen zaggira ephfaanine Kiristoosneen ane warasertu siinani.
15 Esiis dey:
«Hash hawung kaambaason defeti kabaasik;
es nuurifeti kabaasik zagsetiisne faaron;
nibnitiison ephpha too beyar zagutiita»
yistera maktenaasimatowa.
16 Eeka es baasso kaambaason odesetenneen orfo nuuriis oona oonanso? Es baasso Muse zoonsin Giphtsini daastan kesa baasso zuutteretenoso? 17 Ha'ooson acheechasir wogga tuumanon gi'tonak zagit feesees oona oonanso? Es baasso boor'a woste baassonawa dugnobesiis ichma daassi gandera fu'tena baassotenoso? 18 Dey es ajajamo beya baassotin sina shakaanane: «Beysanaaski aafa girsone wuza» yira teyinaas oona oonanso? 19 Ese giru chima beyetees amanto beyobesiistan kabi chowa sinbaasontu biifeniwa.