Yaqobni Wosiya
Gachgiru
Han Yaqobni wosiyaas wonna wonnati fooniisik zoonsiya sinni safaraba epho sinfaat tichchenaas han daasta siktere feese asire heppe asteserisikitokwa. Tichi bar techmaason ammanon wostota feeshuni ugnaason; kiristanani wol irbasit foonewa amalane asik zoonsiya sinni wuzasikitonon amma sina besoba faana wollak makefe. Tukam sinni chowaasewa otum sinni chowaase; fatanani chowa; ma'a amalani chowa; koonani chowa; amantonewa ma'a amalane; termani mai'newa mangune; techumni chowa; wol faassoni chowa; beegantonewa garamne asi chowa; oomiisata mangsuni kar'ni chowa; teetoni chowa, fakini chownewa shiiphone; kiristanani meya zagsonek sholsifa giddine asin isarba isarbaasik kotte tichi.
Wosiyaas kiristinnani kaani amantonewa wostota feeshuni chowaason mai'sira besifa.
Matsafaas Sir Ephna Ephobaas
Gachgiru 1:1
Amantonewa techumne 1:2-8
Tukamanewa otumne 1:9-11
Fatana 1:12-18
Ha'oosi kaamanon odonewa zagune 1:19-27
Koru zagtonoynamato imte kiito 2:1-13
Amantonewa wostone 2:14-26
Kiristananawa terumbaase 3:1-18
Kiristananawa han daase 4:1—5:6
Showo tesa wuza imte kiito 5:7-20
1
Yaqobni Wosiya
1 Daasi biratota boktere feese asire heppe asteserisikitok Ha'oosirewa Daamni Yesus Kiristoosni wostinynya sina Yaqobnikin woste wosiya; naga nittok sinfawung.
Amantonewa Techumne
2 Aytaasakitono! Showo tesa fatana nittoosta kar'fana kabaasik nittotin girsuni wuza dantinne faar zagira faaduti. 3 Amantontiisi fattanto fakiyak chimme fooson arutikwa. 4 Fakiyak chimme foontiis isanne yo'unoynamato tuum sinna footik zagir sinungwa. 5 Nitto ganeyaassi techmaba yo'ina asu feefaanane korunoy garamak imfa Ha'ooson shiiphowowa. Bar dey imanawa. 6 Sinuntano hep safaraba feena bar siru tugaan ekna hangna shorket kuni baarini akane feer sinna boor'a ek hang unoy amantok shiiphowowa. 7-8 Hep safaraba feena bar ugunbaastak ekna hangna shorket yerefe bar Ha'ooskin isa wuzane danninne faar sinna barik bestonaatawa.
Tukam Asunawa Otum Asuna
9 Foobaasik tukam sinne fe ayiis Ha'oos barin den teggunir sinna boor'a girowowa. 10 Esiisimato dey foobaasik ottere fe ayiis Ha'o daa kessaanane girowowa 11 Asuni otma kuwani fur'nimato woottonir; awa kiichifana kabaasik kuwaasonnawa fur'asonna ichinsir; fur'aas dey woottera gadabaas tishir. Esiisimato otum asu wostok ek hang yifet tishifewa.
Asuniista Kar'fa Fatana
12 Fatanaason fakiyak chima barik Daamiis abdini kaambaasimato Ha'ooson shunefe baassok kaani akililiison imana. Es bari boor'a fatana basaasta kar'fana kabaasik chimme aatfe asus suustowa. 13 Ha'oos mangu wuzak aane fattantefa; esiisimato bar dey ooninnu mangu wuza zagunak aane fattanefa. Es bari boor'a oonu sinfaanane fattantefena kabaasik: «Ha'oos taan fattanewa» unatawa. 14 Sinuntano asu teetbaasi mangu eenantok zatterenawa eshtefena kabaasiknatu fattantefewa. 15 Estan mangu eenantobaas naanertera boor'aason koonifa; boor'aas dey dichcha kitu teshshefa. 16 Keeshtefana aytaasakitono; eshtotiitawa. 17 Ma'a imaasewa tuuma eebbaase zuuttera den Ha'ooskingwa. Es bar dey yiraranimato shaatonoy wedey sooltoba foonto chaarefni aba Ha'ooskingwa. 18 Ha'o testo zuuttambaase asi uuzza sinanik bari fiqadiisimato futoni kaambaasik innotin tanewa.
Odeni Baron Wostota Feeshu
19 Keeshtefana aytaasakitono! Asu isarba isarbaas odok tapter sino. Wolloknawa gi'tokna taptonor sino.
20 Esiis dey asuni gi'a Ha'oos sholefana ooko sinne fooson foonik aane zagifa. 21 Es bari boor'a kiinaasonnawa tuumma fa manguusonna zuutira nittoostan woksaat Ha'oos nitto nibaassi kunsina kaantiison fatuk chimni kaambaason ma'a nibak ephphatooti.
22 Kaambaason odere wostota feeshir sintitano teetnitiison eshet baak oder sinatiita. 23 Kaambaason odere wostota feeshunoy asu teetbaasi gitonon inkaliissi*Inkal uus mastodi biya asune feerwa. 24 Es asus aafbaassi biire hamfaat geregere dey bar awunefeer sinnamato daagefe. 25 Sinuntano birmadumma kisuni yo'uba foonto tumaason gasasire biire barik chimme fe bar odere daager sinnoynamato wostota feeshife bar wostefena wostoosik suustowa. 26 Terumbaason oodnoy: «Ha'oosontu shiiphedifanr» yife asus teetbaasontu eshfewa. Basa Ha'oni shiiphoos dey waagba aafawa. 27 Aba Ha'oosi sina kiinba foonto shiiphoos: «Aba intobaas kitina naanggotaasikitonon; esiisimato dey teegobesi kitina mashkasusikitonon rakkobesiisik argasu; teetniison dey han daastaki fa kiina wuzaassin oodawa.»