Yohannis Tichina
Daamni Yesus Kiristoosni Misirachchuni Kaama
Gachgiru
Yohannis tichina Misirachchuni kaamaassi Yesusnin chowaason besunak sholenaas asha mayye asuni meeni ganesi beste hayewa Ha'oni kaama sinbaason ammanon besukwa. Matsafaas teetbaasik makefanaas han misirachchuni kaamaason feretife baasso Yesus fatunir sinne yoonir yiste Ha'oni Naa sinbaason amanosoneknawa barik amanosobesiisik koi'ba foonto kaa danosonematona yaadatosonekwa. (20:31).
Misirachchuni kaamaasi tesuni dimaas koi'ba foonto Ha'oosi kaamnewa Yesusna isar sinobesiison gachgiru zagire besi. (Eddeba 1:1-18) Estan Yesus fatunir sinne yoonir yiste Ha'oni naa sinbaason besifa showo tesa biistera artonoy wuzasikitonontu makefa. (Eddeba 1:19—12:50) Estan es biistera artonoy wuzaasikitosin aro buu'a bestenamato besifa tochooson tusira makefa. Es tesuni dimaas makefanaas isa isa asuni meya Yesusnik amanesere basa zoonsi sinobesiison; oomni meya dey aakkak tugga'setematonawa barik aafa amanoniwuza yisetematonawa. (Eddeba 13-17) Yesus oottena wono waalin nawoni meyaneen awune fa tai'so isarbesi faanamato suuttona wonaasik hoossuni kaamnewa chinuni kaamne baassok makenamatotu makefa. Koi'ni eddeesikito Yesusni oottosonnawa mangsu katonak ta'baasonna; basa suuttosonnawa kitun kabubaasonna; esiisimato dey kitun kabinanneen orfo nawoni meyak ammanon bestobaasontu makefa. (Eddeba 18-21).
Yohannis Yesus Kiristoosniki kamo bestefa koi'ba foonto kaason teggira besifa es Ha'oosi otma hawungneen kabira Yesusnin ugna zagire; futo zagire; kaa zagire ephpheteesefe baassokwa. Yohannisni misirachchuni kaamaason ooma zagifaas ayyanak foosi futonon assuk arto wonna wonnati foosik ephpha ke'feni wuzasikitonon; esiis dey aka, tusha, chaarefa, keemer, fantunikito, wayinini tokonewa wayinini gaanane fa wuzasikitonon beso zagire ephphe ke'baaswa.
Matsafaasi Siruk Ephna Ephobaas
Gachgiru; 1:1-18
Haphqife Yohannisnawa Yesusni tesuni nawoni meena 1:19-51
Yesus ammanon wosto jammarobaas 2:1—12:50
Yerusalemniissinawa biratobaastaki wostobaasi koi'ni wonaasikitona 13:1—19:42
Daamiisa kitun kabunewa ammanon bestobaase 20:1-31
Koor'ubaas: Galiilak hepsa nawoni meyak ammanon bestobaas 21:1-25
1
Yohannis Tichina Ha'oni Kaani Kaama
1 Zeemmaneen kaam feer. Bar dey Ha'ooskitu fe; Kaamiis dey Ha'o; 2 Bar dey zeemme Ha'oosneentu fe. 3 Zuuttambaase bariktu teste; teste wuzaas zuuttera barki kamotu teste; isa wuzane barneen gerakalo tester aafa. 4 Kaa barki faar; es kaas dey asunik chaarefa sinna faar. 5 Chaarefaas talmaassi chaarsir; talmaas baron aane merowa.
6 Ha'ooskin wostere ye sumba Yohannis yiste isa asu feer. 7 Zuuttambesiise barki kamo amanosonek bar chaarefaasi chowanon zaala makonaktu ye. 8 Chaarefaasi chowanon zaala makonaktu yeeteno bar chaarefte.
9 Asu zuuttambaase asik chaarsuni futoni chaarefa han daasta yaadifar. 10 Han daasta feer; han daas bariktu teste; sinfanaknu han daas aane ephphatowa. 11 Basa keen sina baassoki ye; sinuntano baasso barin aane ephphetoosoto. 12 Sinuntano ephpheteesere sunbaasik amanefe baasso zuuttere Ha'oni naanggota sinonek mabti imi. 13 Baasso Ha'oni naanggota sinetees asuni tumak wedey hannakin wedey ashakin wedey teegoni fiqadik aane koontosoto. Baasso koontesetees Ha'okingwa.
14 Kaamiis asha sinne inno ganeyaassi ha'i. Inno dey Ababaaski feena kabaasik fa ulfinbaasne fa isa naa bar basa ulfinaason biini. Bar dey [Ha'oni otumaknawa futokna tuum]. 15 Yohannis basa chowaason zaala maket: « ‹Ta orfoosta yooni bar taneen sinak feer. Tayistan dey denalo› yira makenaas barwa» yire chaagi. 16 Basa tumaastan inno zuuttamniise otmaasta otma daysira ephphataani. 17 Tumaas Museniki kamo imte. Sinuntano otumnewa futone Yesus Kiristoosniki kamo ya. 18 Ha'ooson biyar oonu aafe. Sinuntano abani sina Ha'oosneen fe isa naas bar bar Ha'oos oo sinnamato innok ammanon besi.
Haphqife Yohannis Makena Zaala
19 Ayhudni meeni ha'sinynyani meya Yerusalemun maagni meenawa baassotin argassefe Lewini meena asin Yohannisniki wosisere: «Ne oonso?» yire mamussisete kabaasik makena zaalni kaamaas haniiswa. 20 Bar dey aachunoy: «Yoonir yiste muudtos tatewa*Muudtos uus Mesi wedey Kiristoos.» yire ammanon make. 21 Baasso dey: «Eekin ne oonso? Eliyasnoso?» yire mamussete. Bar dey: «Indaanewa» yire wolgi. Baasso dey: «Eekin raajjunoso?» yisete. Bar dey: «Indaanewa» yire wolgi. 22 Baasso dey: «Eekin ne oonso? Innotin wosi baassok hamma makonik ne teetaason oo yifasso?» yisete. 23 Bar: «Raajju Isayyasniissi maktenaasimato ‹Daamiisa ugnanon zeep'ti› yire ichma daassi chaagfe asusa kaamatawa» yi. 24 Baasso wostere yeesetees Ferisawini meyakin. 25 Baasso dey Yohannisnin: «Ese ne Kiristoos wedey Eeliyas wedey yoonir yiste raajjuus sina shakaatane awuniron haphqidifa?» yisere mamussete. 26 Yohannis wolgire: «Ta akaktu haphquna. Sinuntano nitto arunoytir ganentiissi yereferwa. 27 Ta orfoosta yooni basa chaa'maasi taar'anon kotak sholsunoynar barwa.» 28 Han bar zuuttera sinnaas Yohannis haphqit feena Yordanosni akaasi yesalo awa kesnarki fa Bitaniyaktu sini.
Ha'oni Fantu
29 Wonotirik Yesus Yohannisniki yeefeen biyaat ekka yi: «Ese han daasta fe asusa boor'anon baassostan tishkuni Ha'oni fantu 30 ‹Ta orfoosta yooni bar taneen sinak feer. Tayistan dey denalo› yira makenaas barwa. 31 Tanu es yooni barin aane arifatwa. Sinuntano ta akak haphqit yaanaas Israelni meyak barin arsonekwa.» 32 Yohannis ekka yire zaala make: «Korto Ayyana saman nakalone faar sinna basaasta kerefeen biin. 33 Akak haphqunak taan wosi bar: ‹Korto Ayyana kerefeennawa basaasta diifeenna biyata bartu Korto Ayyanak haphquniiswa› yira makena kabaneen tanu aane arutwa. 34 Ta dey biina boor'a bar Ha'oni naa sinbaason zaala makefan.»
Tesuni Yesusni Nawoosakito
35 Wonotirik Yohannis hep nawobaasneen esta yerefer. 36 Yesus estak aatfeen Yohannis biyaat: «Ese haniis Ha'oosi fantuwa» yi. 37 Hep Yohannisni nawoosakito Yohannis es baron makefeen odesefaat Yesusni orfoose hamete. 38 Baasso Yesusni orfoose hamefeen yerqere biyaat «Awu sholedifetirinso?» yi. Baasso dey: «Rebi! Ayinso faafatari?» yisete. (Rebi! Uus assinynya uu.) 39 Bar dey: «Yaara biitiwa» yi. Hamere feefenamato biyere Es wono ane feeshete. Es kabaasik dey wonni asir sa'ati sinana. 40 Yohannis makena kaamaason odere barneen ane hame nawoosasin isa Simon Phexirosni ay sina Andriyas feer. 41 Bar zeemme ayba Simooniki hamme: «Mesiisin danniwa» yi. Mesi uus muudto uu. 42 Yesusniki dey ephphe ye. Yesus barin biire: «Ne Yona'ani Simoonwa, ne hawungneen ekalo ‹Keefa› yisteratu teegtotawa» yi. Kotbaas dey «Phexiros wedey Inya shu'a» uwa.†Girikni kaamak «inya shu'a» uu «Phexiros».
Yesus Filiphosninnawa Naatinaelninna Teege
43 Wonotirik Yesus Galiila hamanak shole. Filiphosnin dey danne: «Taneen ane hamniwa» yi. 44 Filiphoos dey Andriyasnawa Phexirosna asimato Betesayidaki katamaassitu feesefe. 45 Filiphoos Naatinaelnin danne: «Museni tumaassinawa raajjuni meya basa chowbaason tichisete barin daningwa. Esiis dey Yosefni naa Naaziretki Yesuswa» yi. 46 Naatinael dey: «Naaziretun ma'a wuza kesak chimniroso?» yi. Filiphoos: «Yaara biwa» yi. 47 Yesus dey Naatinael hang barki yeefeen biyaat: «Futoni Israelni asu hanifewa» yi. 48 Naatinael dey: «Taan ayik arifasso?» yit mamsi. Yesus wolgire: «Filiphoos teegonoyfeen Belesini i'oosi diisi diifen biingwa» yi. 49 Naatinael wolgire: «Assinynyano! Ne Ha'oni naawa. Ne Israelni taatowa» yi. 50 Yesus wolgire: « ‹Belesini i'oosi diisi diifen biingwa› yina boor'anoso amanetari? Haniistan denalo wuzanu biyatarwa. 51 Futok nittok makefawungwa; Samaas gachchefaan Ha'oosi wosiya daa Asuni Naaski kerefeennawa kesfeenna biyatiwa» yi.