Luqas Tichina
Daamni Yesus Kiristoosni Misirachchuni Kaama
Gachgiru
Luqasni misirachchuni kaamaas Yesusnin besifanaas zeemme yoonir yistera raajjuni meyaki kamo makte showo neyaneen sinak abdini meya sine Israelni daraas oodet feena «Mesi» esiisimato dey asuni zala zuutire «Fatunir» sinbaason ammanon besukwa. Luqas; Yesusnin: «Tukamni meyak misirachchuni kaamaason makonak» ababaaskin wostere yeer sinbaasonnawa es misirachchuni kaamaas asuni meya baassosta fa showo showo tesa rakkobesiisik kota epho sinbaasontu makefa. Luqasni misirachchuni kaamaassi arkiron dey Yesusni wolle yoosik makefa koi'ni eddeesikitosinawa hepsa dey Yesusni chowaasik den sama hamaason makefa koi'ni eddeesikitosi mai'sira maktees girani chowaasongwa. Yesusni den sama hamaasneen orfo kiristinnani amantoos aakkak dichnamatonawa taginamatona kotta makefa tochoos wosini meeni matsafaassi han baron tichi barki kamo makte.
Ha'oosi wosiyani gaamaasik; Yesus koontena wono keemerni meya hamme biyetemato makefa tochoos Yesus garobaase betemeqdesiissi hambaas; kenashto Samirawiisnawa tishire beste naasa tochone Luqasni misirachchuni kaamaassi koi'batu bestefa. Han misirachchuni kaamaassi dilaastan hamma dilaasta kar'a mai'sira biistonak zagtees shiiphoni chowa; Korto Ayyanaasi chowa; mashka meya Yesusnik fa wostobesiisewa Ha'oos boor'aason feeshun ubaasi chownewa.
Matsafaas Siruk Ephna Ephobaas
Gachgiru 1:1-4
Haphquni Yohannisnawa Yesusni koontoose 1:5—2:52
Haphquni Yohannisni wostoos 3:1-20
Yesusni haphuktoosewa fattantone 3:21—4:13
Yesus wostobaason Galiilak jammarobaas 4:14—9:50
Galiilan Yerusalem 9:51—19:27
Koi'ni torbaniis Yerusalemniissinawa biratobaastana 19:22—23:56
Daamiisa kitun kabu; ammanon bestobaasewa sama hambaase 24:1-53
1
Luqas Tichina Tochoosi Tesu
1 Ulfinto Tewofilosno; inno ganeyaassi sina chowaasikitonon besuni ticha zeemo sinak showoni meya tichisetewa. 2 Es tichaason dey innok aatiis tesubaastan kabgire aafak biya baassotnawa Ha'oosi kaamanon makset feese baassotnawa; 3 Tanu ta teetaasik tesubaastan kabgira gasasira biinanneen orfo tochooson zeeme zoonsobaason oodda neek tichunak ma'ar sinna bestewa. 4 Es baron zaginaas ne odeta chowaas futo sinbaason arutakwa.
Zakkariyasnik Makte Yohannisni Koontoni Tocho.
5 Herodis Yuudaki daasta taato sinna neyaasik Abiyani maagni wosto wostesefe baassossin sina Zakkariyas yiste isa maag feer. Bar dey Aaronni zalaassin sina Eelsabet yiste asuba faar. 6 Hepobesiise Ha'oosi sina ooko sinne feeseter. Daamiisa kaamanonnawa tumaasonna zuuttambaase asin isa muda foontonon oodet feeseter. 7 Sinuntano Eelsabet zagiya sinna boor'a koonubesi aafa. Hepobesiise dey kur'sete.
8 Isa wono Zakkariyas basa wostoni taraasik betemeqdesiissi maagni wostooson wostedifer. 9 Ukkoti maagni meeni tumaasimato Daamiisa betemeqdesiissi girire ixana kiichunak ixa barik kar'i. 10 Betemeqdesiissi ixanaas kiichchefana kabaasik dara zuuttere gerakalo yerefaat Ha'o shiiphedifer. 11 Daamiisa wosiya ixana kiichchefana shoo'aasi hoi'ta teshta yerefaat barik beste. 12 Zakkariyas wosiyaason biinaase nayere dige. 13 Sinuntano wosiyaas: «Zakkariyasno digotaatawa! Shiiphonees odtewa. Asune Eelsabet arqa naanin tanonir. Sunbaason dey ‹Yohannis› yira sunsuta. 14 Basa koontoos neek akama gira sinanawa. Showo asuni meya dey basa koontoosik girosonewa, 15 Bar Daamiisa sina arkirtu sinana. Wayinini usha sinun ooma zaysuni usha isanne aafa ushanawuza. Intobaasi keensi feegedo Korto Ayyanak tuumtona. 16 Bar Israelni daraasasin showobesiisin Daama Ha'obesiiski wolguna. 17 Bar raajju Eeliyasnisimato Ha'oosi ayyanaknawa hugnakna Daamiisa sina zeemana. Abani meeni nibaason naanggotbesiiski, ajajamonoy baassotin kayimni meeni techmaassi wolguna. Daraasin daamiisik hoorere feer sinonek zaguna» yi.
18 Sinuntano Zakkariyas Ha'oosi wosiyak: «Han bar futo sinbaason awuk aruna? Ta kur'in, asunaas dey woggabaas koi'i» yi.
19 Ha'oosi wosiyaas wolgira: «Ta Ha'oosi sina yerefa Gabureliwa. Han misirachchuson neek makonak wostera yaanarwa. 20 Sinuntano ne wonbaas kar'fana kabaasik sinni kaamnaason amano beyta boor'a han chowaas sinananneen nibtaatotu sinatawa. Wolla dey aafa chimata wuza» yi.
21 Es kabaasik asuni meya Zakkariyas kesananneen oodet feeseter. Betemeqdesiissin tai'ni kesa beybaasik diinqesete. 22 Zakkariyas betemeqdesiissin kesfena kabaasik asuni meyaneen wollok aane chime. Es bari boor'a betemeqdesiissi isa barik beste wuza faanamato asuni meya arsesete. Bar wollonoy kushubaasik besit feer. Esiisik nibtaato sinne fui'te.
23 Zakkariyas betemeqdesiissiki basa taraasi wostoni wona ko'ubaase keeba hami. 24 Garo wonaneen orfo asuba Eelsabet naanertera uuch assa keebaassi aachera di. 25 Ekka dey yi: «Daamiis han ma'a wuzason taak zagiwa. Asusa ganesi fa kashistonaason tishki.»
Maaramik Makte Yesusni Koontoni Tocho
26 Eelsabet naanertenari issunsa assaasik Ha'oosi wosiya sina Gabureli Galiilaki daasta fa Naaziretni katamaassi Ha'ooskin wostera hami. 27 Wostera hamnaas Dawitni zalaassin sina Yosefnik teegtera di isa durba nawaki. Es durba nawaasi suna dey Maarami. 28 Ha'oosi wosiya barki yaara: «Ne akamanon suustowe. Naga neek sinfawungwe. Daamiis neneen anetu fewe» [ne mashkasusi ganesin suustowe] yi.
29 Maarami Ha'oosi wosiyani wollaasik akamanon nayefaat: «Han bar aakkati nagani ooshshonso?» yit safare. 30 Ha'oosi wosiya Maaramik: «Ha'oosi sina adda danit sinna boor'a digotaatawe. 31 Ese ne naanertotarwe, arqa naanin dey tanotar. Sunbaason dey ‹Yesus› yira sunsuta. 32 Bar dey akamtu sinana. Zuuttambaase asiistan denalo sina Ha'oni Naa yisteretu teegtona. Daama Ha'oos ababa Dawitni zigimooson barik imnir. 33 Yaqobni zalaasta koi'ba foontonon taattonir. Taatobaasnu koi'ba aafa» yi.
34 Maarami Ha'oosi wosiyak wolgira: «Ta durbawa; han bar aakkak sinak chimnirin?» yi.
35 Ha'oosi wosiya wolgira: «Korto Ayyana neyista yoona. Zuuttambaase asiistan denalo sina Ha'oosi hugna dey neyista kerona. Es bari boor'a koontoni Naas korto. Dey Ha'oni naa ustona. 36 Ne koona sina Eelsabetnu kur'ubaastak arqa naani naanerte. Zagiya yiste bar naanertenaneen haniis issunsa asba. 37 Ha'oosik chimtonoy wuza aafa» yi.
38 Maarami dey: «Ta Daamiisa bozawa. Ese ne maketaasimato sinun» yi. Estan Ha'oosi wosiya kessa hami.
Maarami Eelsabetnon Mamsuk Hami.
39 Es kabaasik Maarami taptanon kabira aamaasta fa Yuudani daastaki isa katamaassi hami. 40 Zakkariyasniki keer girira asuba Eelsabetnon naga ooshshe. 41 Eelsabet Maaramini nagaason odefana kabaasik katbaassi di nawaas fille. Eelsabet dey Korto Ayyanak tuumte. 42 Kaambaason dey teggira: «Ne mashkasusi ganesin suustowe. Neekin koontoni bar dey suustowe. 43 Daamtaasa into taan mamsuk yoobaas awune fa akama ulfinanba! 44 Ne nagaasi kaamanon odefana kabaasik katnaassi fa nawaas girak fille. 45 Daamiis makena baron zagunir sinbaason amane ne awune fa suustonse!» yi.
Maaramini Galatni Shiipho
46 Maarami dey ekka yi:
«Kaanaas Daamiisin galattonir;
47-48 Ha'oos kashisto wostinynya;
sina taan biina boor'a;
tuuma nibnaasi safarak;
hetna sina Ha'onaasik girona.
Hawungneen ekalo koontoos;
zuuttera taan: ‹Ne suustowe› una.
49 Hugnaba faana Ha'oos;
taak akama wuza zagina boor'a;
sunbaas dey Korto.
50 Ha'ooson digefe baassok;
koontoostan aatta koontoosta kar'a fakuna.
51 Chima woribaasik hugnabaason besi;
beegantefe baassotin nibbesiisi safaranon gedda sike.
52 Daason ha'sife arki arki meyanon zigimobesiistan kessi;
sinuntano kashistefe baassotin ulfinak den teggi.
53 Maktanni meyanon ma'a wuzak gawusi;
otumni meyanon kushkush kalla kofki.
54-55 Abrahamniknawa basa zalaasikna;
koi'ba foonto neya besina fakibaason safarok;
Wostinynyaba sina Israelnin argasi;
es baron zaginaas zeemoti abaniisakitonik
imna abdini kaamaason koi'sukwa» yi.
56 Maarami dey keez assa sinni wona Eelsabetneen ane diira wolla keeba hami.
Haphqife Yohannisni Koonto
57 Eelsabet kophona wona kar'in arqa naanin kophe. 58 Wolkobaasewa koonbaasikitone Daamiis akama fakiya barik zaginamato odesere barneen ane girsete. 59 Nangirinsinari wono daag naasin haarkoni kunsuk asuni meya yeesete. Ababaasa sunak Zakkariyas yire sunsuk sholset feeseter. 60 Sinuntano intobaas: «Indaane, sunba Yohannis yisteretu suntona» yi.
61 Baasso dey: «Ne kooniisasin han sunaasik sunter aafewe» yisete. 62 Estan ababa Zakkariyasnin: «Naanees oo yistere sunustonakinso sholefatari?» yire kushubesiisik besire mamussete.
63 Bar dey tichuni wuza imonek mamsire: «Sunba Yohanniswa» yire tichi. Zuuttambesiise es barik diinqesete. 64 Geregere Zakkariyasni terma kotten Ha'ooson galattet wolle. 65 Es baristan kabi chowa wolkoni meya zuuttesere digesete. Es wollaasi chowa zuuttera kumaasta fa Yuudani daasi biratota wolumtera zi'i. 66 Es baron ode baasso zuuttere: «Han daag naa hanneen awu sinungeso?» yit baassotna baassotna mamussesete. Es bar sinnaas Ha'oosi argasu Yohannisneen ane faar sinna boor'a.
Zakkariyas Makena Raaji
67 Es daag naasa aba Zakkariyas Korto Ayyanak tuumtere ekka yit raaji make.
68 «Yaara darabaasin furena boor'anawa argasina boor'ana;
Daama Israelni Ha'oosik galata sinfawung.
69-70 Es barnu ibe zeemma;
Korto raajjuni meyaki kamo makenaasimato;
wostinynyaba sina Dawitni zalaassin;
akam fatunirin innok kabgi.
71 Fu'enaas dey;
gumayefe baasso kushuussinnawa;
oomtesefe baasso kushuussinwa.
72-73 Es baron zaginaas inno abani meyak;
fakibaason besunaknawa;
girina korto teyyaason zagunaknawa;
es girina teyyaason dey teyira imnaas;
abani Abrahamnikwa.
74 Es abdini kaamaas;
dey gumaniisa kushusin birmadumma kessa;
isa diga foontonon barik wostet foonikwa.
75 Esiisimato dey neeniison zuuttambaase;
Ha'oosi sina kortoknawa ookokna foonikwa.
76 Dey ne han daag naaso;
zuuttambaase asi denalo sina Ha'oosi raajju ustotawa;
ugnaason hoossutak;
Daamiisa sina zeemma hamata.
77 Daamiis dey boor'besiison feeshun uuk;
farsone ugnaasi arunon baassok imana.
78 Ha'oniis fakirnawa kenashterna;
sinbaasik faruni chaarefa denun innok chaaronak zaguna.
79 Bar talmaassinawa kituni tiishoossina fe baassok chaarsuna;
Inno taaruuson dey nagani ugnak zoonsunakwa» yi.
80 Daag naas dey dichi. Korto Ayyanaasik dey chimi. Israelni daraasik ammano bestona wona kar'ana kabaneen ichma daassi di.