Marqos Tichina
Daamni Yesus Kiristoosni Misirachchuni Kaama
Gachgiru
Marqosni misirachchuni kaamaas: «Han Ha'oosi naa Yesus Kiristoosni misirachchuni kaamaasi tesu» yittu makefe. Han misirachchuni kaamaassi Yesus wostoni asunawa ha'suni hugnaba faana asuna sinnetu ye. Ha'suni hugnabaas dey assubaasik; kiina ayyanaasta fa hugnabaasiknawa asuni boor'aason feeshun ubaasiknatu biiste. Yesus: «Asuni meyanon boor'aasi bozsusin birmadumma kisuk kaanaason furonir zagira imak ye asuni naawa» yiretu bar teetbaasik make.
Marqos Yesusni tochooson besinaas zeephtonewa hugnak tuuma ugnak sinfaat zaggire makenaas dey Yesusni kaamaastanawa assustana sinnoynaron bar wostena diinqi wostoosongwa. Haphqife Yohannisni tochoosik dey; Yesusni haphuqtoosewa fattantoose asik kawuna gachgiru imnanneen orfo tichife bar Yesusni assusi chowanonnawa meroossin fatubaasi wostononnatu kotte makefe. Wonaneen orfo Yesusnik zoonustefe meya Yesusnin mai'sire arset hameteesne faaron Yesusnin tugga'sefe baasso dey arkissire oomteset hamete. Koi'ni eddeesikito Yesusni kaasta koi'ni torbaniissi zagte wuzasikitonon; arkiron dey basa suuttosewa basa kitun kabuuse asintu makefa.
Misirachchuni kaamaasi koi'ta kuni hep bagtoosikito isa isa tichaasikitosi koi'batu fa.
Tichaas sir ephna ephobaas
Misirachchuni kaamaasi tesu 1:1-13
Yesus basa wostooson Galiilak wostobaas 1:14—9:50
Yerusalem hamme wostobaas 10:1-52
Yerusalemuknawa biratoostana fa ke'eessi koi'ni torbaniis 11:1—15:47
Yesusni kitun kabu 16:1-8
Kitun kabi Daamiisa ammanon bestonewa den sama hamne 16:9-20
1
Haphqife Yohannisni Misirachchuni Maamni Mako
(Mat. 3:1-12; Luqa. 3:1-18; Yoha. 1:19-28)
1 Haniis Ha'oni Naa *Ha'oni naa: Ha'oni naa yifa bar isa isa matsafaassi aafa sina Yesus Kiristoosni chowaason makefa misirachchuni kaamni tesu. 2 Raajju sina Isayyasni matsafaassi:
«Ugunneeson sabsuni wositarin;
ne sinaasta zeemma wosuna;
3 Dey:
« ‹Daamiisa ugnanon hoossuti;
sabsira mai'suti› yit;
zaboossi chaagfe asuni kaama.»
yistera tichche.
4 Es bari boor'a haphqife Yohannis ichma daassi: «Boor'nitiis feeshun ustonak harmira haphuqtoti» yit maket ye. 5 Yuudani daastannawa Yerusalemni katamaassinna zuuttere akam showo asuni meya Yohannisniki yeesere boor'besiison harmifaafe Yordanosni akaassi barik haphukteset feeseter.
6 Haphqife Yohannisni maamaas gaalani esak wichonontu mayfe. Geshobaason dey talfaktu taar'efe. Muubaas bilnganewa zaboni eesne. 7 Asuni meyak: «Ta mugira chaa'mabaasi taar'anon kotak sholsunoynar tayistan akamanon ulfinto ta orfoosta yoonir. 8 Ta nittotin akaktu haphquna. Sinuntano bar Korto Ayyanaktu nittotin haphquna» yit maket feer.
Yesusni Haphuqtonewa fattantone
(Mat. 3:13-17; 4:1-11; Luqa. 3:21-22; 4:1-13)
9 Es kabaasik Yesus Galiilaki daasta fa katama Naaziretun yeere Yordanoski akaassi Yohannisnik haphukte. 10 Geregere Yesus akaassin kesfena kabaasik samaas gachchefennawa Ha'oni Ayyana nakalonimato sinna basaasta kerefeenna bi. 11 Es kabaasik: «Shunfanana naata newa. Neektu ta girefawungwa» yifa kaama den saman odte.
12 Geregere Korto Ayyana barin ichma daassi taami. 13 Ichma daassi Sexanak fattantet acheechasir wona di. Buur'uni Gonyoneentu fe. Ha'oni wosiya dey barin argasse.
Tesuni Nawoni Meeni Korto
(Mat. 4:14-17; Luqa. 4:14-15)
14 Yohannis taatoni keer girinanneen orfo Yesus Ha'oosi misirachchuni kaamanon maket Galiila hami. 15 Assifena kabaasik dey: «Wonaas ko'i, Ha'oosi taatoni ha'su tai'se. Boor'nitiison harmira misirachchuni kaamaasik amanoti» iyaafe maket feer.
16 Yesus Galiilaki baarisi tesha kamo aatfet wostobesi qurxummini esha sinna Simonnawa ayba Indiriyasna yugudobesiison akaassi ha'sefeen bi. 17 Yesus dey baassok: «Taneen ane yootiwa. Eekaat Ha'oosi taatosi asunin zuututik zagunawa» yi. 18 Baasso dey geregere yugudobesiison beyfaat barneen ane hamete.
19 Estan garonon eksefena kabaasik Zabdiyosni naanggot Yaqobnawa ayba Yohannisna feeseter. Baasso goonuusta diisefaat yugudobesiison ma'issefeen bi. 20 Estan geregere hang barki yoosonek teege. Baasso dey ababesi Zabdiyosnin wostinynyasakitoneen goonuusta beyye ha'aat barneen ane hamete.
Yesus Kiina Ayyanaason Kisi
(Luqa. 4:31-37)
21 Yesusnawa nawobaasakitona Kifirnahom katama hamete. Geregere Yesus beysani wonaasik Ayhudni shiiphoni keyaassi girire assu ephi. 22 Yesus Museni tumaasi assinynyani meya assisefemato sinnoynaron daason ha'sife baassomato sinna boor'a assifena assusik diinqesete.
23 Es kabaasik Ayhudni shiiphoni keyaassi kiina ayyana ephna isa asu ekka yit chaagi: 24 «Naaziretki Yesusno! Inno neneen awuni isarni faarinso? Innotin tishkutak yaataroso? Oo sintamato ta arifawungwa. Ne Ha'oosi Kortowa!»
25 Yesus dey: «Isa kaama kotnoy basaassin kes!» yit chinire ke'i.
26 Kiina ayyanaas asusin gansira tookonak zagira akama kaamak chaagga basaassin kesi. 27 Asuni meya zuuttere diinqok: «Han bar aambanso? Aroni gaddo assunso? Kiina ayyanaason ha'suni hugnak ajajen bar dey ajajamer» yit baassotna baassotna mamsit feeseter.
28 Geregere Yesusni chowaasi wolla Galiilani biratoosta fa daa zuuttambaase asiissi zi'i.
Yesus Showo Mettanni Meyanon Fati
(Mat. 8:14-17; Luqa. 4:38-41)
29 Es kabaasik Yesus Ayhudni shiiphoni keyaassin kesse Yaqobneen Yohannisneen ane Simonnawa Andriyasna asi keer giri. 30 Estak Simonni asusi into gumtanni mero mettera kunir. Bari mettooson geregere Yesusnik maksete. 31 Yesus barki tai'sere kushubaassi zatte kabgi. Meroos dey ma'in kabira baassotin irbasi.
32 Awa girin talmefana kabaasik asuni meya mettanni meyanonnawa kiina ayyana ephna meyanonna zuutire Yesusniki ephphe yeesete. 33 Katamaassi fe asuni meya zuuttambesiise keyaasi fochata zuuttere feeseter. 34 Yesus showo tesa merok mettere fe showo asunin fati. Showo kiina ayyanaason dey kisi. Kiina ayyanaasnu bar oo sinnamato arsera faaser sinna boor'a Yesus isa wuzane maksonak aane sholowe.
Yesus Shaato Dimta Hamme Shiiphe
(Luqa. 4:42-44)
35 Wonsa wassi kabire wonnoyfeen Yesus keerun kesse isa fuchcha dima hamme Ha'o shiiphe. 36 Simonnawa barneen ane feese baassotna sholok kabi hamete. 37 Danere: «Asu zuuttere neen sholediferwa» yisete.
38 Yesus wolgire: «Ta yaanaas esiisik sinna boor'a hantan ooma tai'so dimaasta faase katamaassi dey hamfaani kaambaason makongwa» yi.
39 Ayhudni shiiphoni keyaassi kaambaason maket kiina ayyanaason asusasin kisit Galiilani daa zuuttambaase asiissi kutit feer.
Yesus Awataatoni Mettaniisin Fati
(Mat. 8:1-4; Luqa. 5:12-17)
40 Isa awataatoni†Awataatoni: Girikni matsafaastak awataatoni mero yifa bar atuta kesfa mero zuuttambaase asintu besifa. mettan barki yeere kaa'nefaat: «Ne shunfaatane fatuk chimatawa» yit shiiphe.
41 Yesus barik kenashtefaat kushubaason shongere atubaason taptifaat: «Shunfaungwa, kayimma» yi. 42 Asus geregere merobaassin fari. 43 Yesus asusin mai'sire kiitire gafkaat: 44 «Han baron ooknu makonoytamato aruwa. Sinuntano hamma teetneeson maagisik besu. Baassok zaala sinanak faruneesik Museni tumaas makena maa'aason imma» yi.
45 Sinuntano asus estan kesnaase sina chowaason asu zuuttambaase asik wollok kabi. Es bari boor'a Yesus ammanon kesse aaffa katamaassinu girunak aane chime. Baak gerakalo asu foonto dima hamme di. Asuni meya dey daa daassin barki yeeset feeseter.