Wosi Phawulosni Wosiya
Filiphisiyuski Asuni Meyak
Gachgiru
Phawulos han wosiyaason tichinaas Meqedoniya yistefa Roomni ha'suussi fa Filiphisiyus fa betekiristaniisikwa. Es betekiristaniis Phawulos Awuroppaki daasta tesire toknar. Wosiyaas tichchenaas taatoni keer feena kabaasik oom kiristana wostinynyani meyakin basaasta tugga'o kar'na kabaasik Filiphisiyusni betekiristaniissi kabi eshni assusi boor'a nibbaas suumera faana kabaasikwa. Sinuntano Phawulos Yesus Kiristoosnista fa amantobaas akamanon zaga sinbaasik han wosiyaassi tegira bestefaas giranewa tuuma amantonewa.
Phawulos han wosiyaason tichina tesuni chowaas rakkobaasi wono barin argasuk barik ima imere feeseter sinna boor'a Filiphisiyuski amanynyini meyanon galattokwa. Basaasta sinun baassosta showo tesa rakko kar'a faar sinfanaknu zagusoneknawa tuuma amantone baassok foonak chinidifer. Beegantonewa teetone asin beyere Yesus Kiristoos teetbaason daa ephnaasimato teetbesiison daa ephosonek mai'sire make. Yesus Kiristoosneen ane ayyanak isar sinak danete kaason Ha'oosi otumni imtan kesar dey amantok danetertano tumaason zaguk bestertawa; uuk baassotin yaadatsidifer. Yesus Kiristoosneen ane isar sinne feese baasso zuuttambesiise asik Ha'oos baassok imana naganewa girane asin tichi.
Han wosiyaas artefanaas giraason; amanamtooson; isar sinaason; kiristinnani amantoosiknawa kaakna chimme fooson mai'sira besifa. Daysira dey wosi Phawulos Filiphisiyuski betekiristaniissi fa akama keeshtanaason ammanon besi.
Matsafaas Siruk Ephna Ephobaas
Gachgiru 1:1-11
Phawulos feena basa teetni chowa 1:27—2:18
Ximotiyosniknawa Ephafiroditusnikna fa koppobaas 2:19-30
Amantooson tugga'esefe baassokin kar'a deessu 3:1—4:9
Phawulos Filiphisiyuski kiristanani meyak imna galatanewa ulfinne 4:10-20
Koor'uba 4:21-23.
1
1 Yesus Kiristoosni wostinynyani meya sina Phawulosnikinnawa Ximotiyosnikinna Filiphisiyusni katamaasi feesefe Yesus Kiristoosnik amanere Ha'oni asu sina baasso zuuttambesiise asik dey betekiristaniison ha'sife kur'uni meyaknawa daaqonynyini meyakna; 2 Abani sina Ha'ooskinnawa Daamni Yesus Kiristoosnikinna otumnewa nagane nittok sinfawung.
Phawulosni Galatni Shiipho
3 Nittotin yaadatefana kabaasik wonna wonna Ha'onaason galattefawungwa, 4 Nitto zuuttamnitiise asik shiiphefana kaba zuuttambaase asik shiiphefana shiiphonaas girak tuumtowa. 5 Tesuni wonaastan kabira hash hawung kar'ana kabaneen misirachchuni kaamaason makok wostonaason argasir sineti boor'a Ha'ooson galattefawungwa. 6 Han ma'a wostooson wostotik zagi Ha'oos; Yesus Kiristoos wolle yoona koi'ni wonaasta katunamato mai'sira arifawungwa. 7 Hash taatoni keer faana kabaasiknawa taatoni keer girunoy faana kabaasikna misirachchuni kaamaasi futonon oodanaknawa es baron dey chinunakna Ha'oos otumbaasik taak imna ixaason nitto zuuttamnitiise haa'er sineti boor'a wonna wonna nibnaassitu faasetiwa. Es bari boor'a nitto chowaasik taak bestet fa bar likkiwa. 8 Yesus Kiristoosni keeshtanaasik nitto zuuttamnitiise asin awune faaron kaltet faanamato Ha'oos taak zaalawa. 9 Keeshtannitiis aruknawa yaadatakna tuuma sinna dichet hamanak shiiphefawungwa. 10 Esiis dey ma'ar sina wuzaas awu sinnamato tu'nira arutiknawa; Kiristoos wolle yoona wono kayimnawa zinanti foontona sinna bestotikwa. 11 Es barik kaantiis Yesus Kiristoosnikin bestefa ooko sina wuzaasik tuumar sinna Ha'oosik ulfinnewa galatne imar sinatiwa.
Phawulosni Taatoosik Misirachchuni Kaamaas Tagi
12 Ayni meyane! Tayista kar'a wuzaas misirachchuni kaamaas mai'sira tagunak zaginamato arutik sholefawungwa. 13 Ta dey taatenaas Kiristoosnik wostena boor'a sinnamato taate meeni masaraason oodefe tasoni meenawa oom asuni meena zuuttere arseterwa. 14 Ta taatoni keer giruusi boor'a amanere fe ayni meyaassin showobesiis Daamiisik teetosonek siniwa. Es bari boor'a Ha'oosi kaamanon diga foontonon makok zeemotiistan daysire chima danetewa.
15 Sinuntano isa isa meya Kiristoosni Misirachchuni kaamaason maksefees koonakwa; oomni meya dey tayistu mero uni safarakwa; sinuntano oomni meya misirachchuni kaamaason maksefees ma'a nibakwa. 16 Han baasso Ha'oosi kaamanon ma'a nibak maksefees keeshtanakwa; baasso dey ta misirachchuni kaamaasi futo tishunoynamatowa iyaat hanta ha'tenamato arsete boor'awa. 17 Sinuntano ek baasso Kiristoosni chowaason eelingsire maksefees ma'a nibak sinnoynaron teetni shunaknawa ta taatoosta ooma rakko daysusonek safarsefaatwa. 18 Ma'a nibak sinun mangu nibak Kiristoos maktobaasik akamanon girefawungwa; hanneen dey gironar. 19 Es girefanaas dey nitto shiiphoosiknawa Yesus Kiristoosni Ayyanaasi argasuusikna birmadumma kesanamato arifana boor'awa. 20 Wonaasik isanne aafa iichchonawuza sinnamato abdik oodtifawungwa. Sinuntano wonna wonna zagit faanasimatonawa hawung dey kaak faafanak wedey kitifanak Kiristoos tayissi ulfintonawa yira digonoy makefawungwa. 21 Es bari boor'a taak kaa uus Kiristoosnik foowa. Kituus dey taak buu'awa. 22 Sinuntano hantak kaak foonar sinfaanane gaanbarere wosto wostonak sholsifa; sinfanaknu kaak foostannawa kituustanna aaffaron korunamato aane arutiwa. 23 Es hep safaraasik rakkatedifan. Isa hamnarik Kiristoosneen ane foos zuuttambaase asiistan denalo sinna boor'a han kaastan oor kessa Kiristoosneen ane foonak kaltefawungwa; esiis dey Kiristoosneen ane foos akamanon ma'ar sinna boor'awa. 24 Ooma ugnak kaak foonaas nittok akamanon sholsuwa. 25 Es barik teetok kitutan fui'tera amantontiisik dichatiknawa gira danatikna nitto zuuttamnitisneen ane foona baron arifawungwa. 26 Ta hepsa wolla nittoki yaafana kabaasik ta boor'a fa teetontiis Yesus Kiristoosneen ane foontiisik arkunawa. 27 Ese Zuuttambaase asiistan kaantiisik Kiristoosni misirachchuni kaamaasik sholsu fo footi. Es bar dey ta yaara biifanak wedey wokfanak isa alamak chimme yeerontiisonnawa misirachchuni kaamaason isarik katuk kabontiisonna odonawa. 28 Nittotin tugga'sefe baassotin isanne digotiitawa; sinuntano es chimnitiis baassok tishuni beso sinfana kabaasik nittok Ha'ooskin imte faruni besowa. 29 Kiristoosnik wostotik imte ixaas barik amanotik koi'ba sinnnoynaron basa chowaasik shana ephphatootiknengwa. 30 Es bari boor'a hash taneen ane shanaason haa'er sinetiwa; es shanaas dey zeemo sinak tayista kar'in biyeti barewa hashnu dey tayista kar'et faanamato odet faati barewa.