Wosi Phawulosni wosiya
Tiitonik
Gachgiru
Tiito aremawi sinaassin kiristinnaaski wolir sinfaat misirachchuni kaamaason makok tai'sonon Phawulosnin argasit fe wostoni zomoba. Phawulos han wosiyaason tichinaas woggabaasik garo sina han wostoni zomo sina Tiitonik sinfaat es kabaasik betekiristanini wostooson biire zoonsit Qerxesuktu diife. Han wosiyaas zaggira besifanaas keez arki arki wuzaasta:
1 Betekiristanini zoonsini meya arkiron dey Qerxeski meya mangu amalabesi foobaasik aro amala baassok foonamato Tiitonik assire make.
2 Betekiristaniissi faase showo tesa buduniis esiis dey woggabesiisik wokke feese arqasuni meenawa mashka meyanonna; esiisimato na'o arqasuni meyanonnawa wostinynyani meyanonna aakkak assuk sholsifanamato Tiitonin kiiti.
Koi'baasta dey kiristinnani amala arkiron dey naganewa koontere foone; esiisimato dey betekiristaniissin faasso; karakkaronewa oor oor kesane asin tishkuk; Tiitonik kiitonewa zoonsiyane imi.
Matsafaas Siruk Ephna Ephobaas
Gachgiru 1:1-4
Betekiristanini zoonsini meya 1:5-16
Betekiristaniissi showo tesa wostoni haa'o 2:1-15
Kiitonewa teetni oodne 3:1-11
Koor'uba 3:12-15
1
1 Ha'oos korina asuni meyanon amantobesiisik chimoneknawa amantoni chowaasi futoni ayyanak fooson arsonekna zaguk Ha'oosi boznawa Yesus Kiristoosni wosi sina Phawulosnikin woste wosiya. 2 Es amantoos koi'ba foonto kaani abdiista kaputtera yererwa; eshnoy Ha'oos han kaason imanak showo neyaneen sinak zeemma teyya innok giri. 3 Es neyaas kar'fana kabaasik innotin fati Ha'oosi ajajinimato taak imte adaraasik misirachchuni kaamaason makonak Ha'oos kaambaason taak ammanon kisira besi. 4 Innok gaara sina amantoosik futoni naata Tiitonik; Aba Ha'ooskinnawa innotin fati Yesus Kiristoosnikin otumaasewa nagaase nittok sinfawungwa.
Tiito Qerxesuk Wostena Wosto
5 Neen Qerxesuk footak zaginaas; ma'istonoy wuzasikitonon mai'sutaknawa ta neen ajajenaasimato betekiristaniisi kur'uni meyanon katama katamaassi taatsutakwa. 6 Betekiristanini kur'u sinni asus kashistonornawa isa asuni teego sinar; gafo sineranawa ajajamto beyakna hamattonoy naanggotba faanar sinanaktu sholsifawa. 7 Betekiristanini kur'uus Ha'oosi wostonon adarak ephaat feer sinna boor'a kashistonor sinanaktu sholsiwa. Esiisimato dey ge'nor, tai'non gi'tonor, zawonor, faassonor, waagni jooraba foonto sinanaktu sholsifawa. 8 Es baristan ooma keebaassik irbanin irbasuk; ma'ar sina wuzason shunar; teetbaason ha'sir; ma'ar; Ha'oosi wostok teetbaason korir; foonaas hoore yire fook chimar sinanak sholsifawa. 9 Futoni assuuson assit; kiituknawa tugga'esefe baassok wolguba ima chimatak ne arita aruni kaamaasik chimma yerowa. 10 Showo asuni meya Ayhudni keen sina amanynyini meya; haarko kunsuni sitiriisik hamnor; ajajamonor; shimaasik sasetnawa eshetna feese asuni meya feeseterwa. 11 Es baasso shaakkusonek zaguniktu sholsifawa; baasso sinnoy ugnak danosonek sholsunoy wuzasikitonon assifaafe asusa keyanon zuuttambaase asin shorkit feeseterwa. 12 Baasso ganeyaassin baasso raajju sina bar: «Qerxeski asuni meya aagenu sinfanak eshinynya dey mangu gonyo; wosto kotinynya dey joortuwa» yiwa. 13 Han zaalaas dey futowa; es bari boor'a tuuma amantobesi foonak baassotin ke'uwa. 14 Ayhudni meeni tochooson ephphetoosonoytematonawa futooson tugga'sefe baasso ajajiison odosonoytematona mai'sira ke'uwa. 15 Kayimni meyak zuuttambaase kaymawa. Sinuntano kiina wuza wostesefe meyaknawa amano beyefe asuni meyakna kayma sina wuza isanne aafawa. Esiisimato dey kanubesiis sinun yaadatbesiis kiinawa. 16 «Ha'ooson arifeniwa» yiseter; sinuntano wostobesiisiktu mormesefe; es baasso salphattu; ajajamtonor dey ma'a wosto wostok chimonoy asuni meyawa.