ଥେସଲନୀକୀୟ ମଣ୍ଡଳୀ ନିକଟକୁ ପ୍ରେରିତ ପାଉଲଙ୍କ ପ୍ରଥମ ପତ୍ର
ତେସଲନିକି ମଣ୍ଡଡ଼ିନ୍ ଆ ମନ୍ରାଜି ଆମଙ୍ ପାଓଲନ୍ ଇଡ୍ଲେ ଆରାପ୍ପାୟେନ୍ ଆ ପର୍ତମ୍ମୁ ସିଟି
ସନେକୁଲନ୍
ତେସଲନିକି ଗଡ଼ାନ୍ ରୋମିଅ ରାଜ୍ୟ ମାକିଦନିଆନ୍ ଆ ରାଜଦାନି ଡକୋଏନ୍ । ପାଓଲନ୍ ପିଲିପି ଗଡ଼ାନ୍ ସିଲଡ୍ ଜିର୍ରାୟ୍ କି ତେତ୍ତେ ଅବୟ୍ କ୍ରିସ୍ଟାନୁ ମଣ୍ଡଡ଼ିନ୍ ଇୟ୍ଲାୟ୍ ତୁବେ । ଜିଉଦି ଡରମ୍ମଲୋଙନ୍ ମାୟ୍ନେନ୍ ଆସନ୍ ଆର୍ଲଡଜେଞ୍ଜି ଆ ମନ୍ରାଜି ଆମଙ୍ ପାଓଲନ୍ କ୍ରିସ୍ଟନ୍ ଆ ମନଙ୍ବର୍ ଅପ୍ପୁଙ୍ବରେନ୍ । ଆରି ତି ଆ ମନ୍ରାଜି କ୍ରିସ୍ଟାନୁନେନ୍ ଆସନ୍ ଲଡଜେଞ୍ଜି । ବନ୍ଡ ତେସଲନିକି ଗଡ଼ାଲୋଙନ୍ ଆଡ୍ରକୋଲଞ୍ଜି ଆ ଜିଉଦିଜି ପାଓଲନ୍ଆଡଙ୍ ବବ୍ତଙେଞ୍ଜି । ତିଆସନ୍ ଆନିନ୍ ତେତ୍ତେ ସିଲଡ୍ ବିରିୟାନ୍ ଜିରେନ୍ । ତିକ୍କି ଆନିନ୍ କରନ୍ତିଲୋଙନ୍ ଆଡ୍ରକୋଲନ୍ ଆଡିଡ୍ ତେସଲନିକି ମଣ୍ଡଡ଼ିନ୍ ଏଙ୍ଗାଗୋ ଡକୋ ତି ଆ କବର ତିମତିନ୍ ଆମଙ୍ ସିଲଡ୍ ଅମ୍ଡଙେନ୍ । ପାଓଲନ୍ ଡ ତିମତିନ୍ ବାଗୁଞ୍ଜି ଗଡ଼ି ଡକୋଲଞ୍ଜି, ଆରି ବାଗୁଞ୍ଜି ମାୟ୍ଲନ୍ ମନଙ୍ବରନ୍ ଅପ୍ପୁଙ୍ବରେଞ୍ଜି ।
ତେସଲନିକି ମଣ୍ଡଡ଼ିନ୍ ଆ କ୍ରିସ୍ଟାନୁଜି ଅନବ୍ଉୟୁବନ୍ ଆସନ୍ ପାଓଲନ୍ କେନ୍ ଆ ସିଟି ଇଡେନ୍ । ତେତ୍ତେ ଆ ମନ୍ରାଜି ଆ ଡର୍ନେ ଡ ଆ ଡନୁଙ୍ୟମଞ୍ଜି ଆ ବର୍ନେ ଆରମ୍ଡଙେନ୍ ଆନିଞ୍ଜିଆଡଙ୍ ସେଙ୍କେଡାଲେ କେନ୍ ଆ ସିଟି ଇଡିଡନ୍ ଉଲନେ । କ୍ରିସ୍ଟନ୍ ଆଙ୍ଗା ଜିର୍ତାୟ୍ ? କ୍ରିସ୍ଟନ୍ ଅଣ୍ଡ୍ରଙ୍ ଜିରାଞନ୍ ଅବୟ୍ ଡର୍ନେମରନ୍ ରବୁଏନ୍ ଡେନ୍, ଇନ୍ଲେଞ୍ଜିଆଡଙ୍ ଅଃନ୍ନଞିଡେନ୍ ଆନମେଙ୍ ତନିୟନ୍ ଆସନ୍ କ୍ରିସ୍ଟନ୍ ଆବ୍ରାସାଲଙ୍ଲନ୍ ତିଆତେ ଆନିନ୍ ଞାଙ୍ତେ ପଙ୍ ? କେନ୍ ଏନ୍ନେଗନ୍ ଆ ସନେକ୍କୁବର୍ଜି ତେସଲନିକି କ୍ରିସ୍ଟାନୁ ମଣ୍ଡଡ଼ିନ୍ ଆ ମନ୍ରାଜି ବର୍ରଞ୍ଜି । ତିଆସନ୍ ଆନିନ୍ ତେତ୍ତେ ଆଡ୍ରକୋଲନ୍ ଆଡିଡ୍ ଏଙ୍ଗାଲେ ଞଣ୍ଡ୍ରମ୍ଲନେ, ତି ଆ ବର୍ନେଜି ଇଡ୍ଲେ କେନ୍ ଆ ସେକ୍କୁବର୍ଜି ଆ ଜନାଲଙ୍ କେନ୍ ଆ ସିଟିଲୋଙ୍ ଇଡେନ୍ । କ୍ରିସ୍ଟନ୍ ଆ ବାର୍ଜନିର୍ ଆସାଡାଲନ୍ ଆଜ୍ରଗେତବନ୍ ଆଡିଡ୍ ଲଡିୟମ୍ କାବ୍ବାଡ଼ାନାବା ଗାମ୍ଲେ, ପାଓଲନ୍ ତେସଲନିକି ମଣ୍ଡଡ଼ିନ୍ ଆ କ୍ରିସ୍ଟାନୁଜିଆଡଙ୍ ଞନଙ୍ଞଙନ୍ ଆସନ୍ କେନ୍ ଆ ସିଟି ଇଡେନ୍ ।
ପନାଲ୍ଲାଙନ୍
ସନେକୁଲନ୍ । ୧
ଲନୋମନ୍ ଡ ସନେଙ୍କେନ୍ । ୧:୨–୩:୧୩
୧. ସକ୍କୟ୍ କ୍ରିସ୍ଟାନୁଗୋ ଞଣ୍ଡ୍ରମ୍ନେନ୍ ଆସନ୍ ଞନଙ୍ଞଙନ୍ । ୪:୧-୧୨
୨. କ୍ରିସ୍ଟନ୍ ଆ ବାର୍ଜନିର୍ ଆ କଡାଡ଼ିଲୋଙ୍ ଞନଙ୍ଞଙନ୍ । ୪:୧୩–୫:୧୧
୩. ଆତନିକ୍କି ଞନଙ୍ଞଙନ୍ । ୫:୧୨-୨୨
୪. ଅନବ୍ସୁଜ୍ଜେବରନ୍ । ୫:୨୩-୨୮
୧
୧ ✡ଅନାପ୍ପାୟ୍ ୧୭:୧ପାଓଲନ୍, ସିଲାନ୍ ଡ ତିମତିନ୍,
ତେସଲନିକି ମଣ୍ଡଡ଼ିନ୍ ଆ ମନ୍ରାଜିଆଡଙ୍ ସିଟିନ୍ ଇଡ୍ଲେ ଆପ୍ପାୟ୍ତଜି ।
ଆପେୟ୍ ଇସ୍ୱରନ୍ ଡ ଜିସୁ କ୍ରିସ୍ଟନ୍ ଆ ସନାୟୁମ୍ ଡ ସନୟୁନ୍ ଅମଙ୍ବେନ୍ ଅଡ଼ୋଆୟ୍ତୋ ।
ତେସଲନିକିବାଜି ଆ ଡର୍ନେ
୨ ଡିତାନ୍ ଇନ୍ଲେନ୍ ଆମ୍ୱେଞ୍ଜି ଆସନ୍ ଏପାର୍ତନାତନାୟ୍ ଆରି ଇସ୍ୱରନ୍ଆଡଙ୍ ଏସେନ୍ତାୟ୍ । ୩ ଇନିଆସନ୍ଗାମେଣ୍ଡେନ୍ ଇସ୍ୱରଲେନ୍ ଡ ଆପେୟନ୍ ଆ ମୁକ୍କାବା ଡର୍ନେବେନ୍ ଆ କାବ୍ବାଡ଼ା, ଡନୁଙ୍ୟମ୍ବେନ୍ ଆ ଲନୁମ୍ ଆରି ପ୍ରବୁ ଜିସୁ କ୍ରିସ୍ଟଲେନ୍ ଆମଙ୍ ଏର୍କିକ୍କିଡ୍ନେନ୍ ଅରାସାନେବେନ୍ ଏମନ୍ନେତାୟ୍ । ୪ ଏ ବୋଞାଙ୍ଜି, ତନାନ୍ଜି ଇନ୍ଲେନ୍ ଜନା, ଇସ୍ୱରନ୍ ଆମ୍ୱେଞ୍ଜିଆଡଙ୍ ଡୁଙ୍ୟମ୍ତବେନ୍ ଆରି ଆନିନ୍ ଆମ୍ୱେଞ୍ଜିଆଡଙ୍ ସେଡାଲବେନ୍ । ୫ ଇନିଆସନ୍ଗାମେଣ୍ଡେନ୍ ଇନ୍ଲେଞ୍ଜି ଅମଙ୍ବେନ୍ ଇୟ୍ଲାୟ୍ ଏରପ୍ପୁଙ୍ଲାଞନ୍ ଆ ମନଙ୍ବର୍ ସତ୍ତର୍ ବର୍ନେନ୍ ବାତ୍ତେ ଅଃଡ୍ଡେଲୋ, ଆର୍ପାୟ୍ ବୋର୍ସାନ୍, ମଡ଼ିର୍ ପୁରାଡ଼ାନ୍ ଡ ଆଜାଡ଼ିଡମନ୍ ବାତ୍ତେ ଅମଙ୍ବେନ୍ ତିଆତେ ଅଡ଼ୋଲାୟ୍; ଅମଙ୍ବେନ୍ ଆଡ୍ରକୋଲନାଞନ୍ ଆଡିଡ୍ ଆମ୍ୱେଞ୍ଜି ଆସନ୍ ଇନ୍ଲେଞ୍ଜି ଏଙ୍ଗାଲେ ଅଃଞଣ୍ଡ୍ରମ୍ଲନାୟ୍, ତିଆତେ ତ ଆମ୍ୱେଞ୍ଜି ଜନାଜି । ୬ ✡ଅନାପ୍ପାୟ୍ ୧୭:୫-୯ଆରି ଆମ୍ୱେଞ୍ଜି ଡିୟ୍ତେ ପରାନ୍ଡଣ୍ଡନ୍ ଡେଲବେନ୍ ଜନଙ୍ଡେନ୍, ମଡ଼ିର୍ ପୁରାଡ଼ାନ୍ ଆତ୍ରିୟ୍ଲବେନ୍ ଆ ସର୍ଡା ଆରି ଏରମ୍ଡଙେନ୍ ଆ ମନଙ୍ବର୍ ଜାଲୋଙ୍ଜାଲେ ଇନ୍ଲେଞ୍ଜି ଡ ପ୍ରବୁନ୍ ଆ ସନଣ୍ଡୋଙ୍ମର୍ ଡେଲବେନ୍ । ୭ ତିଆସନ୍ ଆମ୍ୱେଞ୍ଜି ମାକିଦନିଆନ୍ ଡ ଆକାୟାବାଜି ଅଡ଼୍କୋ ଡର୍ନେମରଞ୍ଜି ଆସନ୍ ଅନବ୍ଜଙନ୍ ଅନ୍ତମ୍ ଡେଲବେନ୍ । ୮ ଅମଙ୍ବାବେନ୍ ସିଲଡ୍ ପ୍ରବୁନ୍ ଆ ମନଙ୍ବର୍ ସତ୍ତର୍ ମାକିଦନିଆନ୍ ଡ ଆକାୟାଲୋଙନ୍ ତୁମ୍ ଅନପ୍ପୁଙ୍ବରନ୍ ଅଃଡ୍ଡେଲୋ, ଆରି ଇସ୍ୱରନ୍ ଆମଙ୍ ଆମ୍ୱେଞ୍ଜି ଏଙ୍ଗାଲେ ଏଡର୍ତନେ ତି ଆ କଡାଡ଼ି ସମ୍ପରାନ୍ ଏତ୍ତେଲେ ବୁର୍ବୁରାୟ୍ଲନ୍ ଡ, ତି ଆ ବର୍ନେ ଇନ୍ଲେନ୍ ଇନ୍ନିଙ୍ ଏଃବ୍ବର୍ନାୟ୍ । ୯ ଆରି ମନ୍ରାଞ୍ଜି ଆନିଞ୍ଜିଡମ୍ ବର୍ନେଲେନ୍ ବର୍ତଞ୍ଜି, ଇନ୍ଲେଞ୍ଜି ଅମଙ୍ବେନ୍ ଏରିୟ୍ଲାଞନ୍ ଆଡିଡ୍ ଆମ୍ୱେଞ୍ଜି ଏଙ୍ଗାଲେ ଏଜାଲଲେନ୍, ଆରି ଆମ୍ୱେଞ୍ଜି ଏଙ୍ଗାଲେ କୋଙ୍ଡାଜଞ୍ଜି ଅମ୍ରେଙ୍ଡାଲେ ଆଜାଡ଼ିନ୍ ଡ ଆମେଙ୍ ଇସ୍ୱରନ୍ଆଡଙ୍ ଏସେବାତେ, ୧୦ ଆରି, ଇସ୍ୱରନ୍ ଆ ବନ୍ଡ୍ରାବ୍ ସିଲଡ୍ ଇନ୍ଲେଞ୍ଜିଆଡଙ୍ ଡୋବ୍ଡୋବନ୍ ଆସନ୍, ରନବୁନ୍ ସିଲଡ୍ ୟର୍ମେଙ୍ଲେ ଆଡ୍ରୋଲନ୍ ଆ ଡାଙ୍ଗଡ଼ାଅନନ୍ ଜିସୁନ୍ ରୁଆଙନ୍ ସିଲଡ୍ ଜିର୍ତାୟ୍ ଇନ୍ଲେଞ୍ଜି ଜଗେଲେ ଏଡକୋନେବା ।