କରିନ୍ଥୀୟ ମଣ୍ଡଳୀ ନିକଟକୁ ପ୍ରେରିତ ପାଉଲଙ୍କ ଦ୍ୱିତୀୟ ପତ୍ର
କରନ୍ତି ମଣ୍ଡଡ଼ିନ୍ ଆ ମନ୍ରାଜି ଆମଙ୍ ପାଓଲନ୍ ବାଗୁତର ଇଙନ୍ ଇଡ୍ଲେ ଆରାପ୍ପାୟେନ୍ ଆ ସିଟି
ସନେକୁଲନ୍
କରନ୍ତି ମଣ୍ଡଡ଼ିନ୍ ଆ ମନ୍ରାଜି ପାଓଲନ୍ଆଡଙ୍ ଆସ୍ରଙ୍ଗତ୍ତାଏଞ୍ଜି ଆଡିଡ୍ ଆନିନ୍ କେନ୍ ଆ ସିଟି ବାଗୁତର ଇଙନ୍ ଇଡ୍ଲେ କରନ୍ତିବାଜି ଆମଙ୍ ଆପ୍ପାୟେନ୍ ୧:୧ । ମଣ୍ଡଡ଼ିନ୍ ଆ ମନ୍ରାଜି ଲାଙ୍ଲେନ୍ନେ ପାଓଲନ୍ଆଡଙ୍ ତିଡ୍ତିଡନ୍ ନିୟ୍ ସାଜେଞ୍ଜି, ବନ୍ଡ ଆନିନ୍ ଲଡିୟମନ୍ ଆ ବର୍ନେଜି ବାତ୍ତେ କେନ୍ ଆ ସିଟି ଇଡ୍ଲେ ଆନିଞ୍ଜି ସରିନ୍ ମାୟ୍ନେନ୍ ଆସନ୍ ଏରେନ୍ ଗୋଜେନ୍ ୨:୧୩ ।
ଜିସୁ କ୍ରିସ୍ଟନ୍ କରୋକ୍କୋଡନ୍ ଆଡ୍ରେଏନ୍ ୫୫-୫୬ ବର୍ସେଙ୍ ଆ ତିକ୍କି କେନ୍ ଆ ସିଟି ଅନାପ୍ପାୟ୍ ଞଙ୍ନେମର୍ ପାଓଲନ୍ ଇଡେନ୍ । ପାଓଲନ୍ ମାକିଦନିଆନ୍ ଆଡ୍ରକୋଲନ୍ ଆଡିଡ୍ କେନ୍ ଆ ସିଟି ଇଡେନ୍ ୨:୩-୪ । ଲାଙ୍ଲେଡ୍ ମନ୍ରାଞ୍ଜି ଆନିଞ୍ଜିଡମ୍ ଅନାପ୍ପାୟ୍ ଞଙ୍ନେମର୍ ଗାମ୍ଡମ୍ଲନ୍ ପାଓଲନ୍ଆଡଙ୍ ସଙ୍ଗତ୍ତାଏଞ୍ଜି, ତି ଆ ବର୍ନେଜି ପାଓଲନ୍ କେନ୍ ଆ ସିଟି ଆତନିକ୍କିରେଙ୍ ଇଡେନ୍ ।
ବଇନ୍ ଆ ପନାଲ୍ଲାଙ୍
୧. ସନେକୁଲନ୍ । ୧:୧-୧୧
୨. ପାଓଲନ୍ ଡ କରନ୍ତି ମଣ୍ଡଡ଼ିନ୍ । ୧:୧୨–୭:୧୬
୩. ଜିଉଦା ଡେସାନ୍ ଆ କ୍ରିସ୍ଟାନୁଜି ଆ ତନିୟ୍ତିୟ୍ । ୮:୧–୯:୧୫
୪. ପାଓଲନ୍ ଆନିନ୍ ଅବୟ୍ ଅନାପ୍ପାୟ୍ ଞଙ୍ନେମର୍ ଗାମ୍ଲେ ବର୍ତନେ । ୧୦:୧–୧୩:୧୦
୫. ଅନବ୍ସୁଜ୍ଜେବରନ୍ । ୧୩:୧୧-୧୩
୧
୧ ✡ଅନାପ୍ପାୟ୍ ୧୮:୧ ଇନ୍ଲେନ୍ ପାଓଲନ୍ ଡ ତିମତି ବୋଞାଙନ୍, ଇସ୍ୱରନ୍ ଆ ଇସ୍ସୁମ୍ ବାତ୍ତେ କ୍ରିସ୍ଟ ଜିସୁନ୍ ଆନାପ୍ପାୟ୍ ଞଙ୍ନେମର୍ଜି,
କରନ୍ତି ଗଡ଼ାଲୋଙନ୍ ଡକୋନ୍ ଇସ୍ୱରନ୍ ଆ ମଣ୍ଡଡ଼ି ଡ ଆକାୟା ଡେସାଲୋଙନ୍ ଆଡ୍ରକୋତଞ୍ଜି ଅଡ଼୍କୋ ବୟ୍ଲେମରଞ୍ଜି ଆମଙ୍ ସିଟିନ୍ ଇଡ୍ଲେ ଏଆପ୍ପାୟ୍ତାୟ୍ ।
୨ ଆପେୟ୍ ଇସ୍ୱରଲେନ୍ ଡ ପ୍ରବୁ ଜିସୁ କ୍ରିସ୍ଟନ୍ ଆମଙ୍ ସିଲଡ୍ ସନାୟୁମନ୍ ଡ ସନୟୁନ୍ ଅମଙ୍ବେନ୍ ଅଡ଼ୋଆୟ୍ତୋ ।
ପାଓଲନ୍ ଇସ୍ୱରନ୍ଆଡଙ୍ ସେଙ୍କେତେ
୩ ପ୍ରବୁ ଜିସୁ କ୍ରିସ୍ଟଲେନ୍ ଆ ଇସ୍ୱର ଡ ଆପେୟନ୍ ସନେଙ୍କେନ୍ ଡେଏତୋ, ଆନିନ୍ ସନାୟୁମ୍ତିଁୟ୍ମର୍ ଆପେୟନ୍ ଆରି ବନବ୍ୟୋମର୍ ଇସ୍ୱରନ୍ । ୪ ଡିଅଙ୍ଗା ମନ୍ରାଞ୍ଜି ପରାନ୍ଡଣ୍ଡନ୍ ଡେତଜି, ଇନ୍ଲେଞ୍ଜି ତି ଅଡ଼୍କୋଞ୍ଜିଆଡଙ୍ ବନବ୍ୟୋନ୍ ଆସନ୍, ଇନ୍ଲେଞ୍ଜି ପରାନ୍ଡଣ୍ଡନ୍ ଆଡ୍ରେଡେଲଙ୍ଲନ୍ ଆଡିଡ୍ ଇସ୍ୱରନ୍ ଇନ୍ଲେଞ୍ଜିଆଡଙ୍ ବବ୍ୟୋଲଙ୍ଲନ୍ । ୫ ଇନିଆସନ୍ଗାମେଣ୍ଡେନ୍ କ୍ରିସ୍ଟନ୍ ଆସନ୍ ଏଙ୍ଗାଲେ ଇନ୍ଲେଞ୍ଜି ଡଣ୍ଡନ୍ ଞାଙ୍ତବୋ, ଏତ୍ତେଲେମା କ୍ରିସ୍ଟନ୍ ଅମ୍ମେଲେ ଇନ୍ଲେଞ୍ଜି ବନବ୍ୟୋନ୍ ଞାଙ୍ତବୋ । ୬ ବନ୍ଡ ଇନ୍ଲେନ୍ ଡନଣ୍ଡାୟନ୍ ଏଞାଙ୍ଲାୟ୍ ଡେନ୍, ତିଆତେ ବନବ୍ୟୋବେନ୍ ଡ ଅନୁର୍ବେନ୍ ଆସନ୍, ଇନ୍ଲେନ୍ ବନବ୍ୟୋନ୍ ଏଞାଙ୍ଲାୟ୍ ଡେନ୍, ତିଆତେ ବନବ୍ୟୋବେନ୍ ଆସନ୍; ଇନ୍ଲେନ୍ ଏଙ୍ଗାଲେ ଡନଣ୍ଡାୟନ୍ ସଏଲେ ଏଡକୋତନାୟ୍, ଏତ୍ତଲେମା ଆମ୍ୱେଞ୍ଜି ନିୟ୍ ଡନଣ୍ଡାୟନ୍ ସଏଲେ ଡକୋନେନ୍ ଆସନ୍ ବନବ୍ୟୋନ୍ ଡ ବୋର୍ସାନ୍ ଏଞାଙ୍ତେ । ୭ ଆମ୍ୱେଞ୍ଜି ଆସନ୍ ଇନ୍ଲେନ୍ ଜବ୍ର ଏଆସାତନାୟ୍, ଇନିଆସନ୍ଗାମେଣ୍ଡେନ୍ ଇନ୍ଲେନ୍ ଡନଣ୍ଡାୟନ୍ ଏଞ୍ରାଙ୍ଲାଞନ୍ ଆଡିଡ୍ ଆମ୍ୱେଞ୍ଜି ଏଙ୍ଗାଲେ ଏସାୟ୍ସିଲଲେନ୍, ଏତ୍ତେଗନ୍ ଏତ୍ତେଲେମା ବନବ୍ୟୋ ଇଙନ୍ ନିୟ୍ ଏସାୟ୍ସିତଲେନ୍, କେନ୍ଆତେ ଇନ୍ଲେନ୍ ଜନା ।
୮ ✡୧ କରନ୍ତି ୧୫:୩୨ଏ ବୋଞାଙ୍ଜି, ତନାନ୍ଜି, ଇନ୍ଲେନ୍ ଆସିଆ ଡେସାଲୋଙନ୍ ଅଙ୍ଗା ଡନଣ୍ଡାୟ୍ ଏଞାଙ୍ଲାୟ୍ ତିଆତେ ଆମ୍ୱେଞ୍ଜି ଜନାବେନ୍ତୋ; ତେତ୍ତେ ଇନ୍ଲେନ୍ ଜବ୍ର ଡନଣ୍ଡାୟନ୍ ଏଞାଙ୍ଲାୟ୍, ତିଆସନ୍ ଆସନ୍ ଅନମେଙନ୍ ଆସନ୍ ଏଃନ୍ନାସାଲନାୟ୍ । ୯ ରନବୁ ଆସନ୍ ଇନ୍ଲେନ୍ ସୋରୋପ୍ପାୟ୍ଲଲେଞ୍ଜି ଅବ୍ଡିସୟ୍ଲାୟ୍, ଇନ୍ଲେଞ୍ଜି ରମ୍ମଙ୍ ଆମଙ୍ ଏର୍ନାସାନେନ୍, ଅଙ୍ଗା ଇସ୍ୱର ଆରବୁମରଞ୍ଜିଆଡଙ୍ ଅବ୍ଡୋତେ, ଆମଙନ୍ ଏଆସାଲନାୟ୍ । ୧୦ ଆନିନ୍ ବରନ୍ତଙନ୍ ଆ ରନବୁଗଡ୍ ସିଲଡ୍ ଇନ୍ଲେଞ୍ଜିଆଡଙ୍ ଡୋବ୍ଡୋବ୍ଲଙ୍ଲନ୍, ଆରି ଆନିନ୍ ପୁର୍ବାଃତେ ନିୟ୍ ଇନ୍ଲେଞ୍ଜିଆଡଙ୍ ଡୋବ୍ଡୋବ୍ଲଙ୍ତନ୍; ଆମଙନ୍ ଇନ୍ଲେଞ୍ଜି ଅରାସାନେଲେନ୍ ଡକୋ । ୧୧ ଆମ୍ୱେଞ୍ଜି ନିୟ୍ ଇନ୍ଲେନ୍ ଆସନ୍ ପାର୍ତନାନାବା, ଆରି ଇନ୍ଲେନ୍ ଅଙ୍ଗା ସନାୟୁମ୍ ଏଞାଙ୍ଲାୟ୍, ତିଆତେ ଅମ୍ମେଲେ ଜବ୍ର ମନ୍ରା ଇସ୍ୱରନ୍ଆଡଙ୍ ସେଙ୍କେତଜି ।
ପାଓଲନ୍ ଆ କାବ୍ବାଡ଼ା
୧୨ ପୁର୍ତିଲୋଙନ୍ ଉପରେଙ୍ବେନ୍, ପୁର୍ତିନ୍ ଆ ବୁଡ୍ଡି ବାତ୍ତେ ଇନ୍ଲେଞ୍ଜି ଏଃଞଣ୍ଡ୍ରମ୍ଲନାୟ୍, ଆର୍ପାୟ୍ ଇସ୍ୱରନ୍ ଆ ସନାୟୁମ୍, ମନଡ଼ିରନ୍ ଡ ଲବଡ୍ଡିନ୍ ବାତ୍ତେ ଏଞଣ୍ଡ୍ରମ୍ଲନାୟ୍ ଗାମ୍ଲେ ବିବେକଲେନ୍ ସାକିନ୍ ତିୟ୍ତେ । କେନ୍ଆତେ ଅବ୍ସୋଡ଼ାଡମ୍ନେଲେନ୍ । ୧୩ ଇନିଆସନ୍ଗାମେଣ୍ଡେନ୍ ଆମ୍ୱେଞ୍ଜି ଇନିଜି ପଡ଼େଡାଲନ୍ ଜନାଲେ ଏରପ୍ତିତେ, ତିଆତେଜି ତୁମ୍ ଇଡ୍ଲେ ଅମଙ୍ବେନ୍ ଏଆପ୍ପାୟ୍ତାୟ୍, ଆରି ଇନ୍ନିଙ୍ ଏଃନ୍ନିଡାୟ୍ । ୧୪ ପ୍ରବୁ ଜିସୁ କ୍ରିସ୍ଟଲେନ୍ ଆଜିର୍ତାଞନ୍ ଆ ଡିନ୍ନା ଇନ୍ଲେନ୍ ଆସନ୍ ଆମ୍ୱେଞ୍ଜି ଏଦର୍ପତନ୍, ଏତ୍ତେଗନ୍ ଆମ୍ୱେଞ୍ଜି ଆସନ୍ ଇନ୍ଲେନ୍ ଏଦର୍ପତନାୟ୍; କେନ୍ ଆ ବର୍ନେ ଆମ୍ୱେଞ୍ଜି ଇନ୍ଲେନ୍ ଆସନ୍ ଅସୋୟ୍ ଏଜନାଏନ୍, ଏତ୍ତଲେମା ଆତନିକ୍କି ଜାୟ୍ ଏଜନାତେ ଗାମ୍ଲେ ଞେନ୍ ଆସାତନାୟ୍ ।
୧୫ ଞେନ୍ ଆଜ୍ରନାଲିଞନ୍ ସିଲଡ୍ ଆମ୍ମୁଙ୍ ଅମଙ୍ବେନ୍ ଅନିୟନ୍ ସାୟ୍ଲାୟ୍, ଏତ୍ତେଲ୍ଡେନ୍ ଆମ୍ୱେଞ୍ଜି ବାଗୁତର ଆସିର୍ବାଦନ୍ ଏଞାଙ୍ତେ ବନ୍ । ୧୬ ✡ଅନାପ୍ପାୟ୍ ୧୯:୨୧ଆରି, ଅମଙ୍ଗଡ୍ବେନ୍ ମାକିଦନିଆ ଡେସାନ୍ ଇୟ୍ତେ, ଆରି ମାକିଦନିଆ ଡେସାନ୍ ସିଲଡ୍ ଅମଙ୍ବେନ୍ ୟର୍ତନାୟ୍, ସିଲଡ୍ଲ୍ଲନ୍ ଜିଉଦା ଡେସାନ୍ ଅନିୟନ୍ ଆସନ୍ ଆମ୍ୱେଞ୍ଜି ତଙରନ୍ ଅବ୍ତୁଜିଁୟ୍ବା, ତିଆସନ୍ ଞେନ୍ ଆମ୍ମୁଙ୍ ଅମଙ୍ବେନ୍ ଅନିୟନ୍ ସାୟ୍ଲାୟ୍ । ୧୭ ଞେନ୍ କେନ୍ଆତେଜି ଲରୁମ୍ଲାଞନ୍ ଆଡିଡ୍ ଗବ୍ରିୟମ୍ଲନ୍ ଅଃଲ୍ଲୁମ୍ଲାୟ୍ ପଙ୍ ? ଅଡ଼େ, ଞେନ୍ ଇନି ଇୟମ୍ତାୟ୍ ତିଆତେ ପୁର୍ତିନ୍ ଆନିଃୟମ୍ ଅନ୍ତମ୍ ପଙ୍ ଲୁମ୍ତାୟ୍, ତିଆସନ୍ ବର୍ନେଞେନ୍ “ଓଓ” ଆରି “ଇଜ୍ଜା” ବାଗୁନ୍ ଗଡେଲ୍ତେ ? ୧୮ ଆଜାଡ଼ି ଇସ୍ୱରନ୍ ତିଆତେ ଜନାତେ, ତିଆସନ୍ ଅମଙ୍ବେନ୍ ବର୍ନେଲେନ୍ “ଓଓ” ଆରି “ଇଜ୍ଜା” ଅଃଡ୍ଡେଏ । ୧୯ ✡ଅନାପ୍ପାୟ୍ ୧୮:୫ଇନିଆସନ୍ଗାମେଣ୍ଡେନ୍ ଞେନ୍, ସିଲାନ୍ ଡ ତିମତିନ୍ ଅମଙ୍ବେନ୍ ଏରପ୍ପୁଙ୍ବର୍ଲାଞନ୍ ଇସ୍ୱରନ୍ ଆ ଡାଙ୍ଗଡ଼ାଅନ୍ କ୍ରିସ୍ଟ ଜିସୁନ୍, ଆବସାଣ୍ଡନ୍ ଆଙ୍ଗିୟ୍ “ଓଓ” ଆରି “ଇଜ୍ଜା” ଅଃଗାମେ, ଆନିନ୍ ଆଏଡ଼ର୍ ଇସ୍ୱରନ୍ ଆ ଲନଡୟ୍ “ଓଓ” ତୁମ୍ ଗାମେନ୍ । ୨୦ ଇନିଆସନ୍ଗାମେଣ୍ଡେନ୍ କ୍ରିସ୍ଟନ୍ ଆମଙ୍ ଇସ୍ୱରନ୍ ଆ ସନିବ୍ଡେୟ୍ବର୍ଜି ଅଡ଼୍କୋନ୍ “ଓଓ” ଡେତେ; ତିଆସନ୍, ଆନିନ୍ ଜିସୁ କ୍ରିସ୍ଟନ୍ ଅମ୍ମେଲେ ଇସ୍ୱରନ୍ ଆ ଗନୁଗୁ ପନେମେଙ୍ ଆସନ୍ ଇନ୍ଲେନ୍ “ଆମେନ୍*ଆମେନ୍ କେନ୍ ଅନ୍ତମ୍ ଡେଏତୋ” ଗାମ୍ତବୋ । ୨୧ ଇସ୍ୱରନ୍ ଆନିନ୍ଡମ୍ ଆମ୍ୱେଞ୍ଜି ଡ ଇନ୍ଲେଞ୍ଜି କ୍ରିସ୍ଟ ଜିସୁନ୍ ଆମଙ୍ ଗବ୍ରିଲଙ୍ଲନ୍, ଆରି ଇନ୍ଲେଞ୍ଜିଆଡଙ୍ ଆନିନ୍ ତବ୍ନଙ୍ଲଙ୍ଲନ୍ । ୨୨ ଆନିନ୍ ଇନ୍ଲେଞ୍ଜିଆଡଙ୍ ଅବ୍ଜିଡ୍ଲଙ୍ଲନ୍, ଉଗର୍ଲୋଙ୍ଲେନ୍ ଆ ମଡ଼ିର୍ ପୁରାଡ଼ାନ୍ ଆନ୍ସକାରାନ୍ ଅନ୍ତମ୍ ତିୟ୍ତିୟ୍ଲଙ୍ଲନ୍ ।
୨୩ ବନ୍ଡ ଇସ୍ୱରନ୍ ସାକିମର୍ଞେନ୍, ଆନିନ୍ ଉଗର୍ଲୋଙ୍ଞେନ୍ ଆନିଃୟମ୍ ଜନାତେ, ଞେନ୍ ଆମ୍ୱେଞ୍ଜିଆଡଙ୍ ଏଙ୍ଗାଲ୍ଡେନ୍ ଅଃନ୍ନବ୍ଡୁକ୍କବେନ୍, ତିଆସନ୍ ଞେନ୍ ଆରି କରନ୍ତି ଗଡ଼ାନ୍ ଅଃନ୍ନିଆୟ୍ । ୨୪ ଡର୍ନେବେନ୍ ଆଉପରେଙ୍ ଇନ୍ଲେଞ୍ଜି ଏଃନ୍ନବ୍ସୋଡ଼ାଡମ୍ନାୟ୍, ଏଙ୍ଗାଲ୍ଡେନ୍ ଡର୍ନେଲୋଙନ୍ ଆମ୍ୱେଞ୍ଜି ରବ୍ଡୋଲନ୍ ଏଡକୋତନ୍, ତିଆସନ୍ ଆମ୍ୱେଞ୍ଜିଆଡଙ୍ ଅନବ୍ସର୍ଡାନ୍ ଆସନ୍ ଆମ୍ୱେଞ୍ଜି ସରିନ୍ ଇନ୍ଲେନ୍ ମାୟ୍ଲନ୍ ଏଲନୁମ୍ତନାୟ୍ ।