ଯିହୂଦାଙ୍କ ପତ୍ର
ଜିଉଦାନ୍ ଆରିଡେନ୍ ଆ ସିଟି
ସନେକୁଲନ୍
କେନ୍ ଆ ସିଟି ଜିଉଦାନ୍ ଇଡେନ୍ । କେନ୍ ଆନିନ୍ ଜିସୁ କ୍ରିସ୍ଟନ୍ ଡ ଜାକୁବନ୍ ବୟନ୍ ବନୋଞାଙ୍ ଡେଏଞ୍ଜି । ୬୮ ଡ ୮୦ କ୍ରିସ୍ଟାବ୍ଦ ଇଙନ୍ କେନ୍ ଆ ସିଟି ଅନିଡନ୍ ଡେଏନ୍ । ତିଆଡିଡ୍ ଲାଙ୍ଲେଡ୍ କଣ୍ଡାୟ୍ ଞନଙ୍ତିୟ୍ମରଞ୍ଜି ଡୁଙ୍ଲନାଜି କି ମଣ୍ଡଡ଼ିରେଙନ୍ ଜିର୍ରେ ମନ୍ରାଞ୍ଜିଆଡଙ୍ କଣ୍ଡାୟ୍ ଞନଙନ୍ ଇୟ୍ଲେ ତିୟେଜି ୧ । ତିଆସନ୍ ଡର୍ନେମରଞ୍ଜି ତି କଣ୍ଡାୟ୍ ଞନଙନ୍ ଏର୍ନମ୍ଡଙନ୍ ଡର୍ନେଲୋଙନ୍ ଗବ୍ରିଲନ୍ ଡକୋନେନ୍ ଆସନ୍ କେନ୍ ଆ ସିଟି ଇଡ୍ଲେ କ୍ରିସ୍ଟାନୁମରଞ୍ଜି ଆମଙ୍ ଅନାପ୍ପାୟନ୍ ଡେଏନ୍ ।
୨ ପିତ୍ର ୨:୧
ବଇନ୍ ଆ ପନାଲ୍ଲାଙ୍
୧. ଉନେବରନ୍ । ୧:୧-୨
୨. ଞନଙନ୍ ଡ କଣ୍ଡାୟ୍ ଞନଙ୍ତିୟ୍ମରଞ୍ଜି । ୧:୩-୧୬
୩. ଡର୍ନେଲୋଙନ୍ ଗବ୍ରିଲନ୍ ଡକୋନେନ୍ ଆସନ୍ ଞନଙନ୍ । ୧:୧୭-୨୩
୪. ଆସିର୍ବାଦନ୍ । ୧:୨୪-୨୫
୧
୧ ✡ମାତିଉ ୧୩:୫୫; ମାର୍କ ୬:୩ଆନାଜିଆଡଙ୍ ଇସ୍ୱରନ୍ ଓଡ୍ଡେଏଞ୍ଜି, ଡୁଙ୍ୟମ୍ତଜି, ଆରି ଆନାଜି ଜିସୁ କ୍ରିସ୍ଟନ୍ ଆସନ୍ ଆଜୁବାୟ୍ଜି,
ଆମଙଞ୍ଜି ଜିସୁ କ୍ରିସ୍ଟନ୍ ଆ ସେବା କାବ୍ବାଡ଼ା ଆର୍ଲୁମ୍ତେନ୍ ଆ ମନ୍ରା ଜିଉଦାନ୍, ଜାକୁବନ୍ ଆ ବୋଞାଙ୍ କେନ୍ ଆ ସିଟି ଇଡ୍ଲେ ଆପ୍ପାୟେନ୍ ।
୨ ଅମଙ୍ବେନ୍ ସନାୟୁମନ୍, ସନୟୁନ୍ ଡ ଡନୁଙ୍ୟମନ୍ ଅଡ଼ୋଆୟ୍ତୋ ।
କଣ୍ଡାୟ୍ ଞନଙ୍ତିୟ୍ମରଞ୍ଜି
୩ ଏ ଡନୁଙ୍ୟମ୍ଡମ୍ ଗଡ଼ିଞେଞ୍ଜି, ଇନ୍ଲେଞ୍ଜି ଆଞ୍ରାଙ୍ଲବନ୍ ଅନୁରନ୍ ଆ ବର୍ନେ ଇଡ୍ଲେ ଅମଙ୍ବେନ୍ ଆପ୍ପାୟ୍ତାୟ୍ ଗାମ୍ଲାୟ୍, ବନ୍ଡ ତି ଆବନେଡ଼ା ଇସ୍ୱରନ୍ ଆ ମନ୍ରାଞ୍ଜିଆଡଙ୍ ଅଃନ୍ନଞିଡେନ୍ ଆ ଡିନ୍ନା ଆସନ୍ ଆତ୍ରିୟେଞ୍ଜି ଆ ଡର୍ନେ ଡନେଡାଲେ ଅଲ୍ଜୁଜ୍ଜେନ୍ ଆସନ୍ ଆମ୍ବେଞ୍ଜିଆଡଙ୍ ଅବ୍ନୁୟୁବ୍ତାଜି ଗାମ୍ଲେ କେନ୍ ଆ ସିଟି ଇଡ୍ଲାୟ୍ । ୪ ଲାଙ୍ଲେଡ୍ ଏର୍ଡରମ୍ମମରଞ୍ଜି ଅଜନା ଅମଙ୍ବେନ୍ ଗନ୍ଲାଜି, ଆନିଞ୍ଜି ମନଙ୍ତଡଞ୍ଜି ଆ କାବ୍ବାଡ଼ା ଲୁମ୍ଲୁମନ୍ ଆସନ୍ ଇସ୍ୱରନ୍ ଆ ସନାୟୁମ୍ ବର୍ନେଜି ଆନ୍ନା ଏମ୍ମେତଜି, ଆବୟଡମ୍ ଞନଙ୍ମର୍ଲେନ୍ ଡ ପ୍ରବୁ ଜିସୁ କ୍ରିସ୍ଟନ୍ଆଡଙ୍ ଆନିଞ୍ଜି ଅଃମ୍ମାନ୍ନେଏଜି । କେନ୍ ଆ ମନ୍ରାଜି ପନବ୍ରଡନ୍ ଞାଙ୍ତଜି ଗାମ୍ଲେ ପୁର୍ବାନ୍ ସିଲଡ୍ ମା ଡରମ୍ମ ସାସ୍ତ୍ରଲୋଙନ୍ ଆଇଡିଡ୍ ।
୫ ଇସ୍ୱରନ୍ ଇସ୍ରାଏଲ୍ମରଞ୍ଜିଆଡଙ୍ ମିସର୍ ଡେସାନ୍ ସିଲଡ୍ ତବ୍ଲେ ଓରୋଙ୍ଲାଜି, ବନ୍ଡ ତିକ୍କି ଲାଙ୍ଲେଡ୍ ମନ୍ରାଞ୍ଜି ଇସ୍ୱରନ୍ ଆମଙ୍ ଅଃଡ୍ଡର୍ରଞ୍ଜି, ତିଆସନ୍ ଇସ୍ୱରନ୍ ଆନିଞ୍ଜିଆଡଙ୍ ରବ୍ବୁଏଞ୍ଜି, ଆମ୍ୱେଞ୍ଜି କେନ୍ ଅଡ଼୍କୋନ୍ ଆ ବର୍ନେ ଜନାଜି, ଡେଲୋଜନଙ୍ଡେନ୍ ଞେନ୍ ଆରି ଆମ୍ୱେଞ୍ଜିଆଡଙ୍ କେନ୍ ଆ ବର୍ନେ ଅବ୍ଜନାତବେନ୍ । ୬ ଅଙ୍ଗା ପାଙ୍ଲଙ୍ବର୍ମର୍ଜି ରମ୍ମଙ୍ ରମ୍ମଙ୍ ଆ ତରଙ୍କୁମ୍ଲୋଙ୍ ଏର୍ଡକୋନେନ୍ ଆଡ୍ରକୋସିଙଞ୍ଜି ଅମ୍ରେଙେଞ୍ଜି, ତି ଆ ବର୍ନେ ମନ୍ନେବା; ସୋଡ଼ା ପନ୍ସୁଆତିନ୍ ଆଡ୍ରେତେନ୍ ଆ ଡିନ୍ନା ଇସ୍ୱରନ୍ ଆନିଞ୍ଜିଆଡଙ୍ ପନବ୍ରଡନ୍ ତନିୟନ୍ ଆସନ୍ ଆଏଡ଼ର୍ ତେତ୍ତେ ଲୋଙଡ୍ ଆଡ୍ରକୋଲୋଙ୍ତନେନ୍ ଜିଲେ ଆଡକ୍କୋଜି । ୭ ତିଅନ୍ତମ୍ ସଦୋମନ୍ ଡ ଗମୋରାନ୍, ଆରି ତି ଆତୟ୍ତୟ୍ ଗଡ଼ାନ୍ ଆ ମନ୍ରାଜି ଜୋଣ୍ଡଡ଼ାଲୁମନ୍ ଡ ଡଅଙ୍ଡାଗୋ ପରାନ୍ସାତ୍ତିନ୍ ଆ କାବ୍ବାଡ଼ାଜି ଲୁମେଞ୍ଜି । ଆନ୍ନାମରଞ୍ଜିଆଡଙ୍ ଅନବ୍ଜଙନ୍ ଅନ୍ତମ୍ ଅନବ୍ତୁଜନ୍ ଆସନ୍ ଆନିଞ୍ଜି ଅଃନ୍ନଞିଡେନ୍ ଆ ତଗୋଲୋଙ୍ ପନବ୍ରଡନ୍ ଞାଙ୍ତଜି ।
୮ ତିଅନ୍ତମ୍ କେନ୍ ଆ ମନ୍ରାଜି ଗନୁମ୍ତେନ୍ ଏଗିୟ୍ଲାୟ୍ ଗାମ୍ଲେ ବର୍ତଞ୍ଜି କି ରମ୍ମଙ୍ ରମ୍ମଙ୍ ଆ ଡଅଙଞ୍ଜି ଏର୍ମଡ଼ିର୍ ଅମ୍ମେତଜି, ଆନିଞ୍ଜି ଇସ୍ୱରନ୍ ଆ ବୋର୍ସା ଅଃମ୍ମାନ୍ନେଏଜି ଆରି ରୁଆଙ୍ ପାଙ୍ଲଙ୍ବର୍ମରଞ୍ଜିଆଡଙ୍ ନିଣ୍ଡୟ୍ତଜି । ୯ ✡ଅନବ୍ଜନାବର୍ ୧୨:୭ବନ୍ଡ ମିକାଏଲ୍ ମୁଡ଼ ପାଙ୍ଲଙ୍ବର୍ମରନ୍ ମୋସାନ୍ ଆ ମରା ଆସନ୍ ସନୁମନ୍ ବୟନ୍ ଆରଲ୍ଞାଙ୍ତମେଞ୍ଜି ଆଡିଡ୍, ମିକାଏଲ୍ ପାଙ୍ଲଙ୍ବର୍ମରନ୍ ସନୁମନ୍ଆଡଙ୍ ନିଣ୍ଡୟ୍ଲେ ବନରନ୍ ଆସନ୍ ଅଃନ୍ନୋମଙ୍ଲୋ, ତିଆସନ୍ ଆନିନ୍ ଆଡିୟ୍ତେନ୍ ଗାମେନ୍, “ପ୍ରବୁନ୍ ଆମନ୍ଆଡଙ୍ କଞମ୍ତୋ ।” ୧୦ ବନ୍ଡ କେନ୍ ଆ ମନ୍ରାଜି ଇନିଜି ଅଃଗନ୍ଲୁଡେଜି, ତିଆତେ ଅବ୍ଡୋସାଡାଲେ ନିଣ୍ତୟ୍ତଜି, ଆରି କିନ୍ରେଙ୍ ଜନ୍ତୁଞ୍ଜି ଅନ୍ତମ୍ ଇନିଜି ଅଜିଡ୍ ଅଜିଡ୍ ଗନ୍ଲୁଡ୍ତଜି, ତିଆତେ ବାତ୍ତେ ଆନିଞ୍ଜି ଗୁରୁଡ୍ଡେତଜି । ୧୧ କେନ୍ଆତେ ଆନିଞ୍ଜି ଆସନ୍ ଡିଅଙ୍ଗା ଆ ବରନ୍ତଙ୍ ! ଆନିଞ୍ଜି କଇନନ୍ ଆ ତଙର୍ ସନ୍ଲେ ତଙିୟ୍ତଞ୍ଜି, ତଙ୍କାନ୍ ଆଞନାଙ୍ ଆସନ୍ ବାଲାମନ୍ ଇନିଜି ଆ କାବ୍ବାଡ଼ା ଲୁମେନ୍, ଏତ୍ତେଲେ ଆନିଞ୍ଜି କନଣ୍ଡାୟ୍ଲୋଙନ୍ ଗଲୋଏଞ୍ଜି, କୋରନ୍ ଅନ୍ତମ୍ ଗୋଡ଼େନ୍ ଅମ୍ଡୁଙ୍ଡାଲେ ଆନିଞ୍ଜି ଗୁରୁଡ୍ଡେତଜି । ୧୨ ଆନିଞ୍ଜି ଏର୍ଗନ୍ରୟ୍ଲଗୋ ଆମ୍ୱେଞ୍ଜି ସରିନ୍ ଡନୁଙ୍ୟମ୍ ବୁଜିଲୋଙନ୍ ଇୟ୍ତାୟ୍ ତଙ୍କୁମେଜି, ଆଲତ୍ତେଙ୍ଲୋଙଞ୍ଜି ବୁଜିବେନ୍ ଅଡିଲନ୍ ଅନ୍ତମ୍ ଡେତେ, ସତ୍ତର୍ ଆନିଞ୍ଜିଡମ୍ ଆସନ୍ ତୁମ୍ ବବ୍ରିୟ୍ପୋଙ୍ତଞ୍ଜି, ଆନିଞ୍ଜି ରିଙ୍ଗେନ୍ ବାତ୍ତେ ଆପ୍ରାଙ୍ରିଂତେନ୍ ଡାଆତଡନ୍ ଆ ମେଗ ଅନ୍ତମ୍; ଆନିଞ୍ଜି ରୁୟଲ୍ଗାଜନ୍ ଅଃନ୍ନଜଏନ୍ ଆରାନୁବ୍ ଡ ଆପୁୟ୍ପୁୟନ୍ ଆରାନୁବ୍ ଅନ୍ତମ୍ । ୧୩ ଆନିଞ୍ଜି ସମେଁୟ୍ଣ୍ଡ୍ରାନ୍ ଆଡ୍ଡୋୟ୍ଡା ଅନ୍ତମ୍, ଏର୍ଗନ୍ରଜନ୍ ଆ ଲନୁମଞ୍ଜି ପୋନ୍ସେରାନ୍ ଅନ୍ତମ୍ ତୋଣ୍ଡୋନ୍ ଗିୟ୍ତାତେ, ଆନିଞ୍ଜି ଏର୍ସନେଙ୍ସେଙନ୍ ଆଜରିର୍ତେନ୍ ଆ ତୁତୁୟ୍ ଅନ୍ତମ୍, ଆନିଞ୍ଜି ଆସନ୍ ଲୋଙଡ୍ ଜୋଲ୍ଲାନ୍ ଆଡକ୍କୋ ।
୧୪ ଆଦମନ୍ ସିଲଡ୍ ସାତ କନୋକ୍କୋଡ୍ ଆ ମନ୍ରା ଅନୁକନ୍ ନିୟ୍ କେନ୍ ଆ ମନ୍ରାଜି ଆସନ୍ ପୁର୍ବାଃତେବରନ୍ ବର୍ରନେ, “ପ୍ରବୁନ୍ ଅଜାର ଅଜାର ରୁଆଙ୍ ପାଙ୍ଲଙ୍ବର୍ମରଞ୍ଜି ସରିନ୍, ୧୫ ଅଡ଼୍କୋ ମନ୍ରାନ୍ ଅନବ୍ପନ୍ସୁଆତିନ୍ ଆସନ୍ ଇୟ୍ତାୟ୍; ଏର୍ଡରମ୍ମମରଞ୍ଜି ଇନିଜି ଏର୍ଡରମ୍ମ କାବ୍ବାଡ଼ାନ୍ ଲୁମେଞ୍ଜି, ଆରି ପ୍ରବୁନ୍ ଆ ବିରୁଦଲୋଙ୍ ଇନିଜି ନିଣ୍ଡୟ୍ବରନ୍ ବର୍ରଞ୍ଜି, ତି ଅଡ଼୍କୋନ୍ ଆସନ୍ ଅବ୍ଡୋସାଡାଲେ ପନବ୍ରଡନ୍ ଇୟ୍ତାୟ୍ ତିୟେଜି ।”
୧୬ କେନ୍ ଆ ମନ୍ରାଜି ଡିତାନ୍ ଆ ମନ୍ନଲୋଙଞ୍ଜି ସୟୁ ତଡ୍, ଆରି ଆନ୍ନାମରଞ୍ଜିଆଡଙ୍ ଅବ୍ଡୋସାତଜି, ଆନିଞ୍ଜି ଡଅଙ୍ଡାଗୋ ପରାନ୍ସାତ୍ତିନ୍ ଆ କାବ୍ବାଡ଼ାଜି ଲୁମ୍ତଜି, ଆନିଞ୍ଜି ଅବ୍ସୋଡ଼ାଡମ୍ତଞ୍ଜି ଆରି ଲାବନ୍ ଆଞନାଙ୍ ଆସନ୍ ମନ୍ରାଞ୍ଜି ଆମଙ୍ ତମୟ୍ବରନ୍ ବର୍ତଞ୍ଜି ।
ଞନଙ୍ଞଙନ୍
୧୭ ଏ ଡନୁଙ୍ୟମ୍ଡମ୍ ଗଡ଼ିଞେଞ୍ଜି, ପ୍ରବୁ ଜିସୁ କ୍ରିସ୍ଟନ୍ ଆନାପ୍ପାୟ୍ ଞଙ୍ନେମର୍ଜି ଆମ୍ୱେଞ୍ଜିଆଡଙ୍ ଇନିଜି ଆ ବର୍ନେ ବର୍ରବେଞ୍ଜି, ତିଆତେ ମନ୍ନେବା; ୧୮ ✡୨ ପିତ୍ର ୩:୩ଆନିଞ୍ଜି ଏଙ୍ଗାଲେ ଆମ୍ୱେଞ୍ଜିଆଡଙ୍ ବର୍ରବେଞ୍ଜି, “ଆତନିକ୍କି ଡିନ୍ନା ଇଙନ୍ ଡଅଙ୍ଡାଗୋ ପରାନ୍ସାତ୍ତିନ୍ ଆ କାବ୍ବାଡ଼ାଜି ଆର୍ଲୁମ୍ତେଞ୍ଜି ଆ ମନ୍ରାଜି ଡୁଙ୍ତନାଜି, ଆନିଞ୍ଜି ଇସ୍ୱରନ୍ଆଡଙ୍ ସଙ୍ଗତ୍ତାତଜି, ଆନିଞ୍ଜି ଆମ୍ୱେଞ୍ଜିଆଡଙ୍ ସୟ୍ସୟ୍ମୁତବେଞ୍ଜି ।” ୧୯ କେନ୍ ଆ ମନ୍ରାଜି ପନାଲ୍ଲାଙନ୍ ଅମ୍ଡୁଙ୍ତାଜି, ଆନିଞ୍ଜି ଡଅଙ୍ଡାଗୋ ଆ ଇସ୍ସୁମ୍ ବାତ୍ତେ ଞଣ୍ଡ୍ରମ୍ତଞ୍ଜି, ଇସ୍ୱରନ୍ ଆ ପୁରାଡ଼ା ଆମଙଞ୍ଜି ଅବୟ୍ ତଡ୍ । ୨୦ ଏ ଡନୁଙ୍ୟମ୍ଡମ୍ ଗଡ଼ିଞେଞ୍ଜି, ଆମ୍ୱେନ୍ ମଡ଼ିର୍ ଡରମ୍ମ ଡର୍ନେଲୋଙନ୍ ରମ୍ମଙ୍ ରମ୍ମଙ୍ ଅନମେଙନ୍ ଆସନ୍ ମବ୍ରଙ୍ଲନ୍ ଡକୋନାବା, ମଡ଼ିର୍ ପୁରାଡ଼ାନ୍ ଆ ବୋର୍ସା ବାତ୍ତେ ପାର୍ତନାନାବା । ୨୧ ପ୍ରବୁ ଜିସୁ କ୍ରିସ୍ଟନ୍ ଆ ସନାୟୁମ୍ ବାତ୍ତେ ଅଃନ୍ନଞିଡେନ୍ ଆନମେଙ୍ ଆଞନାଙ୍ ଆସନ୍ ଜଗେଲେ ଇସ୍ୱରନ୍ ଆ ଡନୁଙ୍ୟମ୍ଲୋଙ୍ ଗବ୍ରିଲନ୍ ଡକୋନାବା ।
୨୨ ଆଡ୍ରାଲ୍ଗଡ୍ତେଞ୍ଜି ଆ ମନ୍ରାଜିଆଡଙ୍ ଅବ୍ଡର୍ନେବାଜି । ୨୩ ଇର୍ସେଲୋଙନ୍ ଆଗ୍ରଲୋଏଞ୍ଜି ଆ ମନ୍ରାଜିଆଡଙ୍ ତଗୋଲୋଙନ୍ ସିଲଡ୍ ଆତ୍ରବ୍ତବନ୍ ଅନ୍ତମ୍ ତବ୍ବାଜି । ଆରି ଜେଲୁ ଡଅଙନ୍ ଆ ଇର୍ସେ ବାତ୍ତେ ଆରଡିଲେନ୍ ଆ ସିନ୍ରି ନିୟ୍ ଏଡ଼ୁର୍ମଡ୍ବା, ବନ୍ଡ ବନ୍ତଙନ୍ ବାତ୍ତେ ଆନିଞ୍ଜିଆଡଙ୍ କାନକାରମ୍ ଗାମ୍ବାଜି ।
ସନେଙ୍କେନ୍ ପାର୍ତନାନ୍
୨୪ ଆନା ଆମ୍ବେଞ୍ଜିଆଡଙ୍ ଅନସେଡ୍ଲୋଙନ୍ ସିଲଡ୍ ଡୋବ୍ଡୋବନ୍ ଆସନ୍ ଆରି ଆ ଗନୁଗୁ ପନେମେଙନ୍ ଆ ମୁକ୍କାବା ଏର୍ଡୋସାଡାଗୋ ଡ ସର୍ଡାନ୍ ବାତ୍ତେ ଡନକ୍କୋନ୍ ଆସନ୍ ବୋର୍ସାନ୍ ଡକୋ, ୨୫ ତି ଆବୟନ୍ ଅନୁର୍ମର୍ଲେନ୍ ଇସ୍ୱରନ୍ ଆ ଗନୁଗୁ ପନେମେଙ୍, ସନାଆରନ୍, ବୋର୍ସାନ୍ ଡ ରନପ୍ତିନ୍, ପ୍ରବୁ ଜିସୁ କ୍ରିସ୍ଟଲେନ୍ ଅମ୍ମେଲେ ଆମ୍ମୁଙ୍ ସିଲଡ୍ ନମିନ୍ତାନ୍ ଆରି ଆଏଡ଼ର୍ ଆନିନ୍ଆତେ ଡେଏତୋ । ଆମେନ୍ ।