୧୦
ବାରଜଣ ଅନାପ୍ପାୟଞ୍ଜି
(ମାର୍କ ୩:୧୩-୧୯; ଲୁକ ୬:୧୨-୧୬)
୧ ଜିସୁନ୍ ବାରଜଣ ଞଙ୍ନେମରଞ୍ଜିଆଡଙ୍ ଓଡ୍ଡେଡାଲେ ଏର୍ମଡ଼ିର୍ ପୁରାଡ଼ାଞ୍ଜିଆଡଙ୍ ଗଙ୍ଗଙନ୍ ଆସନ୍ ଆରି ଅଡ଼୍କୋ ବନମ୍ୱମଞ୍ଜି ଡ ଅଡ଼୍କୋନ୍ ଆ ରୋଗଜି ମନବ୍ନଙନ୍ ଆସନ୍ ଆନିଞ୍ଜିଆଡଙ୍ ସନୋଡ଼ାନେନ୍ ତିୟେଞ୍ଜି । ୨ ତି ବାରଜଣ ଅନାପ୍ପାୟଞ୍ଜି ଆଞୁମ୍ ଏନ୍ନେଲେ, ପର୍ତମ୍ମୁ ସିମନନ୍, ଆନିନ୍ଆଡଙ୍ ପିତ୍ର ଗାମ୍ତଜି, ଆରି ଆ ବୋଞାଙନ୍ ଆନ୍ଦ୍ରିଅନ୍, ଜେବଦିନ୍ ଆ ଡାଙ୍ଗଡ଼ାଅନ୍ଜି ଜାକୁବନ୍ ଡ ଆ ବୋଞାଙନ୍ ଜନନ୍, ୩ ପିଲିପନ୍ ଡ ବାର୍ତଲମିନ୍, ତୋମାନ୍ ଡ ପାନୁବେଡ୍ମର୍ ମାତିଉନ୍, ଆଲପିନ୍ ଆ ଡାଙ୍ଗଡ଼ାଅନ୍ ଜାକୁବନ୍ ଡ ତଦ୍ଦିୟନ୍, ୪ ସିମନନ୍, ଇସ୍ରାଏଲନ୍ ଆ ତନାଣ୍ଡେନ୍ ଆସନ୍ ଆର୍ଲଡଜେଞ୍ଜି ଆ ଜିଉଦିଜି ଆମଙ୍ଲୋଙ୍ ସିଲଡ୍ କେନ୍ଆନିନ୍ ଅବୟ୍ନେ, ଆରି ଇସ୍କାରିତ ଜିଉଦାନ୍, କେନ୍ଆନିନ୍ ଜିସୁନ୍ଆଡଙ୍ ବନେରାଞ୍ଜି ଆସିଲୋଙ୍ ସୋରୋପ୍ପାୟେନ୍*୧୦:୪ ବାଁୟ୍ସିଲନ୍ ।
ବାରଜଣ ଞଙ୍ନେମରଞ୍ଜି ଆ କାବ୍ବାଡ଼ା
(ମାର୍କ ୬:୭-୧୩; ଲୁକ ୯:୧-୬)
୫ ଜିସୁନ୍ କେନ୍ ବାରଜଣଞ୍ଜିଆଡଙ୍ ଏନ୍ନେଲେ ବାଁୟ୍ଲେ ଆପ୍ପାୟେଞ୍ଜି; “ଏର୍ଜିଉଦିମରଞ୍ଜି ଆମଙ୍ ଏଇୟ୍ଡଙ୍, ସମିରୋଣମରଞ୍ଜି ଅନ୍ନିଙ୍ ଆ ଗଡ଼ାଲୋଙ୍ ଏଗନ୍ଡଙ୍, ୬ ଆର୍ପାୟ୍ ଆରାଡ଼ଏଞ୍ଜି ଆ ମେଣ୍ଡାଜି ଅନ୍ତମ୍ ଇସ୍ରାଏଲ୍ କେଜ୍ଜାଲୋଙନ୍ ଆରାଡ଼ଏଞ୍ଜି ଆ ମନ୍ରାଜି ଆମଙ୍ ଇୟ୍ବା । ୭ ଆରି ଜିରା ଜିରା ‘ରୁଆଙ୍ ରାଜ୍ୟନ୍ ତୁୟାଲାୟ୍,’ ଗାମ୍ଲେ ଇୟ୍ନବ୍ପ୍ପୁଙ୍ବାଜି । ୮ ବମ୍ୱମ୍ନେମରଞ୍ଜି ମବ୍ନଙ୍ବାଜି, ଆରବୁମରଞ୍ଜି ଅବ୍ମେଙ୍ବାଜି, ମୋଡ୍ଡୋମରଞ୍ଜି ମବ୍ଡ଼ିର୍ବାଜି, ବୁତଞ୍ଜି ଗଙ୍ବାଜି । ଅଙ୍ଗାତେ ଆମ୍ୱେନ୍ କାଣ୍ଡାରେଙ୍ ଏଞାଙେନ୍, ତିଆତେ ଆମ୍ୱେନ୍ ଆନ୍ନାମରଞ୍ଜିଆଡଙ୍ କାଣ୍ଡାରେଙ୍ ତିୟ୍ବାଜି । ୯ ଗାଞ୍ଜିଆଲୋଙ୍ବେନ୍ ସୁନା କି ତଙ୍କା କି ତମ୍ୱା ଏପାଙ୍ଡଙ୍ । ୧୦ ଆରି ଜିର୍ଜିରନ୍ ଆସନ୍ ମୁନା କି ବାଗୁ ଅଙ୍ଗିନ୍, ପାଣ୍ଡୋୟନ୍, ତୁଡ଼େଡାଙ୍ ଏବ୍ଜାଡାଡଙ୍, ଇନିଆସନ୍ଗାମେଣ୍ଡେନ୍ କାବ୍ବାଡ଼ାମରନ୍ ବର୍ତନ୍ନାନ୍ ଆଞନାଙ୍ ଆସନ୍ ଆନିନ୍ ଜିଞ୍ଜିନ୍ ।”
୧୧ “ଆମ୍ୱେଞ୍ଜି ଅନ୍ନିଙ୍ ଆ ଗଡ଼ା କି ଅନ୍ନିଙ୍ ଆ ସାଇ ଇୟ୍ଲେ ଏଗନେ ଡେନ୍, ତେତ୍ତେ ଅଙ୍ଗା ମନ୍ରା ଆମ୍ୱେନ୍ଆଡଙ୍ ସାକ୍କେକୁଲନ୍ ଆସନ୍ ସାୟ୍ତେ, ତିଆତେ ସୁମ୍ସୁମ୍ଲେ ଇୟ୍ ଗିୟ୍ବା, ସିଲଡ୍ଲ୍ଲନ୍ ତି ତେତ୍ତେ ସିଲଡ୍ ଆନ୍ନାରେଙ୍ ଅଣ୍ଡ୍ରଙ୍ ଏଜିରେନ୍ ଜାୟ୍ ତି ଆସିଂ ଇୟ୍ ଡକୋନାବା । ୧୨ ଆରି ଆମ୍ୱେନ୍ ଅସିଙନ୍ ଇୟ୍ଲେ ଏଗନେ ଆଡିଡ୍, ‘ଆମ୍ୱେନ୍ ସରିନ୍ ସନୟୁନ୍ ଡକୋନେତୋ,’ ଗାମ୍ଲେ ତି ଆସିଂମର୍ଜିଆଡଙ୍ ଇୟ୍ ବର୍ବାଜି । ୧୩ ତି ଆସିଂମର୍ଜି ଆମ୍ୱେନ୍ଆଡଙ୍ ଜାଲବେଞ୍ଜି ଡେନ୍, ଆମଙଞ୍ଜି ସନୟୁନ୍ ଜିରାୟ୍ତୋ, ବନ୍ଡ ଆନିଞ୍ଜି ଆମ୍ୱେନ୍ଆଡଙ୍ ଅଃଜ୍ଜାଲବେଞ୍ଜି, ଏତ୍ତେଲ୍ଡେନ୍ ଆମଙଞ୍ଜି ସନୟୁନ୍ ଜିର୍ଡଙାୟ୍ ତଡ୍ । ୧୪ ✡୧୦:୧୪ ଅନାପ୍ପାୟ୍ ୧୩:୫୧ଆରି, ଆନା ଆମ୍ୱେନ୍ଆଡଙ୍ ଅଃଜ୍ଜାବେନ୍, କି ବର୍ନେବେନ୍ ଅଃନ୍ନମ୍ଡଙେ, ତି ଆସିଂ ସିଲଡ୍ କି ତି ଆ ଗଡ଼ା ସିଲଡ୍ ଡୁଙ୍ଲନ୍ ଏଜିରେନ୍ ଆଡିଡ୍ ତାଲ୍ଜଙ୍ବେନ୍ ଆ ଉମ୍ରିଲ ତୁୟ୍ତୁୟ୍ଜଙ୍ନାବା । ୧୫ ✡୧୦:୧୫ ମାତିଉ ୧୧:୨୪✡୧୦:୧୫ ଲୁକ ୧୦:୪-୧୨ଞେନ୍ ଆମ୍ୱେଞ୍ଜିଆଡଙ୍ ଆଜାଡ଼ିଡମ୍ ବର୍ତବେନ୍, ପନ୍ସୁଆତି ଡିନ୍ନାଇଙନ୍ ତି ଆ ଗଡ଼ା ଆ ପନବ୍ରଡ୍ ସିଲଡ୍ ସଦୋମନ୍ ଡ ଗମୋରା ଡେସାନ୍ ଆ ପନବ୍ରଡ୍ ରପ୍ତି ସଏତନେ ।”
ଆଜିର୍ତାଞନ୍ ଆ ଡନଣ୍ଡାୟ୍
(ମାର୍କ ୧୩:୯-୧୩; ଲୁକ ୨୧:୧୨-୧୭)
୧୬ ✡୧୦:୧୬ ଲୁକ ୧୦:୩ “ଗିୟ୍ବା, ବଲିଆଞ୍ଜି ଆମଙ୍ରେଙ୍ ମେଣ୍ଡାଞ୍ଜି ଅନ୍ତମ୍ ଞେନ୍ ଆମ୍ୱେଞ୍ଜିଆଡଙ୍ ଆପ୍ପାୟ୍ତବେନ୍, ତିଆସନ୍ ଜାଆଡନ୍ ଅନ୍ତମ୍ ବୁଡ୍ଡିବେନ୍ତୋ ଆରି କୁକ୍କୁରନ୍ ଅନ୍ତମ୍ ଲବଡ୍ଡିବେନ୍ତୋ । ୧୭ ✡୧୦:୧୭ ମାର୍କ ୧୩:୯-୧୧; ଲୁକ ୧୨:୧୧,୧୨; ୨୧:୧୨-୧୫ବନ୍ଡ ମନ୍ରାଞ୍ଜି ଆମଙ୍ ସିଲଡ୍ ଆବ୍ବୟ୍ଲନ୍ ଡକୋନାବା, ଇନିଆସନ୍ଗାମେଣ୍ଡେନ୍ ଆନିଞ୍ଜି ଆମ୍ବେଞ୍ଜିଆଡଙ୍ ଜିଲେ ପନ୍ସୁଆତିସିଂଲୋଙନ୍ ସୋରୋପ୍ପାୟ୍ତବେଞ୍ଜି ଆରି ଆ ରନୁକ୍କୁସିଂରେଙଞ୍ଜି ସାମକାନ୍ ବାତ୍ତେ ତିଡ୍ତବେଞ୍ଜି । ୧୮ ଆରି ଞେନ୍ ଆସନ୍ ଗାମ୍ଲେ ଆମ୍ୱେଞ୍ଜିଆଡଙ୍ ସୋଡ଼ାମରଞ୍ଜି ଡ ରାଜାଞ୍ଜି ଆମଙ୍ ଓରୋଙ୍ତବେଞ୍ଜି, ତିଆଡିଡ୍ ଆମଙଞ୍ଜି ଡ ଏର୍ଜିଉଦିମରଞ୍ଜି ଆମଙ୍ ସାକିନ୍ ତନିୟନ୍ ଆସନ୍ ଆମ୍ୱେଞ୍ଜି ରୟଙନ୍ ଏଞାଙ୍ତେ । ୧୯ ବନ୍ଡ ଅଙ୍ଗା ଆଡିଡ୍ ଆନିଞ୍ଜି ଆମ୍ବେଞ୍ଜିଆଡଙ୍ ଜିଲେ ପନ୍ସୁଆତିନ୍ ଆସନ୍ ସୋରୋପ୍ପାୟ୍ତବେଞ୍ଜି, ତିଆଡିଡ୍ ଆମ୍ୱେଞ୍ଜି ଏଙ୍ଗାଲେ ଇନି ଆ ବର୍ନେ ଏବର୍ତନେ, ତିଆସନ୍ ଏଇଃୟମ୍ଡଙେ, ଇନିଆସନ୍ଗାମେଣ୍ଡେନ୍ ଇନି ଏଙ୍ଗାଲେ ଏବର୍ତନେ, ତିଆତେ ତି ଆ ବନେଡ଼ା ଆମ୍ୱେଞ୍ଜିଆଡଙ୍ ତନିୟନ୍ ଡେତେ । ୨୦ ଇନିଆସନ୍ଗାମେଣ୍ଡେନ୍ ଆମ୍ୱେଞ୍ଜି ତିଆତେ ଏଃବ୍ବର୍ନେ, ବନ୍ଡ ଆପେୟ୍ବେନ୍ ଆ ମଡ଼ିର୍ ପୁରାଡ଼ା ଅମ୍ମଲୋଙ୍ବେନ୍ ଡକୋଡାଲନ୍ ତଅଡ୍ଗଡ୍ବେନ୍ ବର୍ତନେ ।”
୨୧ ✡୧୦:୨୧ ମାର୍କ ୧୩:୧୨; ଲୁକ ୨୧:୧୬“ବୋଞାଙନ୍ ବୋଞାଙନ୍ଆଡଙ୍ ଆରି ଆପେୟନ୍ ଡାଙ୍ଗଡ଼ାଅନନ୍ଆଡଙ୍ ରନବୁନ୍ ଆସନ୍ ସୋରୋପ୍ପାୟ୍ତଜି, ଅଅନଞ୍ଜି ଆପେୟନ୍ ଅୟୋଙନ୍ ଆ ବିରୁଦଲୋଙ୍ ଡୋଲନ୍ ଆନିଞ୍ଜିଆଡଙ୍ ସୋରୋପ୍ପାୟ୍ତଜି । ୨୨ ✡୧୦:୨୨ ମାତିଉ ୨୪:୯; ମାର୍କ ୧୩:୧୩; ଲୁକ ୨୧:୧୭; ମାତିଉ ୨୪:୧୩; ମାର୍କ ୧୩:୧୩ଅଞୁମ୍ଞେନ୍ ଆସନ୍ ଗାମ୍ଲେ ଅଡ଼୍କୋଞ୍ଜି ଆମ୍ୱେଞ୍ଜିଆଡଙ୍ ଏଡ଼ୁର୍ମଡ୍ତବେଞ୍ଜି, ବନ୍ଡ ଆନା ଆତନିକ୍କି ଜାୟ୍ ଡର୍ନେଲୋଙନ୍ ଗବ୍ରିଲନ୍ ଡକୋତନ୍, ଆନିନ୍ ଅନୁରନ୍ ଞାଙ୍ତେ । ୨୩ ଆନିଞ୍ଜି ଅବୟ୍ ଗଡ଼ାଲୋଙନ୍ ଆମ୍ୱେଞ୍ଜିଆଡଙ୍ ଡଣ୍ଡାୟ୍ଲବେଞ୍ଜି ଡେନ୍, ତିଆଡିଡ୍ ଆନ୍ନା ଗଡ଼ାନ୍ ଜିର୍ବା, ଇନିଆସନ୍ଗାମେଣ୍ଡେନ୍ ଞେନ୍ ଆମ୍ୱେଞ୍ଜିଆଡଙ୍ ଆଜାଡ଼ିଡମ୍ ବର୍ତବେନ୍, ଇସ୍ରାଏଲ୍ ଗଡ଼ାରେଙନ୍ ଆମ୍ୱେଞ୍ଜି କାବ୍ବାଡ଼ାବେନ୍ ଅଣ୍ଡ୍ରଙ୍ ଏବ୍ସୁଜ୍ଜେଏନ୍ ଆମ୍ମୁଙ୍ ମନ୍ରା ଡାଙ୍ଗଡ଼ାଅନନ୍ ଜିର୍ତାୟ୍ ।”
୨୪ ✡୧୦:୨୪ ଲୁକ ୬:୪୦; ଜନ ୧୩:୧୬; ୧୫:୨୦“ଞଙ୍ନେମରନ୍ ଞନଙ୍ତିୟ୍ମରନ୍ ସିଲଡ୍, ଅଡ଼େ କମ୍ୱାରିମରନ୍ ସାଉକାରନ୍ ସିଲଡ୍ ତୋଣ୍ଡୋନ୍ ତଡ୍ । ୨୫ ✡୧୦:୨୫ ମାତିଉ ୯:୩୪; ୧୨:୨୪; ମାର୍କ ୩:୨୨; ଲୁକ ୧୧:୧୫ଞଙ୍ନେମରନ୍ ଆ ଞନଙ୍ତିୟ୍ମରନ୍ ଡ କମ୍ୱାରିମରନ୍ ଆ ସାଉକାରନ୍ ଅନ୍ତମ୍ ଡେଏନ୍ ଡେନ୍ ଆନିଞ୍ଜି ଆସନ୍ ସରି । ଆନିଞ୍ଜି ଅସିଙନ୍ ଆ ମୁଡ଼ମର୍ଆଡଙ୍ ବାଲ୍ଜିବୁଲ୍ ଗାମେଞ୍ଜି ଡେନ୍, ଏତ୍ତେଲ୍ଡେନ୍ ଅସିଂମରଞ୍ଜିଆଡଙ୍ ଆରି ଡିଅଙ୍ଗା ଆ ଗୋଗୋୟ୍ ଅରଃ ବର୍ନେଞ୍ଜି !”
ଆନାଆଡଙ୍ ବତଙ୍ତବୋ
(ଲୁକ ୧୨:୨-୭)
୨୬ ✡୧୦:୨୬ ମାର୍କ ୪:୨୨; ଲୁକ ୮:୧୭ “ତିଆସନ୍ ମନ୍ରାଞ୍ଜିଆଡଙ୍ ବତଙ୍ଡଙ୍ବେନ୍, ଇନିଆସନ୍ଗାମେଣ୍ଡେନ୍ ଅଙ୍ଗାତେ ଅଃଗିୟ୍ତାଏ, ତିଅନ୍ତମ୍ ଆୟୁମ୍ୟୁମନ୍ଆତେ ଇନ୍ନିଙ୍ ତଡ୍, ଆରି ଅଙ୍ଗାତେ ଅଃଜ୍ଜନାଲଙ୍ନେ, ତିଅନ୍ତମ୍ ଆସସନ୍ଆତେ ଇନ୍ନିଙ୍ ତଡ୍ । ୨୭ ଞେନ୍ ଆମ୍ୱେଞ୍ଜିଆଡଙ୍ ଅଙ୍ଗାତେ ଆ ଲୋଙଡ୍ଲୋଙନ୍ ବର୍ତବେନ୍, ତିଆତେ ଆ ସାଆର୍ଲୋଙନ୍ ବର୍ନାବା, ଆରି ଅଙ୍ଗାତେ ଆମ୍ୱେଞ୍ଜି ଆସସଲୋଙନ୍ ଏଅମ୍ଡଙ୍ତେ, ତିଆତେ ଅସିଙନ୍ ଆ ତୋଣ୍ଡୋ ବିଲେଙ୍ଲୋଙନ୍ ବର୍ନାବା । ୨୮ ଆରି, ଆନାଜି ଡଅଙନ୍ ରବ୍ବୁତଜି, ବନ୍ଡ ପୁରାଡ଼ାନ୍ ରବ୍ବୁଲେ ଅଃର୍ରପ୍ତିଏଜି, ଆନିଞ୍ଜିଆଡଙ୍ ବତଙ୍ଡଙ୍ବେନ୍, ଆର୍ପାୟ୍ ଅଙ୍ଗା ଇସ୍ୱର ଡଅଙନ୍ ଡ ପୁରାଡ଼ାନ୍ ବାଗୁନ୍ ନରକଲୋଙନ୍ ଅବ୍ମୋସ୍ସାଲେ ରପ୍ତିତେ ଆନିନ୍ଆଡଙ୍ ତୁମ୍ ବତଙ୍ବା । ୨୯ ବାଗୁ ସୟ୍ସିଂତିଡନ୍ ଇନି ବପୋୟ୍ସା ବାତ୍ତେ ଅଃତ୍ତମ୍ନେ ପଙ୍ ? ଆରି ଆପେୟ୍ବେନ୍ ତିଆତେ ଗଲୋଏତୋ ଏଃଗାମ୍ଲୋ ଡେନ୍ ତେତ୍ତେ ସିଲଡ୍ ଅବୟ୍ ଜନଙ୍ ଲବଲୋଙନ୍ ଜାୟ୍ତାନ୍ ଅଃଗଲୋଏ । ୩୦ ବନ୍ଡ ଅବବ୍ଲୋଙ୍ବେନ୍ ଆ ଉଉ ଜନଙ୍ ଅଡ଼୍କୋନ୍ ଆଡିଡିଆୟ୍ । ୩୧ ତିଆସନ୍ ବତଙ୍ଡଙ୍ବେନ୍, ସୟ୍ସିଂତିଡଞ୍ଜି ସିଲଡ୍ ଆମ୍ୱେଞ୍ଜି ଗୋଗୋୟ୍ ମଡ଼ଗା ।”
କ୍ରିସ୍ଟନ୍ଆଡଙ୍ ଜନାଜାନ୍ ଡ ମନୁର୍ସେନ୍
(ଲୁକ ୧୨:୮-୯)
୩୨ “ଆରି, ଆନା ମନ୍ରାଞ୍ଜି ଆ ତେମଡ୍ଲୋଙ୍ ଞେନ୍ଆଡଙ୍ ଅଃମ୍ମୁର୍ସେଇଁୟ୍, ଞେନ୍ ନିୟ୍ ରୁଆଙ୍ଲୋଙନ୍ ଆଡ୍ରକୋତନ୍ ଆପେୟ୍ଞେନ୍ ଆ ତେମଡ୍ଲୋଙ୍ ଆନିନ୍ଆଡଙ୍ ଅଃମ୍ମୁର୍ସେଆୟ୍ । ୩୩ ✡୧୦:୩୩ ୧ ତିମତି ୨:୧୨ବନ୍ଡ ଆନା ମନ୍ରାଞ୍ଜି ଆ ତେମଡ୍ଲୋଙ୍ ଞେନ୍ଆଡଙ୍ ମୁର୍ସେତିଁୟ୍, ଞେନ୍ ନିୟ୍ ରୁଆଙ୍ଲୋଙନ୍ ଆଡ୍ରକୋତନ୍ ଆପେୟ୍ଞେନ୍ ଆ ତେମଡ୍ଲୋଙ୍ ଆନିନ୍ଆଡଙ୍ ମୁର୍ସେତାୟ୍ ।”
ସନୟୁନ୍ ଇଜ୍ଜା ଆର୍ପାୟ୍ କଡ଼ିବନ୍
(ଲୁକ ୧୨:୫୧-୫୩; ୧୪:୨୬-୨୭)
୩୪ “ଞେନ୍ ପୁର୍ତିଲୋଙନ୍ ସନୟୁନ୍ ତନିୟନ୍ ଆସନ୍ ଇୟ୍ଲାୟ୍ ଗାମ୍ଲେ ଏବ୍ଡିସୟ୍ଡଙ୍, ସନୟୁନ୍ ତନିୟନ୍ ଆସନ୍ ଅଃନ୍ନିୟ୍ଲାୟ୍ ଆର୍ପାୟ୍ କଡ଼ିବନ୍ ତନିୟନ୍ ଆସନ୍ ଇୟ୍ଲାୟ୍ । ୩୫ ଇନିଆସନ୍ଗାମେଣ୍ଡେନ୍ ଞେନ୍ ଆପେୟନ୍ ଆ ବିରୁଦଲୋଙ୍ ଡାଙ୍ଗଡ଼ାଅନନ୍, ଡାଙ୍ଗଡ଼ାଅନନ୍ ଆ ବିରୁଦଲୋଙ୍ ଆପେୟନ୍, ଅୟୋଙନ୍ ଆ ବିରୁଦଲୋଙ୍ ଡାଙ୍ଗଡ଼ିଅନନ୍, ଡାଙ୍ଗଡ଼ିଅନନ୍ ଆ ବିରୁଦଲୋଙ୍ ଅୟୋଙନ୍, କିନାରନ୍ ଆ ବିରୁଦଲୋଙ୍ କଉନନ୍, କଉନନ୍ ଆ ବିରୁଦଲୋଙ୍ କିନାରନ୍ ଅନବ୍ବିରୁଦନ୍ ଆସନ୍ ଇୟ୍ଲାୟ୍ । ୩୬ ଆରି ଆସିଂଡମନ୍ ଆ ମନ୍ରା ମା ମନ୍ରାନ୍ ଆ ବନେରା ଡେତେ ।”
୩୭ “ଆନା ଆପେୟନ୍ ଡ ଆୟୋଙନ୍ଆଡଙ୍ ଞେନ୍ ସିଲଡ୍ ଗୋଗୋୟ୍ ଡୁଙ୍ୟମ୍ତେ, ଆନିନ୍ ଞେନ୍ ଆସନ୍ ଜିଞ୍ଜିନ୍ ତଡ୍, ଆରି ଆନା ଆ ଡାଙ୍ଗଡ଼ାଅନନ୍ ଡ ଆ ଡାଙ୍ଗଡ଼ିଅନନ୍ ଞେନ୍ ସିଲଡ୍ ଗୋଗୋୟ୍ ଡୁଙ୍ୟମ୍ତେ, ଆନିନ୍ ଞେନ୍ ଆସନ୍ ଜିଞ୍ଜିନ୍ ତଡ୍ । ୩୮ ✡୧୦:୩୮ ମାତିଉ ୧୬:୨୪; ମାର୍କ ୮:୩୪; ଲୁକ ୯:୨୩ଆରି, ଅଙ୍ଗା ମନ୍ରା ଆଅକ୍କାଡଙନ୍ ବୋୟ୍ଲେ ଞେନ୍ଆଡଙ୍ ଅଃସଣ୍ଡୋଙିଁୟ୍, ଆନିନ୍ ଞେନ୍ ଆସନ୍ ଜିଞ୍ଜିନ୍ ତଡ୍ । ୩୯ ✡୧୦:୩୯ ମାତିଉ ୧୬:୨୫; ମାର୍କ ୮:୩୫; ଲୁକ ୯:୨୪; ୧୭:୩୩; ଜନ ୧୨:୨୫ଅଙ୍ଗା ମନ୍ରା ଆନମେଙନ୍ ଆଞନାଙ୍ ଆସନ୍ ଏର୍ତେ ଗୋୟ୍ତେ, ଆନିନ୍ ତିଆତେ ଅବ୍ବଡ଼ୟ୍ତେ, ଆରି ଆନା ଞେନ୍ ଆସନ୍ ଆନମେଙନ୍ ଅବ୍ବଡ଼ୟ୍ତେ, ଆନିନ୍ ତିଆତେ ଞାଙ୍ତେ ।”
ବର୍ତନ୍ନାନ୍
(ମାର୍କ ୯:୪୧)
୪୦ ✡୧୦:୪୦ ଲୁକ ୧୦:୧୬; ଜନ ୧୩:୨୦; ମାର୍କ ୯:୩୭; ଲୁକ ୯:୪୮“ଆନା ଆମ୍ୱେଞ୍ଜିଆଡଙ୍ ଜାତବେନ୍, ଆନିନ୍ ଞେନ୍ଆଡଙ୍ ଜାତିଁୟ୍, ଆରି ଆନା ଞେନ୍ଆଡଙ୍ ଜାତିଁୟ୍, ଆନା ଞେନ୍ଆଡଙ୍ ଆପ୍ପାୟ୍ଲିଁୟ୍ ଆନିନ୍ଆଡଙ୍ ଆନିନ୍ ଜାତେ । ୪୧ ଆନା ପୁର୍ବାଃତେ ବର୍ନେମରନ୍ଆଡଙ୍ ଇସ୍ୱରନ୍ ଆ ପୁର୍ବାଃତେ ବର୍ନେମର୍ ଗାମ୍ଲେ ଜାତେ, ଆନିନ୍ ପୁର୍ବାଃତେ ବର୍ନେମରନ୍ ଆ ବର୍ତନ୍ନା ଞାଙ୍ତେ । ଆରି, ଆନା ଡରମ୍ମମରନ୍ଆଡଙ୍ ଡରମ୍ମମର୍ ଗାମ୍ଲେ ଜାତେ, ଆନିନ୍ ଡରମ୍ମମରନ୍ ଆ ବର୍ତନ୍ନା ଞାଙ୍ତେ । ୪୨ ଆରି, ଆନା କେନ୍ ସନ୍ନାମରଞ୍ଜି ଆମଙ୍ଲୋଙ୍ ସିଲଡ୍ ଅବୟ୍ନେଆଡଙ୍ ଗାଡାନେନ୍ ଆସନ୍ ବଗିନା ଆ ଜଏଙ୍ଡାନ୍ ତିୟ୍ତେ, ଞେନ୍ ଆମ୍ୱେଞ୍ଜିଆଡଙ୍ ଆଜାଡ଼ିଡମ୍ ବର୍ତବେନ୍, ଆନିନ୍ ଏଙ୍ଗାଲେ ଜନଙ୍ ଆ ବର୍ତନ୍ନାନ୍ ଅଃନ୍ନବ୍ଅଡ଼ଜେ, ଇନିଆସନ୍ଗାମେଣ୍ଡେନ୍ ଆନିନ୍ ଞଙ୍ନେମର୍ଞେନ୍ ।”
*୧୦:୪ ୧୦:୪ ବାଁୟ୍ସିଲନ୍
✡୧୦:୧୪ ୧୦:୧୪ ଅନାପ୍ପାୟ୍ ୧୩:୫୧
✡୧୦:୧୫ ୧୦:୧୫ ମାତିଉ ୧୧:୨୪
✡୧୦:୧୫ ୧୦:୧୫ ଲୁକ ୧୦:୪-୧୨
✡୧୦:୧୬ ୧୦:୧୬ ଲୁକ ୧୦:୩
✡୧୦:୧୭ ୧୦:୧୭ ମାର୍କ ୧୩:୯-୧୧; ଲୁକ ୧୨:୧୧,୧୨; ୨୧:୧୨-୧୫
✡୧୦:୨୧ ୧୦:୨୧ ମାର୍କ ୧୩:୧୨; ଲୁକ ୨୧:୧୬
✡୧୦:୨୨ ୧୦:୨୨ ମାତିଉ ୨୪:୯; ମାର୍କ ୧୩:୧୩; ଲୁକ ୨୧:୧୭; ମାତିଉ ୨୪:୧୩; ମାର୍କ ୧୩:୧୩
✡୧୦:୨୪ ୧୦:୨୪ ଲୁକ ୬:୪୦; ଜନ ୧୩:୧୬; ୧୫:୨୦
✡୧୦:୨୫ ୧୦:୨୫ ମାତିଉ ୯:୩୪; ୧୨:୨୪; ମାର୍କ ୩:୨୨; ଲୁକ ୧୧:୧୫
✡୧୦:୨୬ ୧୦:୨୬ ମାର୍କ ୪:୨୨; ଲୁକ ୮:୧୭
✡୧୦:୩୩ ୧୦:୩୩ ୧ ତିମତି ୨:୧୨
✡୧୦:୩୮ ୧୦:୩୮ ମାତିଉ ୧୬:୨୪; ମାର୍କ ୮:୩୪; ଲୁକ ୯:୨୩
✡୧୦:୩୯ ୧୦:୩୯ ମାତିଉ ୧୬:୨୫; ମାର୍କ ୮:୩୫; ଲୁକ ୯:୨୪; ୧୭:୩୩; ଜନ ୧୨:୨୫
✡୧୦:୪୦ ୧୦:୪୦ ଲୁକ ୧୦:୧୬; ଜନ ୧୩:୨୦; ମାର୍କ ୯:୩୭; ଲୁକ ୯:୪୮