ಅಪೊಸ್ತಲರ ಕೃತ್ತ್ಯಗಳು
ಅಪೊಸ್ತಲಾಂಚಿ ಕಾಮಾ ಪುಸ್ತಕ್
ವಳಕ್
ಅಪೊಸ್ತಲಾಂಚಿ ಕಾಮಾ ಪುಸ್ತಕಾತ್ ಗುಡಿ ಕಸೊ ಸುರು ಹೊಲೊ, ಅನಿ ತೆ ಖಚ್ಚ್ಯಾ ರಿತಿನ್ ಜೆರುಜಲೆಮಾಕ್ನಾ ಯುದಾಯ್, ಸಮಾರಿಯಾ ಅನಿ ತೆಚ್ಯಾ ತಿಕುಲ್ಲ್ಯಾ ಬಾಜುಕ್ ಪಗಳ್ಲಿ ಮನ್ತಲೆ ಖರೆ ಮನ್ತಲ್ಯಾ ವಿಶಯಾತ್ ಹ್ಯಾತುರ್ ಲಿವ್ನ್ ಹೊಲಾ. ಜೆಜುನ್ ಸರ್ಗಾರ್ ಜಾವ್ಚ್ಯಾ ಅದ್ದಿ ಸಾಂಗಲ್ಲ್ಯಾ ಸಾರ್ಕೆ1:8. ಹೆ ಪುಸ್ತಕ್ ಲುಕಾನ್ ಲಿವ್ಲಾ ಅನಿ ಲುಕಾನ್ ಲಿವಲ್ಲೆ ಬರ್‍ಯಾ ಖಬ್ರೆಚೆ ಪುಸ್ತಕ್ ಬಿ ಲಿವಲ್ಲಾ. ಹೊ ವೈದ್ಯಾ ಹೊವ್ನ್ ಹೊತ್ತೊ ಅನಿ ಲೈ ಹುಶ್ಯಾರ್ಕಿನ್ ಸಗ್ಳ್ಯೆ ದಾಖಲೆ ಬಿ ಸಮಾ ಕರುನ್ ಥವ್ನ್ ಘೆಟಲ್ಯಾನ್. ತೆನಿ ಅಪ್ಲಿ ದೊನ್ ಪುಸ್ತಕಾ ಹೊವ್ನ್ ಹೊತ್ತಿ ಅಪೊಸ್ತಲಾಂಚಿ ಕಾಮಾ ಅನಿ ಲುಕಾಚಿ ಬರಿ ಖಬರ್ ಗ್ರಿಕಾಂಚೊ “ಥಿಯೊಫಿಲ್” ಮನ್ತಲ್ಲ್ಯಾಕ್ ಸಾಂಗ್ತಲ್ಯಾ ಸಾರ್ಕೆ ಲಿವ್ಲಾ, ಖರೆ ಹಿ ಪುಸ್ತಕಾ ಲೈ ಕರುನ್ ವಿಶ್ವಾಸಿ ಲೊಕಾಕ್ನಿ ಲಿವ್ಲಾ, ಹಿತುರ್ ಗ್ರಿಕಾಕ್ನಿ ಜುದೆವಾಂಚಿ ಲೊಕಾಬಿ ಹಾತ್1:1.
ಜೆಜು ಕ್ರಿಸ್ತ್ ಜಲ್ಮಲ್ಯಾ ಸಾಟಾಕ್ನಾ ಸಾಟಾರ್ ಚಾರ್ ವರ್ಸಾಂಚ್ಯಾ ಮಾನಾ ಹೆ ಲಿವ್ನ್ ಹೊಲಾ, ಕಶ್ಯಾಕ್ ಮಟ್ಲ್ಯಾರ್ ಹೆ ಪುಸ್ತಕ್ ಪಾವ್ಲು ಬಂಧಿಖಾನ್ಯಾತ್ನಾ ಸುಟ್ಕಾ ಹೊತಲ್ಯಾ ಅದ್ದಿಚ್ ಸರ್ತಾ, ಹೊ ಲುಕಾಬಿ ಪಾವ್ಲು ವಾಂಗ್ಡಾ ಪ್ರಯಾನ್ ಕರುನ್ಗೆತ್ ಹೊತ್ತೊ, ಲೈ ಕರುನ್ ತೆನಿ ಹೆ ಪುಸ್ತಕ್ ಅಂತಿಯೊಕ್ಯ್ ಶಾರಾತ್ ಲಿವ್ಲಾ ಅಪೊಸ್ತಲಾಂಚಿ ಕಾಮಾ ಪುಸ್ತಕ್, ಲುಕಾನ್ ಲಿವಲ್ಯಾ ಬರ್‍ಯಾ ಖಬ್ರೆಚ್ಯಾ ಪುಸ್ತಕಾಚೊ ಫಿಡ್ಲೊ ಭಾಗ್ ಹೊವ್ನ್ ಹಾಯ್ ಕಶ್ಯಾಕ್ ಮಟ್ಲ್ಯಾರ್ ಹೆ ಪುಸ್ತಕ್ ಜೆಜು ಸರ್‍ಗಾಕ್ ಜಾತಲ್ಯಾ ವಿಶಯಾಚ್ಯಾ ವಾಂಗ್ಡಾ ಸುರುಹೊಲ್ಲಾ. ಲುಕಾನ್ ಲಿವಲ್ಲ್ಯಾ ಹ್ಯಾ ಪುಸ್ತಕಾಚೊ ಅನಿ ಅದ್ದಿ ಲಿವಲ್ಲ್ಯಾಬರ್ಯಾ ಖಬ್ರೆಚೊ ಉದ್ದೆಶ್ ಎಕುಚ್ ಹೊವ್ನ್ ಹಾಯ್. ಥಿಯೊಫಿಲ, ಅನಿ ವಾಡ್ವಳ್ಕಿ ಹೊವ್ಕ್ ಲಾಗಲ್ಲ್ಯಾ ಉಲ್ಲ್ಯಾ ವಿಶ್ವಾಸಿಕ್ನಿ ಶಿಕ್ವುತಲ್ಯಾಚ್ಯಾ ವಿಶಯಾತ್, ಅನಿ ಜೆಜುಜೆ ಜಿವನ್ ಅನಿ ಜೆಜು ಕ್ರಿಸ್ತಾಂವ್ ಪಾನ್ ಕಶೆ ಪಗಳ್ಲೆ ಮನ್ತಲೆ ಶಿಕ್ವುಕ್ ಸಾಟ್ನಿ ಲಿವ್ಲ್ಯಾನ್.
ಅಪೊಸ್ತಲಾಂಚಿ ಕಾಮಾ ಪುಸ್ತಕ್ ಅದ್ಲ್ಯಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಂಚೆ ಉದಾರನ್ ದಿತಾ, ಅನಿ ಜೆಜುಚ್ಯಾ ವರ್‍ತಿ ವಿಶ್ವಾಸ್ ಥವ್ತಲೆ ಮಟ್ಲ್ಯಾರ್ ಕಶೆ ರ್‍ಹಾತಾ ಮನುನ್ ದಾಕ್ವುತಾ. ಅನಿ ಅಪೊಸ್ತಲಾಂಚೆ ಉದಾರನ್ ಅಮ್ಕಾ ಪವಿತ್ರ್ ಆತ್ಮ್ಯಾಚೆರ್ ಕಶೆ ಹೊಂದುನ್ ರಾವ್ಚೆ ಅನಿ ಬರಿ ಖಬರ್ ಕಸಿ ಪಗ್ಳುಲ್ಲಾ ಮನ್ತಲೆ ದಾಕ್ವುತಾ.
ಭಾಗಾ.
1. ಅದ್ದಿ ಪವಿತ್ರ್ ಆತ್ಮೊ ಶಿಸಾಂಚ್ಯಾ ವರ್‍ತಿ ಅನಿ ದೆವಾಚ್ಯಾ ಲೊಕಾಂಚೊ ತಾಂಡೊ ವಾಡ್ವಳ್ಕಿ ಹೊತಾ 1:1-8
2. ಮಾನಾ ದೆವಾಚ್ಯಾ ಲೊಕಾಂಚೊ ತಾಂಡೊ ತರಾಸಾತ್ ಪಡ್ತಾ, ಅನಿ ಜೆರುಜಲೆಮಾಕ್ನಾ ಸಗ್ಳ್ಯಾ ಭಾಜುನ್ ಪಗ್ಳುಕ್ ಚಾಲು ಹೊತಾ. 8:12-23
3. ಮಾನಾ ಪಾವ್ಲು ಅದ್ದಿಚೆ ದೊನ್ವೆ ಸೆವೆಚೆ ಪರ್ಯಾನ್ ಕರ್‍ತಾ. 12:24—14:28
4. ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ಜೆರುಜಲೆಮಾತ್ ಭೆಟುನ್ ನ್ಹವ್ಯಾ ವಿಶ್ವಾಸಿಕ್ನಿ ಕಾಯ್ ಗರಜ್ ಹಾಯ್ ಮನುನ್ ಬಗುಕ್ ನಿರ್ಧಾರ್ ಕರ್‍ಲ್ಯಾನ್ 15:1-35
5. ಮಾನಾ ಪಾವ್ಲು ದೊನ್ವೆಚೆ ಸೆವೆಚೆ ಪ್ರಯಾನ್ ಕರ್‍ತಾ. 15:36—18:22
6. ಹೆಚ್ಯಾ ಮಾನಾ ಪಾವ್ಲು ತಿನ್ವೆಚೆ ಸೆವೆಚೆ ಪ್ರಯಾನ್ ಕರ್‍ತಾ 18:23—20:38
7. ತನ್ನಾ ಪಾವ್ಲು ಜೆರುಜಲೆಮಾತ್ ಬಂಧಿ ಹೊಲೊ 21—26
8. ಆಕ್ರಿಕ್ ಪಾವ್ಲುಕ್ ರೊಮಾಕ್ ಧಾಡುನ್ ಹೊಲೆ 27—28
1
1 ಪ್ರೆಮಾಚ್ಯಾ ಥಿಯೊಫಿಲಸ್,
ಮಾಜ್ಯಾ ಪಯ್ಲೆಚ್ಯಾ ಪುಸ್ತಕಾತ್ ಜೆಜುನ್ ಅಪ್ಲಿ ಕಾಮಾ ಸುರು ಕರಲ್ಲ್ಯಾ ಎಳಾಕ್ನಾ ಜೆಜುನ್ ಕರಲ್ಲಿ ಅನಿ ಶಿಕ್ವಲ್ಲಿ ಸಗ್ಳಿ ವಿಶಯಾ ಮಿಯಾ ಲಿವ್ಲೊ. 2 ಸರ್ಗಾರ್ ತೆಕಾ ಘೆವ್ನ್ ಗೆಲ್ಲ್ಯಾ ದಿಸಾ ಪತರ್, ಅನಿ ಅಪ್ನಾಚಿ ಅಪೊಸ್ತಲಾ ಮನುನ್ ಎಚುನ್ ಕಾಡಲ್ಲ್ಯಾಕ್ನಿ ಪವಿತ್ರ್ ಆತ್ಮ್ಯಾಚ್ಯಾ ಬಳಾ ವೈನಾ ತೆನಿ ಶಿಕ್ವುಲ್ಯಾನ್. 3 ಅಪ್ನಾಚ್ಯಾ ಮರ್‍ನಾಚ್ಯಾ ಮಾನಾಚ್ಯಾ ಎಳಾರ್ ಅಪ್ನಿ ಅನಿ ಪರ್ತುನ್ ಝಿತ್ತೊ ಹೊಲಾ ಮನುನ್ ಸುಮಾರ್ ಖಾತ್ರಿಯಾಂಚ್ಯಾ ವೈನಾ ತೆನಿ ದಾಕ್ವುನ್ ದಿಲ್ಯಾನ್, ಅನಿ ತೊ ಚಾಳಿಸ್ ದಿಸ್ ಪತರ್ ತೆಂಚ್ಯಾ ನದ್ರೆಕ್ ಪಡ್ಲೊ, ಅನಿ ದೆವಾಚ್ಯಾ ರಾಜಾಚ್ಯಾ ವಿಶಯಾತ್ ಬೊಲುನ್ಗೆತ್ ತೆಂಚ್ಯಾಕ್ಡೆ ರ್‍ಹಾಲೊ. 4 ಎಗ್ದಾ ತಸಿ ಎಕಾಕ್ಡೆ ತೊ ತೆಂಚ್ಯಾ ವಾಂಗ್ಡಾ ಜೆವಾನ್ ಕರುಕ್ ಲಾಗಲ್ಲೊ ತೆನಿ ತೆಂಕಾ ಅಶೆ ತಾಕಿತ್ ದಿಲ್ಯಾನ್ ಜೆರುಜಲೆಮ್ ಸೊಡುನ್ ಜಾವ್‍ನಕಾಶಿ , ಖರೆ ಮಾಜ್ಯಾ ಬಾಬಾನ್ ಗೊಸ್ಟ್ ದಿಲ್ಲ್ಯಾ ಭೊಮಾನಾಚಿ ವಾಟ್ ರಾಕಾ, ಹೆಚ್ಯಾ ವಿಶಯಾತ್ ಮಿಯಾ ಬೊಲ್ತಾನಾ ತುಮಿ ಆಯಿಕ್ಲ್ಯಾಶಿ. 5 ಕಶ್ಯಾಕ್ ಮಟ್ಲ್ಯಾರ್ ಜುವಾಂವಾನ್ ಪಾನಿಯಾನ್ ಬಾಲ್ತಿಮ್ ದಿಲ್ಯಾನ್, ಖರೆ ಅನಿ ಎಕ್ ಉಲ್ಲ್ಯಾ ದಿಸಾನಿ ತುಮ್ಕಾ ಪವಿತ್ರ್ ಆತ್ಮ್ಯಾನಿ ಬಾಲ್ತಿಮ್ ದಿವ್ನ್ ಹೊತಾ.
ಜೆಜು ಸರ್ಗಾ ವೈರ್ ಜಾತಲೆ
ಮಾರ್ಕ್ 16:19-20; ಲುಕ್ 24:50-53
6 ಅಶೆ ಅಪೊಸ್ತಲಾ ಜೆಜುಚ್ಯಾ ಭೊತ್ಯಾನ್ ಎಕಾಕ್ಡೆ ಗೊಳಾ ಹೊಲಿ, ಅನಿ ತೆಕಾ, “ಧನಿಯಾ ತಿಯಾ ಇಸ್ರಾಯೆಲಾಚೆ ರಾಜ್ ಅನಿ ಎಗ್ದಾ ಭಾಂದ್ತಲೆ ಹ್ಯಾಚ್ ಎಳಾರ್ ಕಾಯ್?” ಮನುನ್ ಇಚಾರ್‍ಲ್ಯಾನಿ.
7 ಖರೆ ತೆನಿ ತೆಂಕಾ ಜಬಾಬ್ ದಿವ್ನ್ ಮಟ್ಲ್ಯಾನ್ ಬಾಬಾನ್ ಅಪ್ಲ್ಯಾ ಸ್ವತಾಚ್ಯಾ ಅದಿಕಾರಾನ್ ನಿರ್ಧಾರ್ ಕರಲ್ಲೊ ಎಳ್ ಅನಿ ದಿಸ್ ಸಮ್ಜುನ್ ಘೆತಲೆ ಕಾಮ್ ತುಮ್ಚೆ ನ್ಹಯ್, 8 ಖರೆ ಪವಿತ್ರ್ ಆತ್ಮೊ ತುಮ್ಚ್ಯಾ ವರ್‍ತಿ ಯೆತಾ ತನ್ನಾ ತುಮ್ಕಾ ಬಳ್ ಗಾವ್ತಾ. ಮಾನಾ ಜೆರುಜಲೆಮಾಕ್ ,ಸಗ್ಳ್ಯಾ ಜುದೆಯ್ ಪ್ರಾಂತ್ಯಾತ್ ಅನಿ ಸಮರ್ಯಾತ್‍ ಅನಿ ಜಗಾಚ್ಯಾ ಆಕ್ರಿ ಪತರ್ಬಿ ತುಮಿ ಮಾಕಾ ಸಾಕ್ಷಿ ಹೊವ್ನ್ ರ್‍ಹಾತ್ಯಾಶಿ. 9 ಜೆಜುನ್ ಹೆ ಸಗ್ಳೆ ಸಾಂಗುನ್ ಹೊಲ್ಲ್ಯಾ ತನ್ನಾ ತೆನಿ ಬಗುನ್ಗೆತ್ ರ್‍ಹಾತಾನಾಚ್ ತೆಕಾ ವೈರ್ ಉಕ್ಲುನ್ ನ್ಹೆವ್ನ್ ಹೊಲೆ ಅನಿ ತೆಂಚ್ಯಾ ಡೊಳ್ಯಾಂಚ್ಯಾ ಇದ್ರಾಕ್ನಾ ತೆಕಾ ಮೊಡಾನ್ ನಿಪ್ವುಲ್ಯಾನ್.
10 ಅಶೆ ಚಡುನ್ಗೆತ್ ಜಾತಾನಾ ಅನಿ ತೆನಿ ಮಳ್ಬಾಕುಚ್ ನದರ್ ಲಾವ್ನ್ ರ್‍ಹಾತಾನಾ ಪಾಂಡ್ರೆ ಕಪ್ಡೆ ನೆಸಲ್ಲೆ ದೊಗೆ ಜನಾ ಎಗ್ದಮ್ ತೆಂಚ್ಯಾಕ್ಡೆ ಯೆವ್ನ್ ಇಬೆ ರ್‍ಹಾಲೆ. 11 ಅನಿ ತೆನಿ ಮನುಕ್ ಲಾಗ್ಲೆ, “ಗಾಲಿಲಿಯಾಚ್ಯಾ ಮಾನ್ಸಾನು, ತುಮಿ ಅಶೆ ಮಳ್ಬಾಕ್ ನದರ್ ಲಾವ್ನ್ ಘೆವ್ನ್ ಕಶ್ಯಾಕ್ ಇಬೆ ರ್‍ಹಾಲ್ಯಾಶಿ? ಹ್ಯೊ ತುಮ್ಚ್ಯಾ ಮದ್ಲೊ ವೈರ್ ಉಕ್ಲುನ್ ಘೆವ್ನ್ ಹೊಲ್ಲೊ ಜೆಜು, ಕಸೊ ತುಮಿ ತೆಕಾ ಸರ್ಗಾರ್ ಚಡುನ್ ಜಾತಾನಾ ಬಗುಕ್ ಲಾಗ್ಲ್ಯಾಸಿ ತೆಸೊಚ್ ಅನಿ ಪರ್ತುನ್ ತೊ ಯೆತಾ”.
ಜುದಾಸಾಚ್ಯಾ ಜಾಗ್ಯಾರ್ ಮಾಥ್ಥಿಯಾಸಾಕ್ ಎಚುನ್ ಕಾಡ್ತಾತ್
ಮಾತೆವ್ 27:3-10
12 ಮಾನಾ ತೆನಿ ಒಲಿವೆತ್ ಮನುನ್ ನಾಂವ್ ಹೊತ್ತ್ಯಾ ಮಡ್ಡಿ ವೈನಾ ಜೆರುಜಲೆಮಾಕ್ ಫಾಟಿ ಯೆಲ್ಯಾನಿ ಜೆರುಜಲೆಮಾತ್ನಾ ಒಲಿವೆತ್ ಲೈ ಧುರ್ ನಾ, ಲೈ ಲೈ ಮಟ್ಲ್ಯಾರ್ ಅರ್‍ದೊ ಮೈಲ್ ಧುರ್ ಅಸಿಲ್. 13 ಶಾರಾತ್ ಯೆವ್ನ್ ಪಾವಲ್ಲ್ಯಾ ತನ್ನಾ ತೆನಿ ರ್‍ಹಾಯ್ತ್ ತ್ಯಾ ಮಾಳ್ಗಿಚ್ಯಾ ಖೊಲಿತ್ ತೆನಿ ಗೆಲ್ಯಾನಿ: ಪೆದ್ರು ಅನಿ ಜುವಾಂವ್ ಜಾಕೊಬ್ ಅನಿ ಆಂದ್ರೆ, ಫಿಲಿಪ್ ಅನಿ ಥೊಮಸ್ , ಬಾರ್‍ತೊಲೊಮೆವ್ ಅನಿ ಮಾತೆವ್, ಅಲ್ಫೆವಾಚೊ ಲೆಕ್ ಜಾಕೊಬ್ ಅನಿ ಹೊರಾಟ್ ಕರ್‍ತಲೊ ಸಿಮಾವ್ ಅನಿ ಜಾಕೊಬಾಚೊ ಲೆಕ್ ಜುದ್ ಯೆವ್ಡೆ ಜನಾ ಖೊಲಿತ್ ಹೊತ್ತೆ. 14 ಅನಿ ಜೆಜುಚೆ ಬಾಯ್ ಮರಿ ಮಿಳುನ್ ಅನಿ ಉಲ್ಲಿ ಬಾಯ್ಕಾಮಾನಸ್ಸಾ ಅನಿ ಜೆಜುಚಿ ಭಾವಾಬಿ ತೆಂಚ್ಯಾ ವಾಂಗ್ಡಾ ಹೊತ್ತಿ. ಅಶೆ ತೆನಿ ಎಕ್ ಮನಾನ್ ಗೊಳಾ ಹೊವ್ನ್ ಮಾಗ್ನಿ ಕರಿತ್ ಹೊತ್ತೆ.
15 ತ್ಯಾಚ್ ದಿಸಾತ್ನಿ ಸುಮಾರ್ ಎಕ್ಸೆವಿಸ್ ಜನಾ ವಿಶ್ವಾಸಾತ್ ಹೊತ್ತಿ ಲೊಕಾ ಜಮಲ್ಲ್ಯಾ ಎಳಾರ್ ಪೆದ್ರು ತೆಂಚ್ಯಾ ಮದ್ದಿ ಇಬೆ ರ್‍ಹಾವ್ನ್ ಅಶೆ ಮನುಕ್ ಲಾಗ್ಲೊ,
16 ಭಾವಾನು ಅನಿ ಭೆನಿಯಾನು ದಾವಿದಾಚ್ಯಾ ತೊಂಡಾತ್ನಾ ಪವಿತ್ರ್ ಪುಸ್ತಕಾತ್ ಸಾಂಗಲ್ಲೆ ಜೆಜುಕ್ ಘಾತ್ ಕರುನ್ ಧರುನ್ ದಿತಲ್ಯಾ ಜುದಾಸಾಚ್ಯಾ ವಿಶಯಾತ್ ಲಿವಲ್ಲೆ ಖರೆ ಹಾಯ್. 17 ತೊ ಅಮ್ಚ್ಯಾಚ್ ತಾಂಡ್ಯಾತ್ಲೊ ಅನಿ ಅಮ್ಚ್ಯಾ ಸೆವೆಚ್ಯಾ ಕಾಮಾತ್ ತೊ ಬಿ ಎಚುನ್ ಕಾಡಲ್ಲೊ ಹೊತ್ತೊ.
18 ಹ್ಯಾ ಮಾನ್ಸಾನ್ ಅಪ್ನಾಚ್ಯಾ ಖೊಟ್ಯಾ ಕಾಮಾನ್ ಕಮ್ವಲ್ಲ್ಯಾ ಪೈಸ್ಯಾನ್ ಎಕ್ ಸೆತ್ ಇಕಾತ್ ಘೆಟ್ಲ್ಯಾನ್, ತ್ಯಾತುರ್ ತೊಂಡಾನಿ ಪಡುನ್ ತೆಚೆ ಪೊಟ್ ಫುಟ್ಲೆ ಅನಿ ತೆಚಿ ಸಗ್ಳಿ ಅಂತ್ಡಾ ಭಾಯ್ರ್ ಪಡ್ಲಿ. 19 ಜೆರುಜಲೆಮಾತ್ ಜಿವನ್ ಕರ್‍ತಲ್ಯಾ ಸಗ್ಳ್ಯಾಕ್ನಿ ಹಿ ಖಬರ್ ಕಳ್ಳಿ, ಅಶೆ ತ್ಯಾ ಸೆತಾಕ್ ತೆಂಚ್ಯಾ ಬಾಶೆತ್ ಅಕೆಲ್ತಾಮಾ ಮಟ್ಲ್ಯಾರ್ ರಗ್ತಾಚೆ ಸೆತ್ ಮನುನ್ ನಾಂವ್ ಪಡ್ಲೆ.
20 ಕಿರ್ತನಾಂಚ್ಯಾ ಪುಸ್ತಕಾತ್ ಅಶೆ ಲಿವಲ್ಲೆ ಹಾಯ್:
ತೆಚೆ ಘರ್ ಹಾಳ್ ಪಡುಂದಿತ್,
ಕೊನ್‍ಬಿ ತ್ಯಾತುರ್ ವಸ್ತಿ ಕರುನಸುಂದಿತ್.
ಅನಿ ಹೆ ಸೊಡುನ್ ಅಶೆ ಬಿ ಲಿವಲ್ಲೆ ಹಾಯ್:
ತೆಚೊ ಹುದ್ದೊ ಅನಿ ಎಕ್ಲೊ ಘೆಂವ್ದಿತ್.
21 ಅಶೆ ರ್‍ಹಾತಾನಾ, ಧನಿ ಜೆಜು ಅಮ್ಚ್ಯಾ ಮದ್ದಿ ವಸ್ತಿ ಕರಿ ತ್ಯಾ ಎಳಾರ್ ಅಮ್ಚ್ಯಾ ವಾಂಗ್ಡಾ ಹೊತ್ತ್ಯಾ ಎಕ್ ಮಾನ್ಸಾಕ್ ಎಚುನ್ ಕಾಡ್ತಲೆ ಗರ್ಜೆಚೆ. 22 ಜುವಾಂವ್ ಬಾಲ್ತಿಮ್ ದಿಲ್ಲ್ಯಾ ಎಳಾಕ್ನಾ ಶುರು ಕರುನ್ ಜೆಜುಕ್ ಉಕ್ಲುನ್ ಘೆವ್ನ್ ಹೊಲ್ಲೆ ತ್ಯಾ ಎಳಾ ಪತರ್ ಹೆಂಚ್ಯಾತ್ಲೊ ಎಕ್ಲೊ ಅಮ್ಚ್ಯಾ ವಾಂಗ್ಡಾ ತೆಚ್ಯಾ ಅನಿ ಪರ್ತುನ್ ಝಿತ್ತೊ ಹೊವ್ನ್ ಉಟಲ್ಯಾಚಿ ಸಾಕ್ಷಿ ಹೊವ್ಕ್ ಪಾಜೆ.
23 ತೆನಿ ದೊಗ್ಯಾಂಚಿ ನಾವಾ ಎಚುನ್ ಕಾಡ್ಲ್ಯಾನಿ: ಬಾರ್ಸಾಬ್ಬಾಸ್ ಮನ್ತಲೊ ಜುಜೆ ತೆಕಾ ಜುಸ್ತ್ ಮನುನ್ಬಿ ಬಲ್ವಿತ್ ಅನಿ ಮಾಥ್ಥಿಯಾಸ್. 24 ಮಾನಾ ತೆನಿ ಅಶೆ ಮಾಗ್ನೆ ಕರ್‍ಲ್ಯಾನಿ: “ಧನಿಯಾ ಸಗ್ಳ್ಯಾಂಚಿ ಭುತ್ತುರ್‍ಲಿ ಮಾನಾ ತುಕಾ ಗೊತ್ತ್ ಹಾತ್. ದೊಗ್ಯಾಂಚ್ಯಾ ಭುತ್ತುರ್‍ಲ್ಯಾ ಕೊನಾಕ್ ತಿಯಾ ಎಚುನ್ ಕಾಡ್ಲೆ ದಾಕ್ವು, 25 ಅಶೆ ಹೊವ್ನ್ ತೆನಿ ಸೆವಕಾಚೊ ಅನಿ ಅಪೊಸ್ತಲಾಚೊ ಜಾಗೊ ಘೆಂವ್ದಿತ್, ಜುದಾಸ್ ಹೊ ಜಾಗೊ ಸೊಡುನ್ ಗೆಲಾ.” 26 ಮಾನಾ ತೆಂಚ್ಯಾ ದೊಗ್ಯಾಂಚ್ಯಾ ಮದ್ದಿ ಚಿಟಿಯಾ ಘಾಟ್ಲ್ಯಾನಿ ಅನಿ ಮಾಥ್ಥಿಯಾಸಾಚೆ ನಾವ್ ವೈರ್ ಪಡ್ಲೆ ಅಶೆ ತೆಕಾ ಅಕ್ರಾ ಅಪೊಸ್ತಲಾಂಚ್ಯಾ ತಾಂಡ್ಯಾತ್ ಭುತ್ತುರ್ ಘೆವ್ನ್ ಹೊಲೆ.