8
Saulonen tiromajahi
Saulo rihbi cahen jaa mahuati queeni. Jaatianbi ta Jerusalen janinxon noquen huetsabo tiromajamenocannishqui hihti tiromajaquin. Tiromajahahbo jatihibi jabisi. Judea maibo janin, Samaria maibo janin rihbi jabiscani. Criston raantibo res jabayamahi. Papahon shinanaibaan ta hihti huinixon Esteban tsahonnishqui. Hoa Saulonen ta noquen huetsabo potojaquetannishqui. Jaton xoboboho hihquicahinxon cahen jato bihquin. Bebobo, haibobo rihbi coshin bi res boxon sipo xoboho jato tsahonquin.
Samaria janin Felipe cahi
Jabisipibaan sca Papan joi yohibonaquin jaabo jano cahiton. Samaria jema janin caxon ta Felipenin jato Cristo joi yohibonanishqui. Jan yohihi nincaxon cahen jan hahan honantibojahi jisxon huesti shinanyaxon nincacoincanquin hahqui tsamajaquetaibaan. Jaan yohihah ta hicha tiroma yoshinyahpabo janinhax tiroma yoshinbo coshin sai saihihquish piconishqui. Yora honanyamajaquetaibo betan chantobo hihti caibo rihbi rohacahini. Jaa copi ta jaa jema janinhahbo hihti jenimanishqui.
Felipe nocorihyamahiya cahen jaa jema janin huesti joni janish, Simon janeya. Jahuen yobepan hahxon cahen Samaria mai mehabo rahtehax, Hea tah hen coshi joni qui hihcachihi. 10 Jaa yobe yohuanaiya ta jatihixonbi nincacanpahonishqui. Jaton jonibaan, jaton patorobaan, jatihibichin nincaquin. Nea joni ta Diosen coshi qui, jahuen hihti coshi hahcaibo, hahcanquin.
11 Jahuen yobepan basi jan jato rahte rahtepahoni copi jaan yohihah nincacanquin. 12 Jaabi Papan jato jihuemayaxihqui joi siri Felipenin yohihah nincacoincanquin. Jesucristo joi siri yohihah nincacoinaiton Felipenin jato nashimaquin, haibobo, bebobo rihbi. 13 Simoman rihbi sca nincaquin. Felipenin nashimaha Felipe manati sca hahbetanbi nichi. Hahan honantibo Felipenin hahcai, jan Papan coshiyaxon tsoan jascajani que ma bi hihti coshin hahcai jisish Simon rahte rahtescai.
14 Samaria mai mehabaan Papan joi bihcoinai honanscaxon cahen Jerusalen janinxon Criston raantibaan Pedro betan Juan jato qui raanquin. 15 Raanahbo cahax nocoxon sca Dios Yoshin bichibo hihxon jato yocaxonquin. 16 Jesusen jane huestichin Felipenin jato nashimahi quen ta Dios Yoshin jato qui botopaquerihyamanishqui. Jaa copi cahen jato yocaxoncanquin. 17 Yocaxonxon mehehah Dios Yoshin bihresscacanquin.
18 Criston raantibaan mehehah Dios Yoshin bichibo jisxon Simon jato coriqui hinancatsihscai.
19 —Hea rihbi jascajati hahtipahmanahue, hean mehehahbaan sca Dios Yoshin bihnon —jato jaquin.
20 Pedronen sca:
—¿Papan hinanresai jahuen yoshin min coriquinin maroti shinanain? Miin coriquiyabi mia queyoyaxihnon. 21 Min tah min jahuabi bihtimahi. Jahuabi tah min bihyamayaxihqui. Papan jisí ta miin jointi tiromah qui. 22 Min tiromajaquin shinanai pontescahue. Hihbo yocahue, min tiromajati shinanai jan sohuanon. 23 Jointi mocapaiya mia notsi notsihi jihuetai tah hen jisi, hohchapan hiná tah hen mia jisi —hahquin Pedronen.
24 —Maton caya hea yocaxonnahue man hea yohihi quesca jayamanon —hahquin Simoman.
25 Jaatian sca jaabaan jisobo yohixon noquen Hihbaan joi siri rihbi yohihax Jerusalen janin cahi caribihi. Samaritanobaan jemabo janin joi siri yohibonahi bocani.
Etiopía joni betan Felipe behchinani
26 Noquen Hihbaan yonotinin sca ta Felipe yohinishqui:
—Caresscahue. Jerusalen janinhax Gaza janin cahi bahin picoti catanhue chiponqui —hahquin. Jaa bahin cahen tsoabi jihueyamahan. 27 Caresscaax jano sca cahi. Picoti cahi jisí bi Jerusalen janin Papahon shinantanipish Etiopía joni jaa bahin jahui. Jaa cahen hapo. Etiopíabaan quiquin haibo hapon coriqui coirannicah. Jahuen hapon jane cahen Candace. 28 Isaíasnen huishani joi jisanan jahuen taramehtinin tsahotax cabachonen ninihah taramehquirani jahui. 29 Dios Yoshiman sca Felipe yohiquin:
—Behchitanhue. Jahuen taramehti janin nanetanhue —hahquin. 30 Bishquihihcanahi caxon sca Isaías janeya Papan joi yohinicaton huishani joi jisish jaa yohuanhonahi nincaquin. Nincaxon yocascaquin:
—¿Min jisi joi min honanain? —hahquin.
31 —¿Jenquetsahaxon hen honantihin, huetsan hea yanapanyamahiya? Hea patax tsahoti nanehue —hahquin. 32 Jan jisbenahi huishani joi ta nea qui:
Carnero rehtenoxon hiohah bi neteresai quescarihbihi ta jahua hihyamahiqui. Jahuen rani rahmaxcorohah bi carnero baque sai saihihyamabiresai quescarihbihi ta yohuanyamahihqui.
33 Jaa rabinmaxon ta pontejayamaquin casticancaniqui.
Rehteres ta Tsoa jahuen xohtabo quin hih tsoabi jayamascanon
hihqui jaa quirica.
34 Jaatian:
—¿Yohinica jascarai tsoa yohihiquin? ¿Jaabi nan? ¿Huetsa joni nan? Hea yohirohahue —Felipe yocaquin. 35 Jaatian sca jaa quiricaya yohuanxon Jesusen joi siri Felipenin yohiquin. 36 Bahin taramehcanahi cahax jano hian jaiton sca nococani.
—Jise. Jano ta jene jaiqui. ¿Jenquetsahpahi min hea nashimatimahin, Jesusen joni sca hea hihnon? —Felipe yocaquin.
37 —Miin jointiboyaxonbi nincacoinaiton tah hen mia nashimatihi —hahscaquin Felipenin.
—Jesucristo ta Papa Diosen baque qui. Hen tah hen shinancoinai —hahquin.
38 Jahuen taramehti janobi racarenennon cahen cabacho rebinica yohiscaquin. Jaton taramehti racarenenaiya cahen bototax rabebi jene nenichi, Felipe betan jaa Etiopía hapo. Janoxon sca cahen Felipenin jaa hihquimatanquin nashimaquin. 39 Jaabo mapescaiya bi Dios Yoshiman Felipe bihinihniquin. Felipe jisyamascaax bi jaa huesti sca jenimahanan sca caresscaribihi. 40 Azoto jema janin sca sanarenenxon ta jano jai jemabo janin sca joi siri Felipenin yohibonanishqui, Cesarea jema janin noconoxon caman.