NIWAKATE HEBREUTEDI
Aɡ̶ica ane yowooɡ̶odi ane lidie naɡ̶adi niwakate hebreutedi, idoka oyowooɡ̶odi me judeu niɡ̶ica ane idí. Oditibige me Paulo, oɡ̶oa domige Apolo ane idí. Moidí odidikotibige judeutedi anonakato Ǥoniotagodi me doɡ̶oika monakato Ǥoniotagodi Jesus, oditaɡ̶a opitacelogo lakataɡ̶a laamipi. Yeloɡ̶oditiogi hebreutedi Jesus me niɡ̶ijaaɡ̶ijoa Niɡ̶icoa ane niiɡ̶e Aneotedoɡ̶oji me Ǥonewikatitoɡ̶odi, codaa yeloɡ̶odi niɡ̶ina oko me daɡ̶adiaa yakadi me iɡ̶enaɡ̶atibigiwaji lodoe Aneotedoɡ̶oji daɡ̶a leeɡ̶odi moyotete liiɡ̶enatakaneɡ̶eco Aneotedoɡ̶oji ane iditedini Moisés, codaa niɡ̶ina modioteci lakataɡ̶a judeutedi ane daɡ̶adiaaɡ̶ica ane jaoɡ̶ate. Moidí oyalaɡ̶ata niɡ̶ijo jotigide lakatigi judeutedi sacerdotitedi maleeɡ̶onigodi eijedi anoibootalo Aneotedoɡ̶oji mowotibige Aneotedoɡ̶oji me daɡ̶alee iloikatidi oko leeɡ̶odi libeyaceɡ̶eco. Eledi yalaɡ̶ata Jesus me ɡ̶onisacerdoti ɡ̶oneɡ̶egi, codaa me nadooɡ̶odi lawodi meotedibige Aneotedoɡ̶oji me dibatacedoɡ̶ogi. Lawodi Jesus ɡ̶odiwilegitema inoatawece ane ɡ̶obeyaceɡ̶eco. Ikee niɡ̶ida gela anejinaɡ̶a me idinilakidenaɡ̶atege Aneotedoɡ̶oji me daɡ̶axa mele, aliciagi niɡ̶ijo oxiiɡ̶odi domaɡ̶a ɡ̶onimaweneɡ̶egi me idinilakidenaɡ̶atege Aneotedoɡ̶oji. Yalaɡ̶atiogi niɡ̶ijo laamipi judeutedi Aneotedoɡ̶oji ane yakadi me iɡ̶enaɡ̶atibigiwaji leeɡ̶odi monakato, idaaɡ̶ida me nawikodeeɡ̶a.
Niɡ̶idiaaɡ̶idi eo loniciwaɡ̶a niɡ̶ina anonakato Ǥoniotagodi moyowo anodaaɡ̶eeteda Jesus me dinatiteta ijoatawece lawikodico, odaa leeditibige midaɡ̶aɡ̶aee modinatitalo lawikodico leeɡ̶odi modiotece Cristo. Codaa maɡ̶aɡ̶a onalaɡ̶atibige niɡ̶ica noɡ̶eedi anicota me yajigotediogi Aneotedoɡ̶oji, niɡ̶ica ane daɡ̶a daa. Noɡ̶owidijedi lotaɡ̶a jeɡ̶eote ladeenaɡ̶aneɡ̶eco.
1
Aneotedoɡ̶oji ibake Lionigi me dinikeetedoɡ̶owa
1 Niɡ̶ijo jotigide Aneotedoɡ̶oji eliodi me notaɡ̶aneɡ̶etedi ɡ̶odoiigi, codaa owidi anigotediogi me notaɡ̶aneɡ̶etediniwace jotigide ɡ̶odaamipi. Imonyatediogi niɡ̶ijo anoyeloɡ̶oditedibece Aneotedoɡ̶oji lowooko moditece ane yemaa. 2 Pida natigide, niɡ̶inoa owidijedi nokododi, Aneotedoɡ̶oji ibake Lionigi me yeloɡ̶odi niɡ̶ica ane yemaa. Aneotedoɡ̶oji ibake Lionigi meote inoatawece aninoa ditibigimedi, codaa aninoa digoina iiɡ̶o, odaa ja iolatedice Lionigi me yajigoteta inoatawece mepoka nepiliditeda. 3 Lionigi datale digo mijoataɡ̶a Aneotedoɡ̶oji me datale, codaa liciagi Aneotedoɡ̶oji. Ibake lotaɡ̶a loniciweɡ̶enaɡ̶a me doweditedeloco codaa me ika midioka limedi minoa inoatawece niɡ̶inoa ane jinataɡ̶a. Niɡ̶idiaaɡ̶idi neɡ̶eote nimaweneɡ̶egi me napitaɡ̶adi inoatawece ɡ̶obeyaceɡ̶eco, odaa ja nicotedini digoida ditibigimedi nimedi ɡ̶oneɡ̶egi liwai libaaɡ̶adi Aneotedoɡ̶oji ane iiɡ̶e inoatawece.
4 Odaa jeɡ̶eote me daɡ̶axa me ɡ̶oneɡ̶egi naɡ̶axatedeloco aanjotedi, digo anee Liboonaɡ̶adi ane yajigote Aneotedoɡ̶oji me daɡ̶axa me ɡ̶oneɡ̶egi, aɡ̶ica liciagi. Aneotedoɡ̶oji yajigote Liboonaɡ̶adi me “Lionigi”.
Lotaɡ̶anaɡ̶axi Aneotedoɡ̶oji ikee Lionigi Aneotedoɡ̶oji me daɡ̶axa me ɡ̶oneɡ̶egi caticedi aanjotedi
5 Lionigi daɡ̶axa me ɡ̶oneɡ̶egi, igaataɡ̶a Aneotedoɡ̶oji aɡ̶ica otiɡ̶idatece daɡ̶a eeteta okanicodaaɡ̶icata aanjo niɡ̶ijoa lotaɡ̶a aneeteta Lionigi, niɡ̶ijo meeteta,
“Akamokakaamita makaami Ionigi,
amina noko ja jaote me Ee Ǥadiodi.”
Eledi meeteta,
“Jeɡ̶ee Ǥadiodi,
codaa akaami Ionigi.”
6 Niɡ̶ina Aneotedoɡ̶oji me nadeegite Lionigi ane daɡ̶axa me ɡ̶oneɡ̶egi niɡ̶ina iiɡ̶o, eledi mee,
“Akaamitawecetiwaji anakaami niaanjotedi Aneotedoɡ̶oji
oɡ̶eetetalo Ionigi!”
7 Niɡ̶ijo Aneotedoɡ̶oji me yalaɡ̶ate aanjotedi, mee,
“Jaote iniaanjotedi micataɡ̶a daɡ̶a niwocotadi,
codaa niɡ̶idiwa iniaanjotedi ane iotaka dinoe
micataɡ̶a daɡ̶a ɡ̶alewaɡ̶a.”
8 Pida niɡ̶ina Aneotedoɡ̶oji naɡ̶aɡ̶a yalaɡ̶ate Lionigi, mee,
“Inoenoɡ̶odi,
idioka limedi makaami ane diiɡ̶enataka.
Niɡ̶ina me iiɡ̶eni niɡ̶ina oko,
awii ɡ̶animaweneɡ̶egi ane iɡ̶enaɡ̶a me iiɡ̶enatakani.
9 Emaani niɡ̶ina ane iɡ̶enaɡ̶a,
codaa ɡ̶adeleɡ̶edi niɡ̶ina ane beyagi.
Joaniɡ̶idaa leeɡ̶odi Ee,
Ǥanoenoɡ̶odi Aneotedoɡ̶oji,
me ɡ̶adiolaatice,
codaa me ɡ̶adiweniɡ̶ideni caticedi niɡ̶ijoa ɡ̶adokaaɡ̶etedipi,
codaa jiɡ̶idaa me jao meliodi me aniniitibeci.”
10 Aneotedoɡ̶oji eledi yalaɡ̶ate Lionigi, niɡ̶ijo neɡ̶ee,
“Ǥoniotagodi,
niɡ̶ijo jotigide aniɡ̶icatibige daɡ̶a jinataɡ̶a inoatawece aninoa,
jaɡ̶akamaɡ̶akaami ane oeni iiɡ̶o,
codaa abakeni ɡ̶abaaɡ̶atedi me oeni ditibigimedi.
11 Odaa ditibigimedi inaa iiɡ̶o icota me ma,
pida akaami biɡ̶idioka limedi makaami.
Ditibigimedi inaa iiɡ̶o icota me laxokodi
micataɡ̶a nowoodaɡ̶agi moxiiɡ̶odi.
12 Ateciɡ̶itiwage macataɡ̶a wetaɡ̶ajo,
codaa me iikoeɡ̶eni
micataɡ̶a niɡ̶ina me jiikoenaɡ̶a nowoodaɡ̶agi oxiiɡ̶odi.
Pida akaami biɡ̶idioka limedi makaami,
adiniigi aneni,
codaa aɡ̶akaami oxiiɡ̶odi.”
13 Aneotedoɡ̶oji aɡ̶ica deɡ̶eeteta anigetiɡ̶ijo aanjo ane ligegiteta Lionigi, niɡ̶ijo mee,
“Anicooti digoina iwai ibaaɡ̶adi
nigepaaɡ̶icota me jiiɡ̶eke ɡ̶aneloɡ̶ododipi.”
14 Inoatawece aanjotedi niwicidi anodibatema Aneotedoɡ̶oji, ane iiɡ̶e moyaxawa niɡ̶ina oko aneote me newiɡ̶atace.