Kọ̃kọ̃bị́ ĩ ní sĩí sẽé ꞌbá
Ẽbérẽ
vé rĩ pi ní rĩ
Tã búkũ rĩ vé rĩ ã ũlũngárá
Búkũ Ẽbérẽ* Ẽbérẽ: Rụ́ Ẽbérẽ ꞌdĩri ĩri rụ́ ãzi Yãhụ́dị̃ rĩ pi vé rĩ, ãꞌdiãtãsĩyã kộpi ri átá Ẽbérẽ tị sĩ. vé rĩ, ꞌbá sĩípi rĩ nị̃kí kuyé, ꞌbo nị̃kí ámá uletere kínĩ, ꞌbá búkũ rĩ sĩípi rĩ, ĩri drị̃koma ãzi Kũrĩsĩtĩyánĩ rĩ pi drị̃gé, ĩri ũkpõ be ꞌbá kãnísã vé rĩ pi ãsámvú gé, lókí Páũlũ ní kọ̃kọ̃bị́ rĩ pi sĩzú sẽzú ꞌbá kãnísã vé rĩ pi ní rĩ gé. Sĩkí kọ̃kọ̃bị́ ꞌdĩri sẽé Yãhụ́dị̃ ụrụkọ ẹ́sị́ újáꞌbá Kũrĩsĩtĩyánĩ rú rĩ pi ní. ꞌBá kọ̃kọ̃bị́ sĩípi rĩ lẽ kộpi ã tukí pá tị́tị́ ĩvé ẹ̃ꞌyị̃ngárá agá, ãꞌdiãtãsĩyã Yãhụ́dị̃ ụrụkọ ụ̃ꞌbị̃kí kõdô kộpi, kộpi ã kukí ĩvé ẹ̃ꞌyị̃ngárá ĩ ní Yẹ́sụ̃ rĩ ẹ̃ꞌyị̃zú rĩ rá.
Kọ̃kọ̃bị́ ꞌdĩri lũ ãmbũgũ Yẹ́sụ̃ vé rĩ Kũrĩsĩtĩyánĩ rĩ pi ní céré. Lũ kĩnĩ, ĩri Mvá Múngú vé ni, ĩrivé ũkpõ ndẽ mãlãyíkã Yãhụ́dị̃ rĩ pi ní ẹ̃ꞌyị̃ị́ rĩ rá. Ĩrivé ãmbũgũ ndẽ nẹ́bị̃ Búkũ Múngú vé Ũndĩ Ụ̃kụ rĩ rụzú rĩ agá rĩ pi vé rĩ rá, ndẽ Mósẽ tãị́mbị́ sẽépi Yãhụ́dị̃ rĩ pi ní rĩ vé rĩ rá. ꞌBá tã sĩípi rĩ lũ kpá kĩnĩ, Yẹ́sụ̃ ndẽ atala Yãhụ́dị̃ rĩ pi vé rĩ pi ãmbũgũ sĩ rá, ãꞌdiãtãsĩyã ꞌo ũnjĩkãnyã kuyé, adi ívé rụ́ꞌbá sẽé drãá rọ̃bọ̃ŋọ̃ rú, ꞌbá céré pi vé ũnjĩkãnyã ã tã sĩ sâ rĩ pi agásĩ céré.
ꞌBá kọ̃kọ̃bị́ sĩípi rĩ lũ Yãhụ́dị̃ rĩ pi vé ẹ́ꞌbị́ ã tã, kộpivé úꞌdógúꞌdógú rĩ pi Búkũ Múngú vé Ũndĩ Ụ̃kụ rĩ rụzú rĩ agá. Kộpi ní ẹ́sị́ ꞌbãá Múngú drị̃gé rĩ sĩ, sẽ Múngú adri kộpi sĩ ãyĩkõ sĩ. Lũ Kũrĩsĩtĩyánĩ rĩ pi ní kĩnĩ, lẽ kộpi ã rikí ẹ́sị́ ꞌbãá mụzú Múngú drị̃gé, lẽ kộpi ã ãvĩkí tã Yẹ́sụ̃ ní ꞌoó ãzini ímbá ꞌdĩri sĩ ku.
1
Yẹ́sụ̃ ri ãmbúgú mãlãyíkã rĩ pi drị̃gé céré
1 Ọ́tụ́ ị́nọ́gọ́sị́ nẹ́bị̃ rĩ pi rikí tã Múngú ní iꞌdaá ĩ ní urobí agá, ãzini ĩri ní iꞌdaá ĩ ní ị́ndrị́lị́kị́ agá rĩ ũlũú ꞌbá ẹ́ꞌbị́pị́ị ní. 2 ꞌBo ụ̃dụ̃ ni gé, ụ́ꞌdụ́ nõꞌbée agá, Múngú ĩpẽ ꞌî Mvọ́pị ri ímụ́ ụ́ꞌdụ́kọ́ ívé rĩ ũlũú ꞌbá ní nĩ. Múngú áyú ꞌî Mvọ́pị ri ꞌbụ̃ pi gbizú vũ be. Ụ́ꞌdụ́ ãlu Múngú ri ímụ́ ngá rĩ pi ãrẽvú sẽ céré drị́ ni gé. 3 Mvá Múngú vé ꞌdĩri, ĩ ímụ́ ĩri íngú, sụ̃ ĩ ní Ẹ́tẹ́pị Múngú ri íngú rĩ tị́nị. Mvá rĩ vé dị̃ngárá, ĩri dị̃ sụ̃ Ẹ́tẹ́pị vé rĩ tị́nị. Ĩri átá ũkpõ be, ĩri ngá rĩ pi sẽ ri ẹ̃zị́ nga mụzú múké nĩ. Mvá rĩ kã ꞌbávé ũnjĩkãnyã ũjĩí gí, nga mụụ́ úrí Múngú ẽ drị́ ẹ̃ndẹ́pị gélésĩla. 4 Múngú ꞌbã ívé Mvá adrií mãlãyíkã rĩ pi drị̃gé ꞌbá ãmbúgú rú. Rụ́ Múngú ní ꞌdaá ĩri ní rĩ, ndẽ rụ́ Múngú ní ꞌdaá mãlãyíkã rĩ pi ní rĩ rá.
5 Ãꞌdiãtãsĩyã Múngú ꞌyo nyo mãlãyíkã rĩ pi ní,
“Mi Mvá mávé ni,
ãndrũ sĩ ma adri mí Ẹ́tẹ́pị” 1:5 Sãwụ́mã 2:7 ꞌdíni rá?
Dõku ꞌyo,
“Ma adri ĩrivé Ẹ́tẹ́pị,
ĩri adri mâ Mvá” 1:5 2 Sãmũélẽ 7:14; 1 Kõrónĩkõl 17:13 ꞌdíni rá?
6 Múngú kã ívé Mvá tã be agaápi rá ꞌdĩri ĩpẽé ímụ́zú vũ drị̃gé nõó, ĩri ní ꞌyozú kĩnĩ,
lẽ ívé mãlãyíkã rĩ pi céré ẽ ị̃njị̃kí ĩri ị̃njị̃njị̃. 1:6 Dẽtõrõnómẽ 32:43† 1:6 Ị̃njị̃: Múngú kĩnĩ mãlãyíkã rĩ pi ẽ ị̃njị̃kí ívé Mvá Úpí ĩvé ni rú, sụ̃ kộpi ní ꞌi ị̃njị̃ị́ ĩvé Múngú rú rĩ tị́nị.
7 Múngú kãdõ rií átá ívé mãlãyíkã rĩ pi ã tã sĩ, ĩri ꞌyo ꞌdíni,
“Ma mãlãyíkã rĩ pi sẽ unga ũlí rú,
ma mávé ãtíꞌbá rĩ pi újá dị̃ ãcí rú.” 1:7 Sãwụ́mã 104:4
8 ꞌBo átá Mvọ́pị vé tã ꞌdíni kĩnĩ,
“Mi Múngú ꞌi, mi ímụ́ mãlũngã rĩ rụ tã be pịrị.
Mi mãlũngã rĩ rụ mụzú nyonyo.
9 Mí lẽ tã ꞌoó pịrị, mí gã tã ũnjí sĩ,
kúru ma mívé Múngú, má ĩpẽ mi ꞌbãá ãmbúgú mívé ũndĩ rĩ pi drị̃gé, mî adri rí ãyĩkõ sĩ.” 1:9 Sãwụ́mã 45:6-7
10 Múngú gõ kpá ꞌyoó Mvọ́pị ní kĩnĩ,
“Úpí, íꞌdóngárá gá ꞌdãá,
mí gbi ꞌbụ̃ pi vũ be nĩ.
11 ꞌBụ̃ pi vũ be, kộpi ímụ́ dẹ rá, ꞌbo mi ímụ́ adri mụzú ꞌdániꞌdáni.
Kộpi ímụ́ dẽ sụ̃ bõngó ní dẽé rĩ tị́nị.
12 Mi ímụ́ kộpi tra sụ̃ ĩ ní bõngó akoóko rụ̃kụ̃ rĩ traá rĩ tị́nị,
mi ímụ́ kộpi újá sụ̃ ĩ ní bõngó újá rĩ tị́nị.
ꞌBo mi áwí adri ídri rú
ãzini mi adri mụzú ꞌdániꞌdáni.” 1:12 Sãwụ́mã 102:25-27
13 Múngú ꞌyo ꞌî Mvọ́pị ní kĩnĩ,
“Mí úrí mâ drị́ ẹ̃ndẹ́pị gé, vũrã má ní mãlũngã rụzú rĩ gé
cĩmgbá á ꞌbã dõ mívé ariꞌba rĩ pi
mî pálé gá gí ká.” 1:13 Sãwụ́mã 110:1
ꞌBo ꞌyo mãlãyíkã ãzi ní ꞌdíni kuyé. 14 Mãlãyíkã rĩ pi índrí, ĩpẽkí kộpi ímụ́ ꞌbá ĩ ní lẽé paá rĩ pi ã tã mbaá, kộpi ẽ ị́sụ́kí rí ídri ꞌdániꞌdáni rĩ ãní bẽnĩ.
*^ Ẽbérẽ: Rụ́ Ẽbérẽ ꞌdĩri ĩri rụ́ ãzi Yãhụ́dị̃ rĩ pi vé rĩ, ãꞌdiãtãsĩyã kộpi ri átá Ẽbérẽ tị sĩ.
1:5 1:5 Sãwụ́mã 2:7
1:5 1:5 2 Sãmũélẽ 7:14; 1 Kõrónĩkõl 17:13
1:6 1:6 Dẽtõrõnómẽ 32:43
†1:6 1:6 Ị̃njị̃: Múngú kĩnĩ mãlãyíkã rĩ pi ẽ ị̃njị̃kí ívé Mvá Úpí ĩvé ni rú, sụ̃ kộpi ní ꞌi ị̃njị̃ị́ ĩvé Múngú rú rĩ tị́nị.
1:7 1:7 Sãwụ́mã 104:4
1:9 1:9 Sãwụ́mã 45:6-7
1:12 1:12 Sãwụ́mã 102:25-27
1:13 1:13 Sãwụ́mã 110:1