1 «Jiremaro nayiro wulnjagakki, kam duwon bǝri dimiyayero cinnayen ngayiwawo na gadeyen tacce ngayimadǝ, ti barwu ye, jawalkorjima ye. 2 Amma kam cinnayen ngayimadǝ, tima sǝni dimiyadǝyedǝ wo. 3 Cinna guredumadǝ tiro kajiyi, dimiyadǝ ye kowonju fanjai. Dimiya kaanjua cunjalan bowoje cuttuluwi. 4 Kaanju sammaa cuttuluwiya, fuwunjaro koje dimiyadǝ tia jagai, kowonju nojana nangaro. 5 Tǝmmaro kusotto jagaiwawo, tin kuruwunno ngǝrǝmjai, kowo kusottowaye nojanni nangaro,» yeno. 6 Isa tayiro misal adǝa wulyeyeno, amma maananjudǝa asujanni.

7 Koro Isa walde: «Jiremaro nayiro wulnjagakki, wuma cinna dimiyayedǝ wo. 8 Am burwosane isanadǝ samma barwuwa ye, jawalkorduwu ye, amma dimiyadǝ tayia fanjanni. 9 Wudǝ cinna. Kam wuyen ngayia, njǝkkawo cuwandi. Ngaye culuwi, sǝniram ye cuwandi. 10 Barwudǝ ndaldu so, njejo so, bannadu so gǝnia, awima gadero isiwawo. Amma wudǝ am ro har tayilan gapcǝna cawandoro kadikko.

11 «Wu sǝni ngǝlama. Sǝni ngǝlamadǝ dimiya nangaro ronju ci. 12 Kidamadǝ sǝni gǝni, dimiyadǝ ye kaanju gǝni. Buldu kǝnde cǝdi curuiya, dimiyadǝa kolje cǝgasi, daji buldudǝ ise tayia cǝdane tatarji. 13 Tidǝ kidama nangaro, dimiyadǝro lambonju bawo.

14 «Wu sǝni ngǝlama. Dimiyanidǝa nokkǝna, tayi ye wua nosana, 15 jiɍi Bawa wua nosǝna, wu ye tia nokkǝnadǝ gai. Dimiyadǝ nangaro roni yikki. 16 Koro dimiya gade bǝri adǝye gǝni takkǝna. Tayi yea dole kudǝkki, koro kowoni fanjai. Daji bǝri fal ye, sǝni fal yero waljai. 17 Bawadǝ wua sǝraana, roni yikkiya, waldǝkke mowokki nangaro. 18 Wunduma rakce roni ngojiwawo, amma rawonin tia yikki. Kǝnduwo nanin tia njoye mbeji, koro kǝnduwo nanin tia mowoye mbeji. Adǝma wada Bawaniyen fandǝkkǝnadǝ,» yeno.

19 Kǝla mana aniyen yaudiyadǝ caye baworo kǝwu yindiro yakkadara. 20 Ngǝwunjaye: «Kai! Ti karuwama, joɍi! Awiro tia kǝrǝnnuwi?» cani. 21 Am laaye: «Adǝ mana karuwamaye gǝni. Karuwama rakce kambuye sim kaji wa?» cani.

22 Binǝm Jerujalemnin Ngǝmǝri Barga Dǝptaye cadi duwon, 23 Isa balballa Fado Alayen tiro Ngurwo Nawi Mai Sulemanaye canilan dadaji. 24 Daji yaudiyadǝ tia dirijane kǝljane tiro: «Har sawiro andia curo duwuyen kolsami? Nima Almasiwudǝ woa, federo wulsagane!» yera. 25 Isaye tayiro: «Nayiro wulnjagakkǝna, amma wua kasansuwwi. Kǝndo cu Bawaniyen dikkidǝ wua shedasi. 26 Amma wua kasansuwwawo, nayi curo dimiyaniyen bawo nangaro. 27 Dimiyanidǝ kowoni fanjai. Tayia nokkǝna, wua sagai. 28 Tayiro ro sawisoye yikki, koro tǝmmaro sanuiwawo. Wunduma tayia mukkonin cǝmoyiwawo. 29 Bawani tayia wuro sinadǝ sammaa nankuran kojǝna. Wunduma rakce tayia mukko Bawadǝyen cǝmoyiwawo. 30 Wu-a Bawadǝ-a tilo,» yeno.

31 Daji yaudiyadǝ tia roro njejoro waldane dongur kauye tiro gǝptuwuro ngoyera. 32 Isaye tayiro: «Kǝndo ngǝla kada Bawaniye nayiro fǝlenjagakkǝna. Finja nangaro wuro dongur kauye gǝmsuwe sesuwi?» cǝne kiworo. 33 Yaudiyadǝye tiro: «Kǝla kǝndo ngǝlayen gǝni, kǝla Alaa gaskadunǝmben njejiye. Ni kam duwon kǝlanǝm Alaro ngonǝmidǝ!» 34 Isaye tayiro: «Kitawundon ngai ruwuwada, gǝna? “Wuye: Nayi alawa!”†10.34 Jaw 82.6 cǝnna. 35 Kitawu Alayedǝ rakce baworo tǝdiwawo. Ala am duwon tayiro mananju cinadǝro alawa cǝnnaa, 36 awiro wu duwon Ala kǝrese duniaro sunodǝnadǝro Alaa gaskakkǝna nuwi, wu Tada Alaye nǝkkǝnadǝro? 37 Kǝndo Bawaniyedǝa dikkiwawoa, bare wua kasansuwwi. 38 Amma tayia dikkia, kasansuwwawo yaye, kǝndodǝa kasaddowo, nonowo asunowo Bawa curonin kǝrga, wu ye curo Bawayen kǝrgakkoro.» 39 Koro waldane tia taro mayera, amma mukkonjan kiluwo.

40 Koro Isa walde ngawo bǝrǝm Jordaniyen na Nawi Yahaya kasala tuwaye cǝdǝnadǝro leje napkeno. 41 Daji am kada nanjuro isane: «Nawi Yahaya awo ajabba falma cǝdǝnni, amma awo Yahaya kǝla kam adǝyen wuljǝna samma jire!» yera. 42 Adǝgaima am kada nadǝn Isaa kasatkera.