1 «Bare talluwwiro awo ania wulnjagakkǝna. 2 Dandallan nayia njattuluwi. Ai, sa ise wundu yaye nayia roro njeyesiya, kida Alaye cǝdoro tǝmaji. 3 Ngai cadi, Bawadǝa nojanni bi wua nosanni nangaro. 4 Amma awo ania nayiro wulduwunidǝ, sanja cǝdiya, tayia wulnjagakkǝnaro tangoworo. Badiduramnin awo ania nayiro wulnjagakkǝni, wu-a nayi-a rokko dǝgaiye nangaro.

5 «Amma kǝrma na ti wua sunodǝnadǝyero waldǝkki, koro curondon wunduma wuro: “Ndararo lenǝmi?” cǝne suworǝnni. 6 Amma awo ania wulnjagakkǝna nangaro, karwundo ngaso kuttajǝna. 7 Adǝ yaye jire wulnjagakki, waldǝkkǝnama nayiro ngalwo. Waldǝkkiwawoa, Banama nandoro isiwawo. Amma waldǝkkia, tia nayiro juwanjagakki. 8 Isiya, duniadǝro kǝla biwu-a jire-a shara-ayen kǝndonja diwiro tawakciyi. 9 Kǝla biwuyen, wua kasansanni nangaro. 10 Kǝla jireyen, na Bawadǝyero waldǝkki, koro gadero suruwwawo nangaro. 11 Kǝla sharayen, maina dunia adǝyedǝro*16.11 maina dunia adǝye - Yiwulis. shara kamdǝgǝna nangaro.

12 «Koro yaye awo kada nayiro wulduwuye takkǝna, amma kǝrmadǝro ranguwe tayia ngonuwwawo. 13 Ruhu jireye isiya, nayia jawal jireye sammaro simonjagai. Ti ngumnjun gǝni manaji, awo fanjǝna runju manaji, koro awo fuwun wakkaji ye nayiro wulnjagai. 14 Wuro daraja si, dalilnjudǝ awo kakke ngoje nayiro isanonjagai nangaro. 15 Awo Bawaye samma kakke. Adǝma nangaro awo kakke ngoje nayiro isanonjagai yekko.

16 «Gana tussiya, gadero wua suruwwawo, koro gana tussiya, gademinno wua suruwi,» yeno. 17 Daji fuwurawanjuye laanja kattenjan: «Awi maana awo wulsagaiyedǝ wo? “Gana tussiya, gadero wua suruwwawo, koro gana tussiya, gademinno wua suruwi,” koro “Na Bawadǝyero waldǝkki nangaro,”» yera. 18 Daji tayiye: «Awi maana awo wulji adǝye wo? “Gana tussiya,” kǝla awiyen manajimaro noniyende!» yera. 19 Isa kǝla adǝyen tia koro caraanaro asuje tayiro: «Kǝla adǝyeman wa amandoa kokoruwi? “Gana tussiya, gadero wua suruwwawo, koro gana tussiya, gademinno wua suruwi,”» yeno. 20 «Jiremaro nayiro wulnjagakki, yiruwi ye, njǝmmuwi ye, amma duniadǝ kǝji fanji. Karwundo kuttaji, amma karwukuttando karwukǝjiro walji. 21 Kamu tada cambiya, jauro laiya cai, sanju cǝdǝna nangaro. Amma tadadǝa cambiya, laiya canadǝa takciwawo, karwukǝji tada tambǝnadǝye nangaro. 22 Nayi ye kǝrma karwundo kuttaji. Amma gademinno nayia njarukkiya, karwundo jauro kǝjiji, koro wunduma karwukǝjindo adǝa cuttuluwiwawo. 23 Yim adǝn awimaro wua suworuwwawo. Jiremaro nayiro wulnjagakki, awi yaye Bawadǝa cunilan koruwwadǝa nayiro njadi. 24 Koroma awima cunilan koruwwi. Korowo fanduwi, karwukǝjindo tai daje kǝjijoro!

25 «Awo ania misalnin wulnjagakkǝna. Sa ise nayiro misalnin wulnjagakkiwawo, amma federo kǝla Bawadǝyen wulnjagakki. 26 Yim adǝn cunilan koruwi, koro nayiro Bawadǝa njakkorǝkki nǝkkiwawo. 27 Bawa kǝlanju nayia njaraana, dalilnjudǝ wua sǝraawwa ye, wu Alayen kadikkoro kasadduwwa ye nangaro. 28 Bawadǝyen isǝkke duniaro kadikko, koro duniadǝa kollǝkke na Bawadǝyero waldǝkki,» yeno.

29 Daji fuwurawanjuye tiro: «Akko kǝrma misalnin gǝni, federo wullǝmi. 30 Kǝrma awisoa nonǝmma ye, koro kam niro koro njǝddoro mǝradunǝm bawo yero noniyena. Adǝmaro Alayen kadimbo kasaddiyena,» yera. 31 Isaye tayiro: «Kǝrma kasadduwwa wa? 32 Akko sa isi har isǝnama, sa duwon nayia tatarnjane wundundo yaye fannjuro leje wua runi kolsidǝ. Amma wudǝ runi gǝni, Bawadǝ rokkonin nangaro. 33 Awo ania nayiro wulnjagakkǝna, wulan nanlewa fandoworo. Dunialan bone yawi, amma karwundo gerowo! Kǝla duniayen kǝnnasar fandǝkkǝna,» yeno.