MATIYU
Kawuɍi kǝji Isa Almasiwuye
Matiyu ruwujǝnadǝ
Linjila Matiyuyedǝ
Kitawu Matiyu ruwujǝnadǝ, tima Linjila kǝntilomiyedǝ wo. Ti Matiyudǝ tiro Lewi ye cani sanianju akki mowo duwon Isaa ga badiyeno. Ti ye am mewun yindin Isa tayia kǝngayambanjuro galajǝnadǝye falnja nangaro, awo ajabba ajabba Isa cǝdǝnadǝa cure awo wuljǝna-a jamaro alamjǝgǝna-adǝa fangeno. Tussǝnni ngawon Ruhu Alaye tia cakke taldu bawoaro awo curuna-a fanjǝna-a tagǝnasso amanju yaudiyaro ruwuyeyeno. Lamar ani wakkajanadǝ ku saa dǝwu yindi gai yaye, Ala cakke Linjila adǝ gadejǝnnin har nandero kadio.
______________________________________________________________________
TAMBO-A WURADU-A ISAYE
1
Kaariya Isaye
(Luk 3.23-38)
1 Akko kitawu*1.1 kitawu - Bam. kaariya Isa Almasiwu tada†1.1 tada - Kaduwu. Mai Daudaye, ti ye tada Nawi Ibrahimbedǝyedǝ: 2 Ibrahim Isakua kembo, Isaku ye Yakubaa kembo, Yakuba ye Yahuda-a awaanawanju-aa kembo, 3 Yahuda ye Feres-a Jera-aa kembo, yanja Tamar, Feres ye Hesronna kembo, Hesron ye Aramba kembo, 4 Aram ye Aminadabba kembo, Aminadab ye Nashonna kembo, Nashon ye Salmonna kembo, 5 Salmon ye Bowossa kembo, ya Bowosse Rahab, Bowos ye Abidaa kembo, ya Abidaye Rut, Abida ye Yisaia kembo, 6 Yisai ye Mai Daudaa kembo.
Mai Dauda Sulemanaa kembo, calan ya Sulemanayedǝ kamu Uriyaye, 7 Sulemana ye Rehobowamba kembo, Rehobowam ye Abijaa kembo, Abija ye Asaa kembo, 8 Asa ye Yosafatta kembo, Yosafat ye Yoramba kembo, Yoram ye Wojiyassa kembo, 9 Wojiyas ye Yotamba kembo, Yotam ye Ahajua kembo, Ahaju ye Hejekiyassa kembo, 10 Hejekiyas ye Manasea kembo, Manase ye Amonna kembo, Amon ye Josiyassa kembo, 11 Josiyas ye jaman yaudiyaa dunon cadane cidi Babilayero caadǝnadǝn Yekoniyas-a awaanawanju-aa kembo.
12 Ngawo cidi Babilayero caadǝnayedǝlan, Yekoniyas Sheyaltiyella kembo, Sheyaltiyel ye Jorobabella kembo, 13 Jorobabel ye Abihudda kembo, Abihud ye Aliyakimba kembo, Aliyakim ye Ajorra kembo, 14 Ajor ye Jadokka kembo, Jadok ye Akimba kembo, Akim ye Alihudda kembo, 15 Alihud ye Aliyasarra kembo, Aliyasar ye Matanna kembo, Matan ye Yakubaa kembo, 16 Yakuba ye Isuwua kembo, Isuwudǝ kwa Merambe, Meram ye Isa tia Almasiwulan bowojaidǝa kembo.
17 Adǝgaima Nawi Ibrahimlan tai har Mai Daudaro yadero am jamannja tiloa gadegade mewu deri dasaa, koro Mai Daudalan tai har jaman yaudiyaa cidi Babilayero caadǝnaro yadero mewu deri dasaa, koro jaman adǝn tai har tambo Almasiwuyero yadero mewu deri dasaa.
Tambo Isaye
(Luk 2.1-7)
18 Akko lawar tambo Isa Almasiwuye. Yanju Meramdǝ tǝmaji Isuwuye, amma kawu larusa cade rokko dasayiro, Ruhu Alaye cakke curoaro walyeno. 19 Isuwu tǝmajinjudǝ kam jirema, fuwu jamayen tia nanguro njakko cǝraannidǝro, asǝrlan tia kolduro nia ngoyeno. 20 Adǝ karwunjun duwon, malaiya Kǝmandeye laa kǝnnasimlan tiro fǝlediye: «Isuwu kaduwu Mai Daudaye, bare Meramba kamuro ngoduro rinǝmmi, Ruhu Alayeman curoaro walyeno. 21 Tada kongwa cambi, ni ye tiro cu Isa‡1.21 Isa - Maananjudǝ Kǝmande cǝkkayi. yakke, dalilnjudǝ jamanjua biwunjalan cǝkkayi nangaro,» yeno.
22 Adǝgaima awo Kǝmande kuren ci nawiyen wuljǝnadǝ wakkayeno. 23 Tiye: «Akko fero kǝlayakku kwa nojǝnni curo ngoje tada kongwa cambe tia Imanuwellan bowojai,»†1.23 Ish 7.14 cǝnna, maana Imanuwelledǝ Ala andi-a rokko.
24 Kǝnǝmlan fayenniya, Isuwu awo malaiya Kǝmandeye tiro wuljǝgǝnadǝa cǝde Meramba kamuro ngoyeno. 25 Amma tia kamuro nojǝnni duwon, har tada kongwa cambe Isuwu tiro cu Isa kekko.