4
Misalla Isaye
Misal kasuni jǝjǝrdumaye
(Mat 13.1-9; Luk 8.4-8)
1 Koro Isa walde ci bǝrǝmben jamaa alamdu badiyeno. Am kada kadami nanjun captane, har maararo ngaye napkeno. Amdǝ samma ye cidilan ci bǝrǝmdǝyen dajana ngai duwon, 2 awo kadan misalnin jamaa alamgeno. Curo alamdunjuyen tayiro: 3 «Fanowo, kam laa kuloro algama jǝjǝrduro kiluwo. 4 Jǝjǝrji ngai duwon, kasuni laa jawalnin fiyada. Daji ngudowa isane cotto gewo. 5 Kasuni laa ye na kau kaua katti ngǝwu bawoalan fiyada. Katti ngǝwu bawodǝro, sadǝman ɍiyeno. 6 Amma kǝngal samero tatkenniya, kausu jauje fǝrdu bawo nangaro ɍimje ngamgeno. 7 Kasuni laa ye na ngiwian fiyada. Ngiwidǝ ɍije algamadǝa kimicciye, kǝla cakkǝnni. 8 Amma kasuni laadǝ ye na katti ngǝlaan fiyadanniya, ɍije kǝla ficce nema tai daje kekko, laa tada fiakku fiakku, laa firakku firakku, laa mia mia,» yeno. 9 Daji Isaye tayiro: «Kam sǝmonjuamadǝ fanjo!» yeno.
Dalil Isaye ambo misalnin manaduwuye
(Mat 13.10-17; Luk 8.9-10)
10 Na Isayen wunduma gade baworo walyenniya, tayi mewun yindindǝ-a amnju gade tia dirijane kǝljanadǝ-a kǝla misalladǝyen tia keworo. 11 Isaye: «Nayiro asǝr nodo bargaa Alaye noduro amardǝgǝna, amma tayi dawundon bawomasodǝro awiso misalnin wuldiyi. 12 Ngaima: “Caruima, asujaiwawo. Fanjaima, caɍiwawo. Adǝ gǝnia, Alaro waldane biwunja gawurdǝna!”»† 4.12 Ish 6.9-10 yeno.
Maana misal kasuni jǝjǝrdumaye
(Mat 13.18-23; Luk 8.11-15)
13 Koro Isa walde tayiro: «Misal adǝa asunuwwi wa? Awiawin gǝle misal gade asunuwi? 14 Kasuni jǝjǝrdumadǝ mana Alaye jǝjǝrjo. 15 Kasuni kǝla jawallen fidǝnasodǝ, tayima am manadǝa fanjana duwon, sadǝman Yiwulis ise mana tayilan fidǝnadǝa cuttuluwidǝ wo. 16 Tayi na kauan fidanasodǝ ye, tayima am manadǝa fanjaiyama, karwu kǝjiaro camoyidǝ wo. 17 Amma tayilan fǝrdu bawo nangaro, tussaiwawo. Kǝla manadǝyen kuttu casaiya, bi am tayia basarjaiyama, wajane koljai. 18 Am laaso ye kasuni na ngiwian fidǝnasodǝ, tayima am manadǝa fanjana duwon, 19 karwungai dio so, arsiyi mangardu so, awo gade luwaptu so karwunjaro ngasaane manadǝa kǝpcane tayiro faidajiyiwawodǝ wo. 20 Amma tayi na katti ngǝlaan fidanasodǝ, tayima am manadǝa fanjane ngojane karwunjan rojana tayiro faidajiyi, nema laa tadanju fiakku, laa firakku, laa mia mia casakkidǝ wo.»
Misal fatǝlaye
(Luk 8.16-18)
21 Koro Isa walde: «Fatǝladǝa kǝmon tǝmdaro ra cidiya dǝgǝllen gǝnaduro cawudi wa? A’a, tia kǝla gǝnaduramnjuyen gǝnaji. 22 Awima gǝraada federo culuwiwawodǝ bawo, koro awima asǝrre isanodiwawodǝ ye bawo. 23 Kam sǝmonjuamadǝ fanjo!» 24 Koro tayiro: «Awo fanuwiro hangal gǝnanowo! Jiɍi ambo ngalgǝwwadǝ gai, nayi yero ngalnjagai, koro adǝa kojǝna nayiro njasargai. 25 Kam nanjun awoamadǝ,* 4.25 kam nanjun awoamadǝ - Kam mana Isaye fanjidǝ, nodunju cǝrgane caye kojǝnaro asuji. tiro casargai, amma kam nanjun bawomadǝ,† 4.25 kam nanjun bawomadǝ - Kam mana Isaye fanjiwawodǝ, nodunju ganadǝmaa tilan camoyi. awo cǝdanadǝmaa tilan camoyi.»
Misal kasuni ɍije wurajiye
26 Koro Isa walde: «Nodo bargaa Alayedǝ alamanju kam laa kasuni cidiro fijiyi gai. Fijiyiya, 27 bune yen kal, kausu yen kal bonewane cǝdi, kasunidǝ ye ɍije wuraji, amma jiɍi fin tǝdi nojǝnni. 28 Kattidǝma cakke nema culuwi. Burwon kal cǝdiya, kǝla ficci. Kǝla cuttuluwiya, sim cǝdi. 29 Bafiyama, tawida ngoje cǝwǝrdi, sa kalaye isǝna nangaro.»
Misal kasuni mutarre
(Mat 13.31-35; Luk 13.18-21)
30 Koro Isa walde: «Awiro nodo bargaa Alayea rattalgǝiye? Misal fin gǝle tia fisarniye? 31 Alamanju kasuni mutarre gai. Kasuni mutarredǝ, curo kasuniya am cidilan fijai sammayen tima tǝngǝɍi wo. 32 Amma fijaiya, ɍije kǝskawa jǝrwulan sammaro kura woro walje, dǝlam kura kura cǝde, har ngudoso rakcane kaudinjun fannja cadandi,» yeno.
33 Kǝla raktunja fanduyen Isa tayiro mana Alayea misal kada jiɍi adǝ gainin wulyeyeno. 34 Misalnin gǝnia, awima tayiro wuljǝgǝnni. Amma sa nanjun jama baworo waljiya, fuwurawanjuro awiso fisarjiyi.
Kǝnduwo Isaye kǝla karuwa-a cambaldu ingiye-ayen
(Mat 8.23-27; Luk 8.22-25)
35 Yim adǝa dunia lǝmdu cǝdi duwon, Isaye fuwurawanjuro: «Leniyo bǝrǝmdǝa falliyo ci ingiye todǝro koniyo!» yeno. 36 Daji jamadǝa kolyeranniya, maaradǝn Isaa ngojane leyera. Maara gade ye rokkonjun mbeji. 37 Daji karuwa dunoa cije ingi bǝrǝmbe cambalje maaradǝro fidiye, har maaradǝa lǝptu mayeno. 38 Sadǝn Isa ngawo maaradǝyen kǝlanju birlan kǝnǝm cǝdi. Fuwurawanjudǝ tia kǝnǝmnin kesangǝranniya, tiro: «Sayinna, nuiye, ni lambonǝm bawo wa?» yera. 39 Isa cije karuwadǝro jǝkkade ingi bǝrǝmbedǝro: «Waldǝne gǝm bone!» yenniya, karuwadǝ daje dunia gǝmbo walyeno. 40 Daji Isaye tayiro: «Awiro yaayew? Kua yaye kambǝrsendo bawo wa?» yeno. 41 Fuwurawanjudǝ jauro rijane amanjaro: «A! Wundu gǝle kam attǝ? Karuwa-a bǝrǝm-ama mananju jagai!» yera.