1 Isa Fado Alayen luwo cǝdi duwon, fuwurawanjuye fal tiro: «Sayinna, akko rui kau ani-a soro ani-a jaumaro ajabba!» yeno. 2 Isaye tiro: «Soro mafǝndi mafǝndi ania rumma, gǝna? Kau ani sammaa wurjane fijai, har tiloma kǝla kamanjuyen gapciwaworo walji,» yeno.

3 Isa kǝla Kau Jaitunnen na Fado Alaye turuidǝn napcǝna duwon, Biturus-a Yakuba-a Yahaya-a Andarawus-a runjan isane tiro: 4 «Andiro wulsagane, sawi awo ani wakkajai? Koro awo ani sammaye sanja cǝdiya, awi alama duwon ambo fǝlediyidǝ wo?» cane tia keworo. 5 Isaye tayiro: «Hangal gǝnanowo, bare wunduma nayia njawatkǝnni! 6 Am ngǝwu cunilan*13.6 cunilan - Cu Almasiwu Alaye kǝlanjaro ngojane tayima ti wo cani. isane: “Wuma ti wo!” cane am kadaa cawatki. 7 Kǝriwu na karǝnso-a kuruwuso-alan nukcǝnaro fanuwiya, bare hangalndo cijǝnni! Sai awo ani burwon wakkajaiya duwon, amma sa njerorambe kua yaye cǝdǝnni. 8 Lardu-a lardu gade-a lawaladai, koro kǝrmai-a kǝrmai gade-a ye kattenjan kǝriwu gǝrjai. Cidi ye na gadegaden loloji, koro kǝna ye na naro ngayi. Awo ani samma badiduram boneye bas, alama kamu tia curo lejǝna gai.

9 «Hangal gǝnanowo! Fuwu majilissero njasade dandalsolan kowonjai, koro wu nangaro fuwu gomna so, mai soyen danuwi, tayiro shedaro walloworo. 10 Adǝgaima sai kawuɍi kǝji Alayedǝ jama duniaye sammaro wuldiyiya duwon. 11 Nayia njadane shararo njasadiya, bare kǝla awo wulluwiyen karwungai diwwi. Awo wulduye Ruhu Alaye sadǝn nayiro njadidǝa mananowo, dalilnjudǝ nayi gǝni, tima manaji nangaro. 12 Yaana yanjugǝnaa sǝrǝcciye roro ceyesi, bawa ye tadanjua ngai, tadawa ye bawanja-a yanja-aro tuɍu cadde casakke tayia roro ceyesi. 13 Cuni nangaro†13.13 cuni nangaro - Isaa kasadduwwa nangaro. am samma nayia wanjai, amma kam mǝrje har sa njerorambero‡13.13 sa njerorambe - Kǝnde Tada Kambedǝ. dǝganamadǝ njǝkkawo cuwandi.

14 «Sa duwon awo waada jauro batti masiwa kudoma na tia jussǝnnilan daada ruwiya,†13.14 Dan 9.27; 11.31; 12.11 (Kǝradumadǝ asujo!), daji am lardu Yahudiyayen dasaanadǝ cija kauro cagaso leja! 15 Kam kǝla soronjuyen dǝganadǝ bare jǝpce kare ngoduro curo sorodǝyero ngaanni! 16 Koro kam kulolan dǝganadǝ ye bare kalwunju ngoduro waldǝnni! 17 Yim anin kamu curoa so, nganji cǝmbia sodǝ, kuttunja! 18 Bare awo adǝ nangǝɍilan§13.18 nangǝɍi - Curo lardu yaudiyayen sanju jauro samsu ye, kuttu ye. wakkajǝnniro Alaa korowo! 19 Dalilnjudǝ yim anin bone jauro kuttu mbeji, bone duwon sa Ala dunia alakcǝnayen tai kuro kudero ngaltema jiɍinju tuwandǝnni fuwu yen fagat tuwandiwawo nangaro. 20 Koro ca Kǝmande bone adǝye kawunju fulujǝnnia, wunduma njǝkkawo cuwandiwawo. Amma am kǝrejǝnadǝ nangaro kawudǝa fulujǝna. 21 Sa adǝn kam laaye nayiro: “Akkonju Almasiwudǝ!” bi “Towonju ti!” cǝnia, bare tia yasarawwi! 22 Dalilnjudǝ almasiwuwa kattuwuyeso-a nawiya kattuwuyeso-a isane alama so, awo ajabba ajabba so cadǝne, yoyenoa, har am kǝrejǝnadǝmaa jambajane cawatki. 23 Nayidǝ, hangal gǝnanowo! Kawu wakkajidǝro, awo sammaa nayiro wulnjagakkǝna.

24 «Amma ngawo bone yim aniyen kǝngal cǝlǝmbo walji, kumbal ye nurnju ciwawo, 25 sillowuwaso ye samelan casuri, koro kǝnduwowa sameye ye jauro lolojai. 26 Daji Tada Kambedǝ jauro kǝnduwoa-a darajaa-a curo fofouyen isi carui.†13.26 Dan 7.13-14 27 Adǝgaima malaiyawanjua cunode talgǝmo duniaye dewu samman ci dajiram duniayen tai ci dajiram sameyero yade amnju kǝrejǝnadǝa capcai.

28 «Ya tarmuyen misal adǝa asunowo! Sa fǝktu badije kalu ɍijiya, nangǝɍi karǝnjǝnaro nonuwwa. 29 Ngaima awo ani wakkajai ruwiya, ti cinnalan del karǝnjǝnaro*13.29 ti cinnalan - Tada Kambedǝye kǝndenju del karǝnjǝna. nonowo! 30 Jiremaro nayiro wulnjagakki, am jaman adǝye sanuiwawo, sai awo ani samma wakkajaiya duwon. 31 Same-a cidi-a baworo waljai, amma manani tǝmmaro baworo waljiwawo.

32 «Amma yim bi sa duwon awo ani wakkajaidǝa wunduma nojǝnni. Bawadǝro kajia, malaiyawa samelan dasaana ye nojanni, Tadadǝ ye nojǝnni. 33 Hangal gǝnanowo, faadaro dǝgaiwo, sanju nonuwwi nangaro. 34 Alamanju kam bǝlawuro cǝdi gai. Kǝnduwo fannjuro kistuwuyedǝa wolodiyanjuro koljiye wundunja yayero kidanju ce cinna guredumaro faadaro dǝga cǝne sapkadano. 35 Adǝ nangaro faadaro dǝgaiwo, dalilnjudǝ sa kǝma fadoye isidǝa nonuwwi nangaro, kajiri, bi bune, bi fajar, bi suwa, 36 bare yekkinndo bawo kǝnǝm diwi nayia nanjaganni! 37 Awo nayiro wulnjagakkǝnadǝa wundusoro wulgǝkki, faadaro dǝgaiwo!» yeno Isaye.